NIPADDUWO 70
Jona Na Oba Enddimuwa
KAMWAÑGANE mulobwana oli mmanjeni. Iyene oli mmakathamihoni vaddiddi, kayo? Oba ejile enfuna emmedhe! Weyo onomuziwa mulobwana oddu bani? Nzina naye ddi Jona. Ndoweni noone mukalelo ovivolotxiliye mmakathamihoni menjene.
Jona namavuhula wa Yehova. Ovirile mudhidhi muñgonovi mukweli namavuhula Elizeu venevo vampangile Yehova Jona dhahi: ‘Kadhowa o sidadi enddimuwa ya Ninive. Obure wa nlogo wenewale onddimuwa vaddiddi, nanda ddinfuna wila weyo wapange mwaha wa eji.’
Mbwenye Jona kanfuna odhowa. Venevo iyene ohimuwela paporo ondowa mpaddi mwinagu wohikala o Ninive. Yehova kaziveliwe na Jona sabwa ya othawa. Noona iyene ohitota nthithimo nddimuwa. Nthi nihithabwa mpaka paporoya ofunaga obwina. Anamatxerhengaya anowova vaddiddi, nanda awene anowakuwela amilugu awa wila aakamihe.
Omagomelowa Jona ohapanga dhahi: ‘Miyo ddinimwebedha Yehova, Mulugu okosile odhulu na elabo ya vati. Ddinthawa okosa elobo eddirumile Yehova okosa.’ Noona anamatxerhengaya ahivuza: ‘Nukosele eni wila nimaalihe nthithimona?’
Jona ohiloga dhahi: ‘Muddivokedhe mu nyaza, nanda nyazaya enela omaala wili.’ Anamatxerhengaya kanfuna okosa eji, mbwenye nthithimona muthabwelani omagomelowa awene ahinvokedha Jona mmanjeni. Mohigoneela nthithimona nihiimela, nanda nyazaya ehimaala wili.
Jona muririmeliye mmanjeni, oba enddimuwa ehimmedha. Mbwenye iyene kakwile. Iyene ohikala mbani mwa oba masiku mararu mutana na mathiyu. Jona onokubanya vaddiddi yawila kamwiweleli Yehova vina odhowa o Ninive. Noona weyo onoziwa txini enkosiye?
Jona ohilobela wa Yehova bagakumbirha nikamihedho. Mumalelani Yehova ohikosiha obaya omuthapika Jona vamathakani owuma. Venevo Jona ohidhowa o Ninive. Eji kinnisunziha wila jofuneya iyo okosa elobo elobovi enniruma Yehova?
Nivuru na Bibilia na Jona.