NIPADDUWO 88
Joau Ohimbatiza Yezu
KOONA kangayiwa bigatitela va musorho va mulobwana oddu. Mulobwanaya ddi Yezu. Ovanene iyene ona othamagela vyaka 30 dha obaaliwa. Nanda mulobwana oli na iyene ddi Joau. Nihimala osunza vañgonovi mwaha wa iyene. Weyo onowubuwela mudhidhi wadhowile Maria omoona mmudhi waye Elizabeti, nanda nyenyeya mbani mwa Elizabeti balupa na othaba? Nyenye oddule wali ahinathi obaaliwa wali Joau. Ki ovanene Joau na Yezu ankosa eni?
Joau olomala wene ombwiniha Yezu mmanjeni a Mwinje Jordano. Obu bu mukalelo ombatiziwa muthu. Voroma, iyene onobwinihiwa mmanjeni, agamala ofemutxiwamo. Sabwa yawila ji ejene enakosiyena athu, iyene ontxemerhiwa Joau Mbatizi. Ki Joau ombatizelini Yezu?
Indde, Joau ohikosa eji sabwani Yezu wahidha nanda bamukumbirha Joau wila ambatize. Joau onabatiza athu abale anfuna obatiziwa wila alagihe yawila ahitxinuwa mwa dhilobo dhabure dhikosilani. Ki Yezu wahikosa elobo yabure yafanyeeliye otxinuwa? Nne, Yezu txipo kanakosege, sabwani iyene ddi mwana wa mwinyene Mulugu ovenyedha odhulu. Dhaene iyene wahimukumbirha Joau wila ambatizele sabwa yina yothiyana. Ndoweni noone sabwaya.
Yezu ahinathi odha veneva wila agumane na Joau, iyene wali namasema. Namasema ddi muthu onsasanya dhilobo dha matabwa, ninga meza vina mipaddo. Zuze mamuni wa Maria wali namasema, nanda iyene wahimusunziha Yezu okala namasema vina. Mbwenye Yehova kaamurumeli Mwana waye velaboni ya vati wila akale namasema. Iyene wahikaana mabasa a va woka wila akose, nanda wahifiya mudhidhi wa Yezu oroma okosa mabasa aba. Noona wila alagihe yawila wadheeli okosa efunelo ya Babi waye, Yezu ohimukumbirha Joau wila ambatize. Mulugu wahiziveliwa ejene?
Indde, iyene wahiziveliwa, sabwani Yezu mubudduweliye mmanjeni, lizu novenyedha odhulu nihiloga dhahi: ‘Oddu ddi Mwana waga, onziveliwimi.’ Vina, enkala ninga odhulu ohifuguwa nanda kangayiwa eji enimutitela Yezu. Mbwenye eji kayo kangayiwa ya txibarene. Eji enkala ninga kangayiwa bahi. Txibarene obu muya wokoddela wa Mulugu.
Ovanene Yezu ohikaana dhilobo dhinjidhene dha otanalela, noona iyene ohidhowa va mburoni yekavo mwari mwa masiku 40. Wenewo Satana ohinfiyedha. Dila tharu Satana ohitamela omukosiha Yezu elobo yosadduwela malamulo a Mulugu. Mbwenye Yezu kakosile eji.
Mumalelani, Yezu ohiyela nanda ohigumana na alobwana dhahi abene adhile okala anamafara aye ooroma, obe anamasunza. Enaya mazina awa ba aba: Andre, Peduru (vina ontxemerhiwa Simoni), Filipi na Natanaeli (vina ontxemerhiwa Bartolomeu). Yezu na anamasunza aba aswa ahidhowa o kwathi ya Galilea. Mu Galilea awene ahiimela va Kana sidadi ya obaaliwa ya Natanaeli. Wenewale Yezu ohidhowa o mathangani manddimuwa a matelo, nanda ohikosa ntikiniho naye noroma. Weyo onoziwa ntikinihona? Iyene ohisaddula manje bakala vinyu.
Mateus 3:13-17; 4:1-11; 13:55; Markos 6:3; Joau 1:29-51; 2:1-12.