NIPADDUWO 91
Yezu Ohisunziha Va Mwangoni
KAMOONE Yezu bagilatile apa. Iyene onowasunziha athu aba otene va mwangoni mu Galilea. Aba agilatile waddamana vaddiddi na iyene ba anamasunza aye. Iyene wahasakula 12 wila akale arumiwi aye. Arumiwi ba anamasunza a va woka a Yezu. Weyo onoziwa mazina awa?
Ohikalawo Simoni Peduru na mbali waye Andre. Vina ohikalawo Tiago na Joau, abene ali obali vina. Vina murumiwi mwina ontxemerhiwa Tiago, nanda mwinaguwa ontxemerhiwa vina Simoni. Arumiwi eeli antxemerhiwa Yuda. Mmodha ddi Yuda Iskarioti nanda Yuda mwina ontxemerhiwa vina na nzina na Tadeu. Ohikalawo vina Filipi na Natanaeli (ontxemerhiwa vina Bartolomeu), na Mateus vina Tome.
Mwiyeleliye o Samaria, Yezu ohiroma olaleya dila yoroma: ‘Omwene wa odhulu oli vakukuvi.’ Weyo onoziwa omwene obu txini? Nthi nlamulelo na txibarene na Mulugu. Yezu ddi mweneya. Iyene onela olamulela ovenyedha odhulu nanda onela odhana murenddele velaboni ya vati. Modheela omwene wa Mulugu elabo yotene ya vati enela osadduliwa ekale paraizu wokoddela.
Yezu oli apa bagaasunziha athu mwaha wa omwene obu. Iyene ohitapulela: ‘Mukalelo onfanyeelinyu olobelaga bu obu. Babi wehu muli odhulu, nzina nenyu nithithimihiwe. Omwene wenyu odhe. Efunelo yenyu ekosiwege velaboni ya vati, ninga munkoseliwani odhulu.’ Athu enjene antxemerha nlobelo nthi ninga: ‘Nlobelo na Nabuya.’ Ena antxemerha ‘Babi Wehu.’ Weyo podi oromola nlobelo notene?
Yezu vina onowasunziha athu mukalelo onfanyeelani weddihana muthu na mukwaye. Iyene ohiloga dhahi: ‘Mwakoselege athu ena esile dhinfuninyu wila awene ookoselegeni.’ Weyo kunziveliwa athu ena agoweddihaga na mukalelo waderetu? Noona, Yezu onloga dhahi, ninofanyeela waweddiha athu ena na oderetu. Kinakale yotikiniha mparaizu wa elabo ya vati athu otene agakosaga ejene?
Mateus makapitulu 5 mpaka 7; 10:1-4.