NIPADDUWO 44
Raabe Ohavita Anamareza
ALOBWANA aba ali mmakathamihoni. Anofanyeela othawa, agahithawe, anela opiwa. Awene anamareza akudda Izraeli, nanda muyana oddu onakamiha awene ddi Raabe. Raabe onkala veneva mu numba eli vadhulu va rhinga ya sidadi ya Jeriko. Ndoweni niziwe sabwa ekaleli alobwana aba mmakathamihoni.
Aizraeli ahimala ovisasanyedha wila aabuwe Mwinje Jordano wila avolowe mwilaboni ya Kana. Mbwenye ahinathi okosa eji, Josue oharuma anamareza eeli. Iyene ohapanga awene: ‘Kadhowani mwañgananihe elaboya vina sidadi ya Jeriko.’
Anamarezaya mufiyelani mu Jeriko, awene adhowile vatakulu va Raabe. Mbwenye akala muthu ompangile mwene wa Jeriko dhahi: ‘Mathiyu Aizraeli eeli aahivolowa mpuno wila eeddelele elabo.’ Mwiweliye eji, mwene oharuma alobwana wa Raabe, nanda awene ahimuruma Raabe: ‘Kaaburutxedhe otakulu alobwana aniwena mu numba mwawo!’ Mbwenye Raabe wahimala wavita anamarezaya omutompini wa numba yaye. Noona iyene ohiloga: ‘Alobwana dhahi aahidha vatakulu vaga, mbwenye miyo kaddinziwa waadhilani. Awene abudduwile egudduguddu muromelani wene, misuwo dha sidadi dhihinathi ofugiwa. Mugamaguva, nyuwo podi wathidda!’ Dhaene alobwana aba ahathamagela.
Mubudduwelani, Raabe ohimaguvela owela omutompini. Iyene ohapanga anamareza abale: ‘Ddihiziwa wila Yehova onela wuvahani elabo eji, nihiwa mukalelo womihiliye Mwinje Wofila nyuwo bamugabudduwa wiJipito, vina mukalelo waapilinyu amwene Sioni na Oge. Miyo ddihukoselani nthebwa, noona ddinowuthiddani myeddo, kaddiroromeliheni, wila nyuwo munela oddikaanela nthebwa. Kanvuneni babi waga vina mai waga, vina arogori aga na abali aga.’
Anamarezaya ahilibela wila anela okosa ejene, mbwenye Raabe onofanyeela okosa elobo txilobo. Anamareza ahiloga dhahi: ‘Kathukula kabala eji yofila nanda omageelele va janelani nawo, vina kaagumanihe mu numba mwawo amudhi awo otene akale na weyo. Nanda iyo notene nigeyelela omuthukula Jeriko, ninela woona kabala eji va janelani nawo nanda kaninampe muthu mu numba mwawo.’ Anamarezaya mwiyelelani wa Josue, awene ahimpanga dhilobo dhotene dhapadduwile.
Josue 2:1-24; Aebreo 11:31.