NIPADDUWO 107
Estevau Onovokedhiwa Myarha
MULOBWANA oddu okokorile apa ddi Estevau. Iyene namasunza wororomeleya wa Yezu. Mbwenye kañgana eji enimpadduwela ovanene! Alobwana aba anonvokedha myarha dhinddimuwa. Awene animwiddela eni vaddiddi Estevau mpaka omukosela elobo eji yowopiha? Ndoweni noone.
Mulugu onomukamihaga Estevau okosa matikiniho owumiha milomo. Alobwana aba kanziveliwa eji, noona awene ahakulana na iyene mwaha wa iyene wasunzihaga athu ebaribari. Mbwenye Mulugu ohinvaha Estevau zelu enddimuwa, nanda Estevau ohilagiha wila alobwana aba anosunzihaga dhilobo dhohikala ebaribari. Eji ehithabwiha oludduwa wawa. Noona awene ahimuthidda, nanda ahatxemerha athu wila aloge dha othambi mwaha wa iyene.
Namakutha munddimuwa ohinvuza Estevau dhahi: ‘Dhilobo esi sa txibarene?’ Estevau ohakula modheela okosa diskursu yaderetu vaddiddi ya mBibiliani. Omagomelo wa diskursu eji, iyene ohapanga mukalelo weddiwe anamavuhula a Yehova na athu abure wale vaddiddi. Mumaleliye ohiloga dhahi: ‘Nyuwo muli ninga alobwana abale txibarene. Nyuwo muhimpa mudhari wa Mulugu Yezu, vina kamwiweleli malamulo a Mulugu.’
Eji ehakosiha asogorheli aba a relijiau oludduwa vaddiddi! Awene ahitakuna meno awa na owali. Mbwenye mumalelani Estevau ohithukulela musorho waye odhulu, nanda ohiloga dhahi: ‘Moone! Ddinomoona Yezu beemelile o mononi wa oja wa Mulugu odhulu.’ Na ejene, alobwana aba ahifuga maru awa na mada nanda ahimulupela Estevau. Awene ahimuthidda nanda ahimbururela otakulu wa sidadi.
Veneva awene ahaarula akapoti awa nanda ahinvaha muzombwe Saulu wila awañganelege. Onomoona Saulu? Mumalelani alobwana ena ahiroma onvokedha myarha Estevau. Estevau ohikokora, ninga munooneliwe, nanda iyene ohilobela wa Mulugu dhahi: ‘Yehova, munasothothe awene sabwa ya elobo eji yabure.’ Iyene ohiziwa yawila ena mwa awene alonyengethiwa na asogorheli a relijiau. Mumalelani Estevau ohikwa.
Muthu agawukosela elobo yabure, weyo onotamela onvoreya momwiyihedha obureya, obe omukumbirha Mulugu wila anvoreye? Kayo ejene yakosile Estevau obe Yezu. Awene aali athu a oderetu masiki na abale aakooddile wakosela oderetu. Ndoweni nitamele ofara yotagiha yawa.