NIPADDUWO 103
Mu Kambirhinya Yofugeya
PEDURU na Joau mumalelani othiya nsiye mwali maningo a Yezu, Maria ohihala venevale yeka. Iyene ohiroma olila. Mumaleliye iyene ohiworoma baturumela mu nsiyenimwa, ninga moonelihu va nladdanihoni nthile na mundduni. Mwenemwale iyene ohawoonamo angelo eeli! Awene ahinvuza dhahi: ‘Onlilela eni?’
Maria ohakula dhahi: ‘Ahimuthukula Nabuya waga, nanda kaddinziwa wego omuthiyilani.’ Mumaleliye Maria ohizugunuwa nanda ohimoona mulobwana. Mulobwana oddu ohinvuza: ‘Weyo onimutamela ani?’
Maria onoona ninga mulobwana oddu ddi namasasanyedha mundda, nanda txino ddi iyene othukulile maningo a Yezu. Noona iyene ohiloga dhahi: ‘Akala nyuwo muhimuthukula, kaddipangeni omuthiyilinyu.’ Mbwenye txibarene, mulobwana oddu ddi Yezu. Iyene wabalile maningo ahinwodha Maria ozinddiyela. Mbwenye mulobwanaya mmutxemerheliye Maria na nzina naye, Maria ohiziwa yawila oddu ddi Yezu. Maria ohithamaga nanda ohapanga anamasunza: ‘Ddihimoona Nabuya!’
Vasogorhova sikunene nthile, anamasunza eeli bagadhowa murudda wa Emaus, mulobwana dhahi ohigumana na awene. Anamasunzaya anokubanya vaddiddi sabwani Yezu ohipiwa. Mbwenye bagadhowa vamodha, mulobwanaya ohitapulela dhilobo gwe dha mBibiliani esene dhakosihile awene wiwa deretu. Mwimelelani wila aje, anamasunzaya ahizinddiyela wila mulobwana oddu ddi Yezu. Mumalelani Yezu ohirimelavo, nanda anamasunza aba eeli ahiyela momaguva dila yotene mpaka o Yeruzalemi wila aapange arumiwi mwaha wa iyene.
Eji bigakoseya, Yezu vina ohimuthwanyuwela Peduru. Ena mwiwelani eji, ahithaba vaddiddi. Mumalelani anamasunza aba eeli ahidhowa o Yeruzalemi nanda ahafanya arumiwi. Awene ahapanga vina mukalelo wathwanyuweli Yezu mu dila. Nanda bagaloga wene mwaha wa eji, weyo onoziwa elobo gani yowumiha mulomo epadduwile?
Kañgana nladdaniho nthi. Yezu ohithwanyuwa kakamwe mu kambirhinya, masiki musuwoya vafugiwani. Anamasunzaya ahiziveliwa vaddiddi! Nthi kayo siku na othaba vaddiddi? Onowodha wengesa dila ngasi dhathwanyuweli Yezu anamafara aye mpaka ovanene? Wengesile dila tanu?
Yezu muthwanyuweliye murumiwi Tome kali na awene. Noona anamasunzaya ahimpanga dhahi: ‘Iyo nihimoona Nabuya!’ Mbwenye Tome ohiloga wila ahinathi orumeela onofanyeela omoona Yezu na mento aye. Masiku matanu na mararu musogorhomwa anamasunzaya ali vamodhavi wili mu kambirhinya yofugeya, nanda dila eji Tome oli na awene. Morurumutxa, Yezu ohithwanyuwa kakamwe mu kambirhinyanimwa. Ovanene Tome ohirumeela.
Joau 20:11-29; Lukas 24:13-43.