NIPADDUWO 116
Niwodhe Dhavi Okalawo Na Mukalakala
WEYO onowodha ologa txini enengesa mwanamuyana oddu muñgono na amarho aye? Indde, thi nivurunene nthi ninengesa weyo—Nivuru Naga Na Mapadduwo A Bibilia. Nanda awene anengesa nipadduwonene nthi ninengesa weyo—“Niwodhe Dhavi Okalawo Na Mukalakala.”
Weyo onoziwa txini ensunzani? Voroma, yawila akala ninela okalawo na mukalakala ninofanyeela omuziwa Yehova na Mwana waye Yezu. Bibilia onloga dhahi: ‘Dila ya okalawo na mukalakala ji eji. Osunza mwaha wa Mulugu mmodha bahi wa ebaribari, vina Mwanaya wamurumiliye velaboni ya vati, Yezu Kristu.’
Niwodhe dhavi osunza mwaha wa Yehova Mulugu na Mwana waye Yezu? Mukalelo mmodha bwa wengesa Nivuru Naga Na Mapadduwo A Bibilia ovenya omaromo mpaka omagomo. Nthi ninologa venjivene mwaha wa Yehova na Yezu, kayo mwenemo? Vina nthi ninologa vaddiddi mwaha wa dhilobo dhikosilani vina dhilobo dhinfunani okosa. Mbwenye ninofanyeela okosa opitha okalela wengesavi nivuru nthi.
Weyo onowoona nivuru ntho niina nili vati? Oddu ddi Bibilia. Kamukumbirhe muthu wila owengeselege dhipaddi dha mBibiliani mpule muthukuliwe mapadduwo a nivuru nthi. Bibilia ononivaha muselu wowakwana onfunihu wila notene niwodhe omulaba Yehova na mukalelo wofanyeelela nanda nigumele egumi yohimala. Noona ninofanyeela okosa okala elemeelelo ya omwengesa Bibilia dila dhinjidhene.
Mbwenye okalela osunzavi mwaha wa Yehova Mulugu na Yezu Kristu kunakwana. Iyo podi okaana eziwelo yinji vaddiddi mwaha wa awene vina masunziho awa, nanda dhaenevi s’ohigumela egumi ya mukalakala. Weyo onoziwa elobo yina enfuneya?
Iyo vina ninofanyeela okalagawo mowiwanana na dhilobo dhisunzilihu. Weyo onomubuwela Yuda Iskarioti? Iyene wali mmodha mwa athu 12 abale aasakulile Yezu wila akale arumiwi aye. Yuda wahikaana eziwelo yinji mwaha wa Yehova na Yezu. Ki yampadduweli txini? Muvireli mudhidhi muñgonovi iyene wahidha okala mukumbela vaye, nanda wahimuguliha Yezu wa amwiddani aye na kobiri dha mijila 30 dha parata. Noona Yuda kanakele egumi yohimala.
Weyo onomubuwela Jeazi, mulobwana oddule omusunzilihu va Nipadduwo 69? Iyene wahifuna othukula dhabalo na kobiri esile dhahali dhaye. Noona iyene wahiloga othambi wila akaane dhilobo esi. Mbwenye Yehova wahimusothotha. Nanda Yehova onela vina onisothotha akala kaniniwelela malamulo aye.
Mbwenye ohikala athu enjene aderetu abene aamulabile Yehova dila dhotene na nroromelo. Iyo ninfuna nikale ninga awene, kayo mwenemo? Samueli muñgono ji yotagiha yaderetu wila nifare. Kobuwela, ninga moonelihu va Nipadduwo 55, iyene wana vyaka nai obe tanu bahi dha obaaliwa mwaromeliye omulaba Yehova va tabernakulu yaye. Noona peno weyo oli muzombwe wa saizi gani, weyo kulitxi muzombwe muñgono vaddiddi wohiwodha omulaba Yehova.
Txibarene, muthu onfuna iyo notene onfara ddi Yezu Kristu. Masiki iyene bali mwanamulobwana, ninga mulagihedhiwani va Nipadduwo 87, iyene wali mu mparhani bagaloga na athu ena mwaha wa Babi waye wa odhulu. Ndoweni nifare yotagiha yaye. Ndoweni naapangegeni athu enjene anwodhihu wapanga mwaha wa Mulugu wehu wotikiniha Yehova vina Mwana waye, Yezu Kristu. Nigakosaga dhilobo esi, dhaene ninela owodha okalawo na mukalakala velaboni ya vati mparaizu muswa wa Mulugu.
Joau 17:3; Salmo 145:1-21.