NIPADDUWO 109
Peduru Ohidhowa Omoona Kornelio
ODDU wimelile apa ddi murumiwi Peduru, nanda abale ali mundduni mwaye ba akwaye ena. Kito mulobwana oddu onimukokorelela eni Peduru? Iyene onofanyeela okosa ejene? Weyo onomuziwa iyeneya bani?
Mulobwana oddu ddi Kornelio. Iyene kazembe wa nikuru na anyakoddo na akudda Roma. Kornelio kanimuziwa Peduru, mbwenye iyene wahipangiwa wila amutxemerhele vatakulu vaye. Ndoweni noone mukalelo wadhile opadduwa eji.
Anamafara ooroma a Yezu aali Ayuda, mbwenye Kornelio kayo Muyuda. Mbwenye onomukwela Mulugu, iyene onolobelaga wa iyene, vina onowakoselaga athu dhilobo dhinji dhaderetu. Dhaene omutana dhahi mungelo ohinfiyedha nanda ahiloga dhahi: ‘Mulugu onoziveliwa na weyo, nanda iyene onfuna aakule malobelo awo. Kaarume alobwana wila amudhowele mulobwana dhahi ontxemerhiwa Peduru. Iyene oli mu Jope vatakulu va Simoni, oddwene onkala waddamana na nyaza.’
Mohigoneela Kornelio oharuma alobwana ena wila anfanye Peduru. Mmangwananimwa, alobwanaya bagafiya waddamana na Jope, Peduru oli mu numba ya mudhulu ya numba ya Simoni. Wenewale Mulugu ohimukosiha Peduru wubuwela ninga onoona guwo enddimuwa ya mutapu bigatita odhulu. Va guwoniva vahikala dhinama dha malogo malogo otene. Mowiwanana na nlamulo na Mulugu, dhinama esi kadhafanyeela ojiwa, mbwenye lizuna nihiloga dhahi: ‘Peduru, kavenya. Kapa oje.’
Peduru ohakula dhahi: ‘Nne! Txipo miyo kaddinajege olobo ehitxenile.’ Mbwenye lizuna nihimpanga Peduru dhahi: ‘Katxelela otxemerha wila jotakala elobo elogile Mulugu ovanene wila jotxena.’ Eji ehipadduwa dila tharu. Oku Peduru bagatikina ejile entapulela esi dhotene, alobwana arumiwe na Kornelio ahifiya vatakulu nanda ahinvuzela Peduru.
Peduru ohititela mutxiddo nanda ohiloga dhahi: ‘Mulobwana onimutamelinyu ddi miyo. Mudheeli eni?’ Alobwana abale mulogelani wila mungelo wahimpanga Kornelio wila amutxemerhele Peduru vatakulu vaye, Peduru ohirumeela odhowa na awene. Mmangwananimwa Peduru na amarho aye ahidhowa omoona Kornelio mu Sezarea.
Kornelio ohagumaniha vamodhavi amudhi vina abale alitxi amarho aye. Peduru mudheeliye, Kornelio ohinfarela. Iyene ohikokora nanda baworomela manyalo a Peduru, ninga munooneliwe apa. Mbwenye Peduru ohiloga dhahi: ‘Kavenya; miyo ddili muthu bahi.’ Indde, Bibilia onolagiha yawila kayo yaderetu omukokorela vina omwebedha muthu. Ninofanyeela omwebedha Yehova bahi.
Ovanene Peduru ohalaleyela abale aagumanihiwe. Peduru ohiloga dhahi: ‘Ddinowoona wila Mulugu anowawakela athu otene anfuna omulaba.’ Nanda iyene bagaloga, Mulugu ohiruma muya waye wokoddela, nanda athuya ahiroma ologa dhilogelo dhothiyana thiyana. Eji ehawumiha milomo anamasunza ali Ayuda abene aadhile na Peduru, sabwani awene oobuwela ninga Mulugu onabona Ayuda bahi. Noona eji ehasunziha wila Mulugu kanawoona athu a nlogo nlogovi ninga akaliletxe obe a makamaka vaddiddi wa Mulugu opitha athu a nlogo niina. Eji kayo elobo yaderetu wila iyo notene nubuwelege?
Merelo 10:1-48; 11:1-18; Ovuhulela 19:10.