NIPADDUWO 108
Mu Dila Endowa O Damasku
WEYO onomuziwa bani oddu oginantile vati? Oddu ddi Saulu. Kobuwela, ddi oddule wawañganeli akapoti a alobwana abale anvokedhile Estevau myarha. Kañgana txeza ejile eñganimela! Txini empadduwa?
Mumaleli opiwa Estevau, Saulu ohisogorhela watota anamafara a Yezu wila aavoreye. Iyene ohidhowa numba na numba nanda ohabururela otakulu vina ohavolotxa mu kambura. Anamasunza enjiya ahithawela mu sidadi dhiina nanda wenewo ahiroma olaleya “bili yaderetu.” Mbwenye Saulu ohidhowa mu sidadi dhiina wila aafanye anamafara a Yezu. Ovanene iyene oli mu oleddoni waye wa odhowa o Damasku. Mbwenye, mu dila, elobo ya wumiha milomo epadduwile ji eji:
Morurumutxa txeza yovenyedha odhulu ehizerima omuzugunuwa Saulu. Iyene ohigwela vati, ninga munoonelihu apa. Mumalelani lizu nihiloga dhahi: ‘Saulu, Saulu! Onddifarafarela eni?’ Alobwana ali na Saulu ahoona txezaya vina ahiwa oruma wa lizuna, mbwenye awene kannonelamo ejile enlogiwaya.
Saulu ohivuza dhahi: ‘Nabuya nyuwo muli ani?’
Lizuna nihiloga dhahi: ‘Ddili Yezu, oddule onimutotiwe.’ Yezu ologeli eji sabwani Saulu agaatotaga anamafara aye, Yezu oniwa ninga ddi iyenene ontotiwa.
Ovanene Saulu ohivuza dhahi: ‘Nabuya, ddikose eni?’
Yezu ohiloga dhahi: ‘Kavenya nanda ovolowe mu Damasku. Mwenemo onela opangiwa enfanyeeliwe okosa.’ Saulu muvenyeliye nanda bafugula mento aye, iyene kanoona elobo. Ohitweya mento! Noona alobwana ali na iyene ahimuthukula na nlada nanda badhowana mu Damasku.
Ovanene Yezu ohiloga dhahi na mmodha mwa anamasunza aye mu Damasku: ‘Anania, kavenya. Kadhowa o rampani entxemerhiwa Yawogowa. Vatakulu va Yuda onvuzelevo mulobwana ontxemerhiwa Saulu. Ddihimusakula wila akale mudhari waga wa va woka.’
Anania ohiiwelela. Iyene munfanyeliye Saulu, iyene ohimwika mada aye nanda ohiloga dhahi: ‘Nabuya ohiddiruma wila owodhe woona wili nanda odhaale muya wokoddela.’ Venevo elobo yokala ninga makaka ehimotha mmentoni mwa Saulu, nanda iyene ohiwodha woona wili.
Saulu onolabihedhiwa na guru vaddiddi wila aalaleye athu a dhilabo dhinjidhene. Iyene ohidha oziwiwa ninga murumiwi Paulo, oddwene onamusunzihu vaddiddi. Mbwenye voroma, ndoweni noone txini emurumile Mulugu wila Peduru akose.
Merelo 8:1-4; 9:1-20; 22:6-16; 26:8-20.