Nsunzo 9
Adhari A Mulugu Anofanyela Okala Apama Vina Otxena
Ninfanyelelani okala apama na otxena mmikaleloni dhotene? (1)
Entapulelani okala apama na otxena mmukalelo womuzimuni? (2)
na mweddelo? (3) na yubuwelo? (4) vina omaningoni? (5)
Makani gani abure anfanyelihu orabela? (6)
1. Yehova Mulugu ddapama vina ddokoddela. Iyene onjedhela wi alabeli aye akalevi apama vina otxena na mukalelo womuzimuni, mweddelo, mwa yubuwelo na omaningoni. (1 Peduru 1:16) Okalavi na opama vamentoni va Mulugu enofuna okosa guru yatxibarene. Ninkala mwilaboni motakala. Vina ninofanyela owana na dhifunelo dhehu dhokosa eli yabure. Mbwenye nineyelele wene mundduni.
2. Opama Womuzimuni: Akala ninofuna nimulabele Yehova, kaninfanyela ovithiddeliha na masunziho na merelo a religiau ya othambi. Ninofanyela obudduwamo mu religiau ya othambi vina n’nakamyedhe na mukalelo oli wotene. (2 Korinto 6:14-18; Ovuhulela 18:4) Nigamala osunza ebaribari ya Mulugu, ninofanyela wedda polepole wi ninanyengethiwe na abale ansunziha dhothambi.—2 Joau 10, 11.
3. Opama Wa Mweddelo: Yehova onfuna wi alabeli aye eddege ninga akristu ebaribari mudhidhi wotene. (1 Peduru 2:12) Iyene onowona dhotedhene dhinkosihu, masiki dhigakosiwaga vina moviteiani. (Aebreo 4:13) Ninofanyela orabela oraruwa na makoselo mena otakala a elabo eji.—1 Korinto 6:9-11.
4. Opama Wa Yubuwelo: Nigadhaliya musorho wehu na dhubuwelo dhotxena vina dhapama, mweddelo wehu onokala vina wapama. (Filipi 4:8) Mbwenye nigakala owubuwelavi mwa dhilobo dhotakala ningomela okosa dhilobo dhabure. (Mateus 15:18-20) Ninofanyela orabela makalelo ovega anfiyedha onyonga mubuwelo wehu. Ninowodha odhaliya musorho na dhubuwelo dhapama n’osunza Nzu na Mulugu.
5. Oyesa Wamaningo: Vowi akristu animwimelela Mulugu, awene anofanyela okala okoddela maningo na yabalo. Ninofanyela onawa mada nigamala opothowela oponddo vina ninofanyela onawa nihinathi oja obe nihinathi osasanya dhoja. Akala vatakulu kavali mwego mopothowela, dhilobodha dhilege otibeliwa. (Deuteronomo 23:12, 13) Okala wotxena maningo onokamyedha okana egumi yapama. Murala wa mukristu onofuneya wi okale wowañganea vina wokoddela, otakulo vina na mwari. Onofanyela woneya ninga esazo yapama vamuruddani.
6. Makani Apama: Adhari a Mulugu anofanyela mudhidhi wotene ologa ebaribari. Aliba othambi kanavolowe mu Omwene wa Mulugu. (Efeso 4:25; Ovuhulela 21:8) Akristu kana mulogelo wohufanyelela. Kanvuruwana ne ologa kasuwada dhoruwana obe gahala dhotakala. Sabwa ya makani awa apama omabasani obe oskola, ninga vina va anamwanddamani, anowoneya ninga othiyana.—Efeso 4:29, 31; 5:3.
[Mafoto vanikukuni 18, 19]
Adhari a Mulugu anofanyela okala apama vina otxena mwa mikalelo dhotene