Nsunzo 11

Malabelo Na Meddelo Animusilidha Mulugu

Malabelo gani na meddeloya ali otakala? (1)

Akristu anofanyela orumela wi Mulugu ddi Oraru? (2)

Sabwa yani akristu ebaribari kanimuja Natali, Paskwa ovanene, ne mathanga a siku nobaliwa? (3, 4)

Abale akwile anowodha watabutxa abale aliwo? (5) Yezu okwile vamwigimanyoni? (6) Ekalelini yofuneya omulabela Mulugu? (7)

1. Kayo wila malabelo na meddelo ali otene botakala. Mbwenye Mulugu kanrumelela akala andela wa religiau ya othambi obe agakala ohiwanana na masunziho mena a Bibilia.—Mateus 15:6.

2. Oraru: Ddi Yehova Oraru—athu araru mwa Mulugu mmodha bahi? Ne! Yehova, Baba, ddili “Mulugu mmodha webaribari”. (Joau 17:3; Markos 12:29) Yezu ddi Mwana Waye woroma vina oli womwiwelela Mulugu. (1 Korinto 11:3) Baba ddi munddimuwa opitha Mwana. (Joau 14:28) Muya wokoddela kayo muthu; ji guru yovadda ya Mulugu.—Wita 1:2; Merelo 2:18.

3. Natali Na Paskwa: Yezu kabaliwe mu 25 ya Dezembro. Iyene obaliwe mowakwanela 1 ya Outubro, mudhidhi wa yaka wathiya akumbuzi makuru awa vatamuni, na mathiyu. (Lukas 2:8-12) Yezu txipo kanarumege wi akristu agumanelege mathanga obaliwa waye. Othiya eji, warumile wi agumanelege obe obuwelege okwa waye. (Lukas 22:19, 20) Natali na meddihedhoya dhipadduwile wa mareligiau awale othambi. Yakakene enopadduwa na meddihedho ovanene antxemeriwa Paskwa, ninga othukula mazai na anamarogolo. Akristu oroma kamugumanela ne Natali, ne Paskwa addabuno, newene vañgono ovanene akristu ebaribari kankosa vina.

4. Mathanga A Siku Nobaliwa: Mathanga obaliwa meli bahi anlogiwa Mbibiliani ali a athu akodda omulabela Yehova. (Wita 40:20-22; Markos 6:21, 22, 24-27) Akristu oroma kagumanela mathanga a siku nobaliwa wa muthu. Mweddelo wogumanela mabaliwo apadduwile mwa mareligiau othambi awale. Akristu a ebaribari anothuva mivaho vina anovega vamodhavi midhidhi dhina dha yaka.

5. Wawova Akwile: Abale akwile kanwodha okosa ne wiwa elobo eli yotene. Kaninwodha wakamyedha, ne awene kannitabutxa. (Salmo 146:4; Eklesiaste 9:5, 10) Muzimu onokwa; kunkalaovi muthu bamalile okwa. (Ezekieli 18:4) Mbwenye mudhidhi mwina angelo abure, antxemeriwa mademonio, anovikosiha okala mizimu dha abale akwile. Meddelo owiwanana na wawova obe walabela abale akwile babure.—Izaia 8:19.

6. Mwigimanyo: Yezu kakwile vamwigimanyoni. Iyene okwile vamurini, obe pingirizi. Nzu na egrego, nintapuleliwa “mwigimanyo” Mmabibiliani menjene, ninaddana bahi ntxikwa. Ezinddielo ya mwigimanyo endana wa mareligiau awale othambi. Akristu oroma kathiddiedha mabasa ne webedha mwigimanyo. Mwa dhaene, weyo onona ninga jofanyela okana mwigimanyo mmalabeloni?—Deuteronomo 7:26; 1 Korinto 10:14.

7. Poddi okala yorutxa vaddiddi othiya gano esi na meddeloya. Amudhi na amarho mudhidhi mwina anoveda wunyengetha wi onasaddule dholabela dhawo. Mbwenye dhaene, omuziveliha Mulugu jamakamaka opitha waziveliha athu.—Vimarya 29:25; Mateus 10:36, 37.

[Foto vanikukuni 22]

Mulugu kayo Oraru

[Foto vanikukuni 23]

Natali na Paskwa ovanene andana wa mareligiau awale othambi

[Foto vanikukuni 23]

Kuli sabwa eli yotene wila nalabele akwile obe wawova awene