NIPADDUWO 78
Nlada Ninleba Va Eruguni
EMPADDUWA apa txini? Athuya anokosa muthupo munddimuwa. Mwene wa Babilonia ohawobela aleddo oovuwa txikwi. Awene anolabihedha kopo dha nddarhama vina dha parata vamodha na dhibale dhithukuliwe mu mparhani wa Yehova mu Yeruzalemi. Mbwenye, morurumutxa, dhibuno dha nlada na mulobwana dhihithwanyuwa mudhulu-mudhulu nanda dhihiroma oleba va eruguni. Athu otene anowova vaddiddi.
Ovanene mweneya ddi Belsazari, mudhuli wa Nabukoddonozori. Na okuwa iyene ohatxemerhiha aziwi aye wila avolotxiwe. Mwene ohiloga dhahi: ‘Muthu muthuvi onwodha wengesa dholeba esi nanda baddipanga ejile entapulelani, onela othuviwa sagwati dhinjidhene vina onela othomiwa ninga mulamuleli munddimuwa wanoraru mu omweneni.’ Mbwenye kavo mwa aziwi onwodha wengesa dholebadha va eruguni, nne ologa ejile entapulelani.
Mai wa mwene ohiwa onyagula nanda ohivolowa mpule mwajiwa. Iyene ohimpanga mwene: ‘Ddinowukumbirhani kamutxutxeyetxe dhawene. Mu omweneni mwenyu muhikala mulobwana onaziwa amilugu ookoddela. Bibi wenyu Nabukoddonozori bali mwene iyene wahimuthoma bakala munddimuwa wa aziwi aye otene. Nzina naye ddi Danieli. Kamutxemerhiheni, nanda iyene onela wupangani ejile entapulela esi dhotene.’
Noona mohigoneela Danieli ohivolotxiwa. Mumaleliye okoodda othukula sagwati sagwativi, Danieli ohiroma ompanga sabwa yamuthiyihedhi Yehova bibi wa Belsazari Nabukoddonozori okala mwene. Danieli ohiloga dhahi: ‘Iyene wannivithukulela vaddiddi. Nanda Yehova wahimusothotha.’
Danieli ohimpanga Belsazari: ‘Mbwenye nyuwo mwahiziwa dhotene mwaha wa ejile empadduweli iyene, nanda dhaene munovithukulelavi ninga mwakaleli Nabukoddonozori. Nyuwo muhiburutxiha kopo na dhibale dha mu mparhani wa Yehova nanda muhimwelamo. Nyuwo muhatamaala amilugu akosiwe na miri vina myarha, nanda nyuwo kammuthithimihile Muthanddi wehu Munddimuwa. Ji sabwa ya ejene erumeli Mulugu nlada wila nilebe mazu aba.’
Danieli ohiloga: ‘Elebiwe dhahi: MENE, MENE, TEKEL na PARSIM.’
‘MENE entapulela wila Mulugu ohengesela masiku a omwene wenyu nanda onela ogomiha omweneya. TEKEL entapulela wila nyuwo muhipimiwa va balansani nanda muhooniwa wila kamuli elobo. PARSIM entapulela wila omwene wenyu ohivahiwa akudda Medo na Persia.’
Oku Danieli bagaloga, akudda Medo na Persia ahiroma ombuddugela Babilonia. Awene ahithukula sidadiya nanda ahimpa Belsazari. Nlada ninleba va eruguni nihisoriheya omathiyu obule! Mbwenye ovanene txini enfuna wapadduwela Aizraeli? Ninela woona mohigoneela, mbwenye voroma ndoweni noone txini empadduweli Danieli.
Danieli 5:1-31.