NIPADDUWO 79
Danieli Mu Ntholoni Na Apoddogoma
O, O! ENKALA ninga Danieli oli mmakathamihoni vaddiddi. Mbwenye apoddogomaya kanimuluma! Weyo onoziwa sabwaya? Omwikile Danieli mpu na apoddogoma aba otene bani? Ndoweni niziwe.
Ovanene mwene wa Babilonia ddi mulobwana ontxemerhiwa Dario. Iyene onoziveliwa na Danieli vaddiddi sabwani Danieli ddwaderetu vaddiddi vina ddwa zelu. Dario ohimusakula Danieli wila akale mulamuleli wa makamaka mu omweneni mwaye. Eji ehakosiha alobwana ena mu omweneni omukaanela aje Danieli, noona awene akosile eji.
Awene ahidhowa wa Dario nanda ahiloga dhahi: ‘Iyo nihilagana, O, mwene, yawila nyuwo munofanyeela okosa nlamulo ninloga wila mwari mwa masiku 30 kavo muthu onfanyeela omulobelela mulugu muluguvi obe muthu, mbwenye nyuwo bahi O, mwene. Akala muthu muthuvi onovanya, iyene onofanyeela ovokedhiwa mwa apoddogomani.’ Dario kanziwa sabwa enfunela alobwana aba wila nlamulo nthi nikosiwe. Mbwenye iyene onoona ninga eji yubuwelo yaderetu, noona iyene ohileba nlamulona. Ovanene nlamulona kaninsadduleya.
Danieli muziweliye nlamulona, iyene ohidhowa mmudhi nanda ohilobela, ninga mwakoselitxiye. Alobwana abale abure aahiziwa wila Danieli kagathiyile olobela wa Yehova. Awene ahiziveliwa, sabwani enkala ninga yofuna yawa ya omugomiha Danieli enolaba.
Mwene Dario muziweliye sabwa yafunela alobwana abale okosa nlamulo nthi, iyene onokubanyedha vaddiddi sabwa ya ejene. Mbwenye iyene kanwodha osaddula nlamulona, noona iyene wahifanyeela ogwiha nlamulo wila Danieli avokedhiwe mu ntholoni na apoddogoma. Mbwenye mwene ohimpanga Danieli: ‘Ddinjedhela wila Mulugu wawo, oddwene onimulabiwe, onela wuvuna.’
Dario ohinyonyeya vaddiddi mpaka okoodda ogona omathiyu obule. Mmangwananimwa na membesi iyene ohithamagela o ntholoni na apoddogoma. Weyo podi omoona iyene apale. Iyene ohikuwa: ‘Danieli, mudhari wa Mulugu wa mento! Mulugu onimulabiwe ohiwodha wuvuna mwa apoddogomani?’
Danieli ohakula dhahi: ‘Mulugu ohimuruma mungelo waye, nanda ohifuga milomo dha apoddogomaya noona awene kaddilumile.’
Mwene ohiziveliwa vaddiddi. Iyene ohigwiha nlamulo wila Danieli aburutxiwe mu ntholonimwa. Mumaleliye iyene ohiruma wila alobwana abale abure aatamelile omugomiha Danieli avokedhiwe mu apoddogomani. Awene ahinathi ofiya vati va ntholona, apoddogoma ahathidda nanda ahitwa makuva awa otene.
Venevo mwene Dario ohilebela nlogo notene mu omweneni mwaye: ‘Ddinogwiha nlamulo wila athu otene anofanyeela omuriha Mulugu wa Danieli. Iyene onokosa matikiniho manddimuwa. Iyene ohinvuna Danieli ojiwa na apoddogoma.’
Danieli 6:1-28.