NIPADDUWO 69
Mwanamuyana Ohimukamiha Kazembe
WEYO onoziwa txini enloga mwanamuyana oddu muñgono? Iyene onompanga nyanyi oddu mwaha wa Elizeu namavuhula wa Yehova, vina dhilobo dhotikiniha dhimukamihile Yehova okosa. Nyanyiya kanziwa elobo mwaha wa Yehova sabwani iyene kayo Muizraeli. Ndoweni noone, sabwa ekaleli mwanamuyana oddu vatakulu va nyanyi oddu.
Nyanyiya mukudda Siria. Mamunaye ddi Naama, kazembe wa nikuru na anyakoddo na akudda Siria. Akudda Siria ela omuthidda mwanamuyana oddu muñgono wa Muizraeli, nanda badhiwana wa mwadhi Naama wila akale mudhari waye.
Naama ohikaana eredda yowopiya entxemerhiwa maranya. Eredda eji enofiyedha okosiha dhipaddi dhiina dha nyama ya athu omotha. Noona ji ejene enimpanga mwanamuyana oddu mwadhi Naama: ‘Ddigahiziveliwa nabuya waga kodhowa wa namavuhula wa Yehova oli o Izraeli. Iyene agahivulumutxa maranya aye.’ Vasogorhova eji ehipangiwa mamuni wa nyanyi.
Naama onofuna vaddiddi ovulumutxiwa; noona iyene ohigana odhowa o Izraeli. Mufiyeliye okule, iyene ohidhowa vatakulu va Elizeu. Elizeu ohimuruma mudhari waye wila adhowe ampange Naama avisuwe mMwinjeni Jordano dila tanu na biili. Eji ehimusilidha Naama vaddiddi, nanda iyene ohiloga dhahi: ‘Minje dha mmudhi sikalile opitha mwinje mwinjevi mu Izraeli!’ Mumaleliye ologa eji, Naama ohidhowa.
Mbwenye mmodha mwa adhari aye ohimpanga iyene: ‘Nabuya, Elizeu kowurumani okosa elobo yorutxa, nyuwo mugahikosa eji. Kito ovanene munkooddelani ovisuwa bahi, ninga mulogeliye?’ Naama ohinvuruwana mudhari waye nanda ohidhowa ovibwiniha mMwinjeni Jordano dila tanu na biili. Mukoseliye ejene, nyama yaye ehiliba vina ehivulumuwa!
Naama ohiziveliwa vaddiddi. Iyene ohiyelela wa Elizeu nanda ohimpanga dhahi: ‘Ovanene ddihiziwa txibarene wila Mulugu wa mu Izraeli ddi Mulugu mmodha bahi wa ebaribari velaboni yotene ya vati. Noona, ddinowukumbirhani, kathukulani sagwati eji.’ Mbwenye Elizeu ohakula dhahi: ‘Nne, miyo kaddinathukule sagwati eji.’ Elizeu ohiziwa wila egahikala yabure othukula sagwati ejile, sabwani wanvulumutxile Naama wali Yehova. Mbwenye Jeazi mudhari wa Elizeu onofuna okaana sagwatiya.
Noona ji ejene enkosa Jeazi. Mudhoweli Naama, Jeazi ohimuthamagela Naama. Iyene ohiloga dhahi: ‘Elizeu ohiddiruma wila ddupangeni yawila iyene onofuna dhilobo dhiñgonovi dha sagwati yenyu wila aavahe amarho afiyile wene ovanene wila amoone.’ Oku txibarene, othambi. Mbwenye Naama kanziwa wila oku othambi; noona iyene ohinvaha Jeazi dhilobo dhiñgonovi.
Jeazi mwiyeleliye mmudhi, Elizeu ohiziwa ejile yakosiliye. Yehova wahimala ompanga iyene. Noona iyene ohiloga dhahi: ‘Sabwa ya weyo okosa elobo eji yabure, maranya a Naama anela ohala na weyo.’ Nanda eji ehipadduwa wene venevo!
Ninsunzamo eni mwa dhotene esi? Yoroma, yawila ninofanyeela okala ninga mwanamuyana oddule muñgono nanda nilogege mwaha wa Yehova. Eji podi okosa deretu vaddiddi. Yanawili, kaninfanyeela ovithukulela ninga mwakaleli Naama omaromo, mbwenye ninofanyeela wawiwelela adhari a Mulugu. Nanda Yanoraru, kanilogege othambi ninga mwakoseli Jeazi. Kaninsunzamo vaddiddi mwa omwengesa Bibilia?
2 Amwene 5:1-27.