Nsunzo 2

Mulugu Bani?

Mulugu webariribari bani vina nzina naye thivi? (1, 2)

Mukalelo gani wa maningo ana iyene? (3)

Mikalelo dhaye dhamakamaka sivi? (4)

Ninofanyela othukula dhilobo dhosema na dhizinddielo wi nimulabele? (5)

Makalelo gani meli anawodhihuna osunza elobo yodhela wa Mulugu? (6)

1. Athu anolabela dhilobo dhinjidhene. Mbwenye Bibilia ononaddela wi Mulugu WEBARIBARI oli mmodha bahi. Iyene osasanya dhotene dhili odhulu na vati. Na sabwa yonivaha egumi, iyene ddili wene Mmodha onfanyela iyo omulabela.—1 Korinto 8:5, 6; Ovuhulela 4:11.

2. Mulugu ohikana mazina menjene, mbwenye nimodha bahi thili na txibarene. Nzinana ddi YEHOVA. Mmabibiliani menjene, nzina na Mulugu niburutxiwamo ekilemo mazina abuwene anloga NABUYA obe MULUGU. Mbwenye vamaleli olebiwa Bibilia, nzina nthi Yehova nahikalamo muthengo wowakwanela 7.000!—Obudduwa 3:15; Salmo 83:18.

3. Yehova ohikana maningo, mbwenye kayo ninga ehu. “Mulugu Muya”, onloga ddi Bibilia. (Joau 4:24) Muya mukalelo wa egumi munddimuwa vaddiddi opitha wehu. Kawo muthu amaningo amonilege Mulugu. Yehova onkala odhulu, mbwenye iyene onowodha wona dhotene. (Salmo 11:4, 5; Joau 1:18) Koddi, ngani, muya wokoddela txini? Kayo muthu woligana na Mulugu. Othiya ejo, si guru dholiba dha Mulugu.—Salmo 104:30.

4. Bibilia onononiya omuthu wa Yehova. Onolagiya wi mikalelo dhaye dhamakamaka okwela, oligana, eziwelo na owodha. (Deuteronomo 32:4; Jobi 12:13; Izaia 40:26; 1 Joau 4:8) Bibilia ononipanga wi iyene vina dda thagaraga, owazuzumela akwaye, olevelela, ovaha vina ovilela. Hyo, ninga ana owiwelela, ninofanyela oveda omutagiha.—Efeso 5:1, 2.

5. Ninofanyela oworoma vamentoni va dhilobo dhosema, dhirugu obe dhizinddielo, obe olobelela mmalabeloni mwehu? Ne! (Obudduwa 20:4, 5) Yehova onloga wi ninofanyela omulabela iyene bahi, sabwani iyene kana nthithimiho nowiwanana na muthu mwina ne elobo eli yotene. Dhilobo dhosema kadhina guru wi dhinikamihedhe.—Salmo 115:4-8; Izaia 42:8.

6. Ninafiye dhavi omuziwa Mulugu mofanyelela? Mukalelo mmodha bowañgana na ofaseya dhilobo dhithanddilie na otanalela vopitha mwa dhinilagihani. Dhothanda dha Mulugu dhinonlagiha wi iyene ohikana owodha onddimuwa vina eziwelo. Ninowona okwela waye mwa dhotene dhithanddileye. (Salmo 19:1-6; Roma 1:20) Mukalelo mwina wosunza elobo yodhela wa Mulugu omusunza Bibilia. Mwenemo iyene ononaddela vaddiddi mwaha wa mukalelo wa Mulugu oli iyene. Ononipanga vina mwaha wa efunelo yaye vina enfuniye wi iyo nikose.—Amós 3:7; 2 Timoteo 3:16, 17.

[Mafoto vanikukuni 5]

Ninosunza wa dhothanddiwa vina na Bibilia elobo sabwa ya Mulugu