NIPADDUWO 45
Wabuwa Mwinje Jordano
KAÑGANA! Aizraeli anowabuwa Mwinje Jordano! Ki manjeya ali wuvi? Sabwa ya muzogwe onrubwa vaddiddi nsaka nthile na yaka, mwinjeya wahidhaala txibarene mitala dhiñgonovi mundduni. Mbwenye ovanene manjeya otene ahimala odhowa! Nanda Aizraeli anowabuwa va mathakani owuma ninga mwakoselani va Mwinje Wofila! Manje otene adhowile wuvi? Ndoweni noone.
Mufiyeli mudhidhi wa Aizraeli wabuwa Mwinje Jordano, Yehova wahimpanga Josue wila aapange athu: ‘Anamakutha anofanyeela othukula kasha ya nipagano nanda adhowe vasogorho vehu. Awene ageka manyalo awa mmanjeni a Mwinje Jordano, manjeya anela wimela othamaga.’
Noona anamakuthaya ahithukula kasha ya nipagano, nanda ahivijela eji vasogorho va nlogo. Mufiyelani va Jordano, anamakuthaya ahinyigala mmanjeni kakamwe. Manjeya anothamaga na guru vaddiddi vina boovaya. Mbwenye manyalo awa muddiginyelani wene manjeya, aba ahiroma wimela othamaga! Nthi ntikiniho! Omadheelo wa manje Yehova wahibarela manjeya. Noona, mohigoneela mmwinjenimwa kamuli viina manje!
Anamakutha abale anvijela kasha ya nipagano ahidhowa kakamwe vari va mwinje wowuma. Weyo onowawoona awene va nladdanihoni nthi? Bali owimeleene mwenemwale, Aizraeli otene aheedda kakamwe wila aabuwe Mwinje Jordano va mathakani owuma!
Mumaleli wabuwa athu otene, Yehova ohimuruma Josue wila aapange alobwana a guru 12: ‘Kadhowani mmwinjeni mpule mwimelile anamakutha na kasha ya nipagano. Kaddoddani myarha 12, nanda mupigele venevo vanfuninyu osama mathiyu abano. Dhaene, musogorho, ana enyu agavuza txini entapulela myarha esi, munofanyeela wapanga wila manje aahiimela othamaga kasha ya nipagano ya Yehova mwamwabuwelani Jordano. Myarha esi dhinela wuwubutxedhani ntikiniho nthi!’ Josue vina ohika myarha 12 apale vemelile anamakutha mmagwani mwa mwinje.
Omamalelowa Josue ohapanga anamakutha aba anvijela kasha ya nipagano: ‘Kabudduwanimo mu Jordano.’ Nanda mukoselani wene ejene, mwinjeya ohiroma othamaga wili.
Josue 3:1-17; 4:1-18.