NIPADDUWO 89
Yezu Ohikuputha Mparha
APA Yezu ohiludduwa wene, kaludduwile? Weyo onoziwa sabwa eludduweliye vaddiddi? Sabwani alobwana aba mu mparhani wa Mulugu mu Yeruzalemi awene amukumbela vawa vaddiddi. Awene anotamela ogumela kobiri dhinji mwa athu anda veneva wila amwebedhe Mulugu.
Weyo onowawoona ana ñgombe abale otene, mabila vina kangayiwa? Dhaene, alobwana aba anoguliha dhinama esi kakamwe va mparhani. Weyo onoziwa sabwaya? Sabwani Aizraeli anofuna dhinama vina balame wila amukoselena Mulugu mukutho.
Nlamulo na Mulugu naloga wila Muizraeli agakosa yabure, onofanyeela omukosela Mulugu mvaho. Vina wankala midhidhi dhiina, dhafanyeela Aizraeli operheka mivaho. Ki Muizraeli agawodhile ofanya wuvi balame vina dhinama wila amperhekele Mulugu?
Aizraeli ena ankaana balame vina dhinama. Noona awene anwodha operheka esene. Mbwenye Aizraeli enjene kaana dhinama obe balame. Nanda ena akala wolapela vaddiddi na o Yeruzalemi awene kawodha odhowana o mparhani modha mwa dhinama dhawa. Noona athu anda veneva bagula dhinama obe balame dhafunani. Mbwenye alobwana aba ela walogosa athuya kobiri gwe vaddiddi. Awene ela wajela athu. Eji bilivi awene kafanyeela ogulihaga veneva kakamwe va mparhani wa Mulugu.
Ji ejene emusilidhile Yezu. Noona iyene ohifuthukula mezaya a alobwana abale na kobiridha vina ohiwaza kobiri dhawa dha mijila. Vina ohisasanya muwasulo wa kabala nanda ohitotela dhinamadha dhotene otakulu wa mparha. Iyene oharuma alobwana abale aguliha kangayiwa: ‘Kaburutxanimo mpu! Katxelelani okosa numba ya Babi waga okala mburo wa opamo kobiri gwe.’
Anamafara ena a Yezu ali veneva va mparhani na iyene mu Yeruzalemi. Awene anotikina esile dhinoonani Yezu bagakosa. Mumalelani awene ahubuwela mburo mBibiliani onloga mwaha wa Mwana Mulugu: ‘Okwela numba ya Mulugu onela othidda mwa iyene ninga motho.’
Yezu bali mwenemwa mu Yeruzalemi va mathangani a Paskwa, iyene ohikosa matikiniho menjene. Mumaleliye, Yezu ohibudduwa mu Yudea nanda baroma oleddo waye wa wiyelela o Galilea. Mbwenye bali mu dila, iyene ohivira o kwathi ya Samaria. Ndoweni noone yapadduwile wenewale.