NIPADDUWO 102
Yezu Ohikalawo
WEYO onomuziwa bani muyana oddu na alobwana aba eeli? Muyanaya ddi Maria wa o Magdala, marho wa Yezu. Nanda alobwana ana dhabalo dhotxena awene angelo. Kambirhinya eji eñgono munturumela Maria bu mburo wekiwe maningo a Yezu mumaleliye okwa. Mburo obu ontxemerhiwa nsiye. Mbwenye ovanene maningoya kamo! Othukulilemo bani? Ndoweni noone.
Mumaleli Yezu okwa, anamakutha ahimpanga Pilato dhahi: ‘Yezu baliwo iyene wahiloga wila agahivenyihiwa mu okwani agavira masiku mararu. Noona mulamule wila nsiyena nañganeliwege. Agamala anamasunza aye kanawodhe wiya maningo aye nanda baloga wila iyene ohivenyihiwa mu okwani!’ Pilato ohapanga anamakutha wila aarume anyakoddo añganelege nsiyena.
Mbwenye membesene vaddiddi siku na noraru mumaleli okwa Yezu morurumutxa mungelo wa Yehova ohidha. Iyene ohibubulutxa mwarhaya va nsiyeniva. Anyakoddoya anowova vaddiddi mpaka okoodda owodha oviddiginya. Omagomelowa, awene muturumelani mwari mwa nsiyena, maningoya kamo! Anyakoddo ena ahivolowa mu sidadi nanda ahapanga anamakutha. Weyo onoziwa txini ekosile anamakutha abale abure? Awene ahapitxa kobiri anyakoddoya wila aloge othambi. Anamakutha ahapanga anyakoddoya dhahi: ‘Muloge wila anamasunza aye aahidha na mathiyu, oku banigagona, nanda beya maningoya.’
Noona, ayana ena amarho a Yezu ahidhowa woona nsiyena. Awene aahitikina vaddiddi sabwa ya ofanya nsiyena banili gwengwerhe! Morurumutxa angelo eeli aabalile dhabalo dhoñganimela ahithwanyuwa. Awene ahavuza dhahi: ‘Munimutamelela eni Yezu apano? Iyene ohimala ovenyihiwa. Kamaguvani mudhowe mwapange anamasunza aye.’ Ayana aba aahithamaga na omaguva vaddiddi! Mbwenye bali mu dila mulobwana dhahi ohawimetxa. Weyo onomuziwa odduya bani? Ddi Yezu! Iyene ohapanga dhahi: ‘Kadhowani mwapange anamasunza aga.’
Ayanaya mwapangelani anamasunza wila Yezu ohikalawo vina yawila ahimoona, anamasunzaya ahirutxiwa orumeela eji. Peduru na Joau ahithamagela okule oli nsiyena wila oone anyene, mbwenye nsiyena nili gwengwerhe! Peduru na Joau mudhowelani, Maria wa o Magdala ohihala mundduni. Pa veneva vaturumeliyemo nanda bawoonamo angelo aba eeli.
Weyo onoziwa txini yapadduweli maningo a Yezu? Mulugu wahirimeeliha. Mulugu kanvenyihile Yezu mu okwani na maningo a nyama abale akwiliyena. Iyene wahinvaha Yezu maningo maswa a muya, ninga abale akaanile angelo odhulu. Mbwenye wila aalagihe anamasunza aye yawila iyene ohikalawo, Yezu podi wabala maningo anwodha woona athu, ninga munasunzelihu.
Mateus 27:62-66; 28:1-15; Lukas 24:1-12; Joau 20:1-12.