Kapitulu Kumi
Omwene ‘Txipo Ohinadhe Otolotxiwa’
1. Ebaribari gani enoonihiwa deretu na mapadduwo a mwilaboni mwari mwa okalawo wa nlogo na athu?
KADDA siku mapadduwo a mwilaboni anowooniha vaddiddi thangwi yawila athu kagumeli osanzaya, sabwa ya okoodda olamulela onddimuwa wa Yehova vina sabwa ya otamela ovilamulela anya. Kuli nlamulelo na muthu nthene nidheelina nlogo na athu dhilobo dhaderetu s’ohikaana nsakulano. Masiki athu venjivihilani eziwelo yawa ya siensia opitha wale, awene kanwodhaga ogonjiha maredda obe ogomiha okwa, masiki okwa wa muthu mmodha bahi. Olamulela wa athu kugomihile koddo, otimbwini, opanga, dhovirigana, obe oyelega. Malamulelo a otabala anowanyigalavi athu mu dhilabo dhinjidhene. (Kohelét 8:9) Tekinolojiya, nrima, vina nipwazo, dhotene esi dhinotakaliha elabo, manje, vina muya onvumiwa. Olabihedha yuma na mukalelo wabure okwene onkosiwa na asogorheli, onowarutxiha athu enjene ogumela dhofuneya dha egumi. Vyaka matxikwi na matxikwi dha olamulela wa athu ohooniha wila mazu aba ba ebaribari: “Muthu kaye mwinya w’okalawo waye, kanwodha opima yeka tharho dhaye.”—Jeremiya 10:23.
2. Txini eli yowakula modha bahi ya makathamiho a nlogo na athu?
2 Yowakulaya jivi? Bu Omwene wa Mulugu, obwene wasunzihile Yezu anamafara aye olobelelaga dhahi: “Omwene wenyu odhele iyo, ofuna wenyu okosiwege vati apano ninga odhulu.” (Mateu 6:9, 10) Omwene wa odhulu wa Mulugu onlogiwa va 2 Pedro 3:13 ninga ‘erimu eswa,’ obwene onfuna olamulela ‘elabo eswa,’ nthi, thi nikuru noligana na athu owiwanana. Omwene wa odhulu wa Mulugu bwa makamaka vaddiddi mpaka Yezu othukulela vadhulu mu olaleyani mwaye. (Mateu 4:17) Iyene wahilagiha mburo ogafanyeeli okaana Omwene mwigumini yehu, bagakokomeza dhahi: “Tamelaní voroma Omwene wa Mulugu na wira enfuna iyene.”—Mateu 6:33.
3. Osunza mwaha wa Omwene wa Mulugu okaleli eni wa omaguva vaddiddi ovanene?
3 Osunza mwaha wa Omwene wa Mulugu kwa omaguva vaddiddi ovanene, sabwani mohigoneela omwene obu onela okosa elobo wila osaddule na mukalakala malamulelo a elabo ya vati. Daniyel 2:44 wahithaga ologa dhahi: “Nsaka ninathongege amwene aba [malamulelo anlamulela ovanene] Mulugu w’odhulu onere wita omwene [odhulu] ohinamale-wene ohinawodheye na malogo mena [athu kanalamulele viina elabo ya vati]. Omwene obu onere otolotxa-wene omwene mwina wotene [wa ovanene], onere ogonela okala n’okala-wene.” Dhaene, Omwene onela ogomiha masiku aba oomariha modheela otolotxa elabo eji yotene yabure. Venevo, Omwene wa odhulu bahi bunalamulelege elabo ya vati. Ninofanyeela otamaalela vaddiddi sabwani ovanene nifuruleyo ninfuna odhana ejene nili vakukuvi vaddiddi!
4. Mowiwanana na Omwene, txini epadduwile odhulu yaka ya 1914, ki eji ekaleli eni ya makamaka wa iyo?
4 Yaka ya 1914, Kristu Yezu wahikiwa va mpaddoni ninga Mwene vina wahirumiwa wila ‘aapuranye amwiddani aye.’ (Masalmo 110:1, 2) Vina yaka ejile, aahiroma “masaka omariha” a elabo eji yabure. (2 Timóteo 3:1-5, 13) Mudhidhi wakakene, mapadduwo oonile Daniyel mu yowoona ya nivuhulo aahikoseya txibarene odhulu. ‘Kalaba wa Masiku,’ [NM] Yehova Mulugu, wahinvaha Mwana muthu, Yezu Kristu, “omwinya wothonga, nthithimiho, omwene. Athu a malogo etene, a vilabo dhetedhene, a vilogelo dhetedhene animurumela iyene.” Bagalogamo yowoonaya, Daniyel wahileba: “Omwinya waye onodhowavi, omwene waye kunatolotxiwe-wene.” (Daniyel 7:13, 14) Modheela othiddihedha mabasa Omwene obu wa odhulu mmadani mwa Kristu Yezu, Mulugu onela wawodhiha anamakwela oligana ojavo dhilobo dhaderetu dhohengeseya esene dhafuniliye mudhidhi wawikiliye ababi ehu ooroma Mparaizu.
5. Dhitagano gani dha Omwene dhinfanyeelihu ozuzumela vaddiddi, nanda sabwa yani?
5 Weyo onofuna okala mulamuleliwi wororomeleya wa Omwene? Akala onofuna, weyo onela oziveliwa vaddiddi waziwa alamuleli a nlamulelo na odhulu vina mulabeloya wa nlamulelo nthi na odhulu. Weyo onela ofuna oziwa txini enkosa omwene obu ovanene, ejile enfunani okosa musogorho, vina ejile enfunani wila weyo okosege. Venevo vampepesiwe Omwene obu na ofwaseya vaddiddi, weyo onela otamaalela vaddiddi. Akala weyo onorumeelela olamulelawa, weyo onela owodha deretu wapanga athu ena mwaha wa dhilobo dhotikiniha dhinfuna okosela Omwene wa Mulugu nlogo na athu aniwelela.—Masalmo 48:12, 13.
Alamuleli A Omwene Wa Mulugu
6. (a) Malebo animutonya dhavi mwinyaya wa olamulela onddimuwa okwene onkosiwa modheela Omwene wa Mesiya? (b) Esile dhinsunzihu mwaha wa Omwene dhinfanyeela onipakela dhavi?
6 Modha mwa dhilobo dhoroma dhinlagiha opepesa oku, jawila Omwene obu wa Mesiya bu mulagiho wa olamulela onddimuwa wa Yehova. Ddi Yehova onvahile Mwana waye “omwinya wothonga, nthithimiho, omwene.” Mumaleli wikiwa Mwana Mulugu vampaddoni wila arome olamulela ninga Mwene, lizu nowiweya odhulu nahiloga mofanyeela: “Weddiha elabo oli mmadani mwa Mulugu wehu [Yehova], vina mwa Muthikitheliwi waye, [Yehova] onathonge masaka otene.” (Ovuhulela 11:15) Noona dhilobo dhotene dhinoonihu mwaha wa Omwene obu vina esile dhinkosani, podi onaddamaniha na Yehova. Ejile ensunzihu enofanyeela wika mmirimani mwehu efunelo ya wiwelela olamulela waye onddimuwa na mukalakala.
7. Ekaleli eni ya makamaka wa iyo yawila Yezu Kristu ddi Mulamuleli wa Nawili wa Yehova?
7 Koona vina, yawila Yehova ohimwika Yezu Kristu va mpaddoni wila akale Mulamuleli waye wa Nawili. Ninga Mesirhi wa Mabasa oddwene omulabihedhi Mulugu mudhidhi wakosiye elabo ya vati vamodha na athuya, Yezu onoziwa deretu dhofuna dhehu opitha muthu muthuvi wa iyo. Mowenjedhedha, ovenya omaromo wa okalawo wa nlogo na athu, iyene ohilagiha ‘oziveliwa waye na nlogo na athu.’ (Gano dh’olelana 8:30, 31; Kolosi 1:15-17) Iyene ohikwela vaddiddi nlogo na athu mpaka odha velaboni ya vati vina operheka egumi yaye ninga mukutho mwa oderetu wehu. (Joau 3:16) Dhaene iyene wahinisasanyedhela dila ya woboliwa mu othegani vina mu okwani vina wila nikaane gari ya egumi ya mukalakala.—Mateu 20:28.
8. (a) Mothiyana na alamuleli a athu, Omwene wa Mulugu onfunela eni ogoneela? (b) Wandana gani ona “mwimeleli wororomeleya, wamalago” na nlamulelo na odhulu?
8 Omwene wa Mulugu nlamulelo nihinsadduwa vina ningoneela. Ogoneelawa wa nlamulelo nthi onthiddeeleya na sabwa yawila Yehova kankwa. (Habakuk 1:12) Mothiyana na amwene a athu, Yezu Kristu, oddwene ovahiwe olamulela na Mulugu, iyene vina kankwa. (Roma 6:9; 1 Timóteo 6:15, 16) Athu ena 144.000 abene ali adhari oororomeleya a Mulugu a “mahimo etene, a vilogelo dhetene, a malogo na vilabo dhetene” anela ogilati na Kristu mmipaddoni dha odhulu. Abene vina anovahiwa egumi ehinkwa. (Ovuhulela 5:9, 10; 14:1-4; 1 Korinto 15:42-44, 53) Enjiya mwa abene ahimala odhowa odhulu, nanda abale ahalilevo velaboni ya vati, bankosa nikuru nili “mwimeleli wororomeleya, wamalago” nthene ninenjedha dhilobo dha Omwene nsaka na ovanene, velaboni ya vati apano.—Mateu 24:45-47.
9, 10. (a) Mapakelo gani a magawano, a dhilobo dhovirigana esene dhinfuna ogomiha Omwene? (b) Akala kaninfuna okala amwiddani a Omwene wa Mulugu, wandana gani onfanyeelihu orabela?
9 Mohigoneela, mmudhidhinimwa mwaye, Yehova onela oruma makuru aye a opa wila alabe mwa okuputha elabo ya vati. Awene anela watolotxa athu abene asakulile okoodda wiwelela olamulela waye onddimuwa vina abene ambedda masasanyedho aye a okwela abene akosiliye modheela Yezu Kristu. (2 Tesalónika 1:6-9) Ntho ninakale siku na Yehova, nthene ninjikiriwa oromana wale vaddiddi wila Olamulela waye Onddimuwa wa Elabo Yotene wiyihedhiwe. “Mone: siku nawopiha, n’owali onddimuwa nindha Nabuya, nifiya wi, . . . átolotxe athegiyámo.” (Izaiya 13:9) “Ninakale siku n’owali, n’owawa onddimuwa, siku n’otolotxa kakamwene, siku n’eddima-ddima-gò, siku noriba na mirabo dhokwiddima.”—Sofoniya 1:15.
10 Relijiau dhotene dhihili dha ebaribari vina malamulelo otene a athu, vamodha na makuruya awa a anyakoddo, abene ampeliwa malago na mulamuleli wa elabo eji oddwene ohinooneya, anela otolotxiwa na mukalakala. Otene abale anandana na elabo eji modheela otamelaga egumi ya ovihagalalihaga wamwinya, ogongomwa, mukalelo wonyakuwa wa okalawo anela otolotxiwa. Satana na adomonyo aye anela oburutxiwavo wila ahigumanege na athu ankala velaboni ya vati, bafugeliwa deretu mpaka vyaka txikwi. Vasogorhova Omwene wa Mulugu onelege olamulela kakamwe dhilobo dhotene dha elabo ya vati. Oku onela okala woboleya vaddiddi wa athu otene ankwela dholigana!—Ovuhulela 18:21, 24; 19:11-16, 19-21; 20:1, 2.
Dhofuna Dha Omwene—Mukalelo Onsorihiwani
11. (a) Omwene wa Mesiya onasorihe dhavi efunelo ya Yehova na elabo ya vati? (b) Olamulela wa Omwene onatapulele eni wa athu anfuna okalaga velaboni ya vati?
11 Omwene wa Mesiya onela osoriha kakamwe efunelo yoroma ya Mulugu na elabo ya vati. (Wita 1:28; 2:8, 9, 15) Mpaka ovanene, nlogo na athu nihijomba okamihedha wila efunelo eji esoriheye. Mwa dhaene, “elabo eji enadhe” enela omwiwelela Mwana muthu, Yezu Kristu. Otene abale anaviluwe othonga wa Yehova mwilaboni eji yowuluvala, anela olaba mowiwanana mutxiddo mwa Mwene Kristu, na ohagalala bagakosa elobo ji elobo enruma iyene, wila elabo yotene ya vati ekale paraizu. (Ahebreu 2:5-9) Nlogo notene na athu ninela ojavo mabasa a mada awa vina anela opuramo mowakwanela winjiva wa misapo dhimbaala elabo ya vati.—Masalmo 72:1, 7, 8, 16-19; Izaiya 65:21, 22.
12. Wakwana wa mubuwelo vina maningo onakalihiwewo dhavi, wa alamuleliwi a Omwene?
12 Adamu na Eva mwathanddeliwani, awene aali owakwana, nanda efunelo ya Mulugu yali yawila elabo ya vati edhaale na ana awa, otene akaane mubuwelo vina maningo owakwana. Efunelo eji enela osoriheya na nthithimiho vaddiddi mutxiddo mwa olamulela wa Omwene. Wila ewodheye, enela ofuneya wila dhotene esile dhitotiwe na yothega dhigomihiwe, nanda wila ejene ekoseye, Kristu kankalela olabavi ninga Mwene, mbwenye vina ninga Namakutha Munddimuwa. Na ovilela, iyene onela wakamiha alamuleliwi aye aniwelela wila apuremo thima ya okuputha dhothega ya mukutho wa egumi yaye ya omuthu.
13. Dhopuramo gani dha omaningoni dhinakosiwe mutxiddo mwa olamulela wa Omwene?
13 Mutxiddo mwa olamulela wa Omwene, anamakala velaboni ya vati anela opuramo matikiniho a omaningoni. “Siku-ntho mento a aliba ohona anere ofuguwa, aliba ohiwa anere wiwa, akwethenkwe anere othamaga ninga nahe; muliba ohiloga onerokuwa n’othaba.” (Izaiya 35:5, 6) Maningo amalile okaana makunyari sabwa ya wuluvala obe sabwa ya oredda anela ofewa opitha a mwana muñgono, vina wobana ohingoma onela otxinjiwa na egumi yoliba. “Venevo mureddayá onothidda padda, onokala ninga mwaliye.” (Job 33:25) Ninela ofiya siku nihinakalewo muthu ona sabwa ya ologa dhahi: “Miyo ddili muredda.” Sabwa yani? Sabwani athu animova Mulugu anela oruliwa muthorho wa othega vamodha na dhowireyadha dhineeddiha thagaraga. (Izaiya 33:24; Luka 13:11-13) Indde, Mulugu “oner’okuputha muntori bu muntori wa mmentoni mwawa. Dhamwilaboni yawale dhivira.”—Ovuhulela 21:4.
14. Txini entaganyiheya na okala athu ooligana?
14 Mwa dhaene, ogumela wakwana kayo okalela okaanavi maningo na mubuwelo waderetu. Onotaganyiheya na olagiha mikalelo dha Yehova mofanyeela, vowila iyo nithanddiwe mu ‘nladdaniho na Mulugu, mowiwanana na kove yaye.’ (Wita 1:26) Wila ejene ekoseye, vanela ofuneya nlelo vaddiddi. Mwilaboni eswa, “muneddege dhetedhene ninga munfuneliye.” Dhaene ninga mwabazedhi ologa Izaiya “elabo na athuyámo, panasunzani enafunana nyuwo.” (2 Pedro 3:13; Izaiya 26:9) Osunza ennifunana Mulugu onovaha murenddele, vari va athu a malogo otene, vari va athu ankwelana, va muralani va muthu, nanda yaderetuya vaddiddi, na mwinyene Mulugu. (Masalmo 85:10-13; Izaiya 32:17) Abale ansunza enafunana Mulugu anela oleliwa vañgono vañgono na ejile enafunana Mulugu. Agamukwela vaddiddi Yehova mmirimani mwawa, anela ofara dila dhaye mu dhipaddi dhotene dha egumi yawa. Awene anela owodha ologa ninga mwalogeli Yezu, ‘mudhidhi wotene ddinkosa dhilobo dhinimuhagalaliha Babi waga.’ (Joau 8:29) Dhilobo dhigakala dhaene vamentoni va nlogo na athu egumi enela ohagalaliha vaddiddi!
Esile Dhimalilani Osoriha
15. Bugalabihedha mavuzo a ddima eji, karomola esile dhimalile osoriha Omwene vina kalagiha esile dhinfanyeelihu okosaga ovanene apa.
15 Dhilobo dhotikiniha esene dhimalile osoriha Omwene wa Mulugu vamodha na alamuleliwiya a Omwene obu anowooneya. Mavuzo na malebo anfarela anela wuwubutxedha dhilobo dhiina dhimalile osoriheya, vamodha na dhilobo esene dhinfanyeela okosaga alamuleliwi otene a Omwene obo vina dhilobo dhinawodhani okosa ovanene apa.
Voroma Omwene owanile na ani, ki txini yapadduwile? (Ovuhulela 12:7-10, 12)
Ogumanihiwa wa athu oohalavo a nikuru gani okwene onkoseya oromana mudhidhi wekiwe Kristu va mpaddoni? (Ovuhulela 14:1-3)
Mabasa gani abene abazile ologa Yezu wila iyene agahikosa goi enddimuwa egaroma, ninga mulebeliwani va Mateu 25:31-33?
Mabasa gani ooroma abene ankosiwa ovanene apa? Ki bani anthidda mabasa aba? (Masalmo 110:3; Mateu 24:14; Ovuhulela 14:6, 7)
Sabwa yani anyapolitika vamodha na anyarelijiau oopambiha kanwodhaga ogomiha mabasa aba a olaleya? (Zakariya 4:6; Merelo 5:38, 39)
Dhigumi dha abale aniwelela olamulela wa Omwene dhisadduwile dhavi? (Izaiya 2:4; 1 Korinto 6:9-11)
Omwene Wa Vyaka Txikwi
16. (a) Yezu onalamulele na mudhidhi mungasi? (b) Dhilobo gani dhotikiniha dhinfuna okosiwa mwari mwa mudhidhi obo vina munddunimwa?
16 Satana vamodha na adomonyo aye agamala ofugeliwa mmuti, Yezu Kristu vamodha na anamakela Omwene aye 144.000 anela olamulela ninga amwene vina anamakutha mpaka vyaka txikwi. (Ovuhulela 20:6) Mwari mwa mudhidhi obo, nlogo na athu ninela okala nowakwana, sabwani dabi vina okwa odhile wa Adamu dhinakale badhigomihiwe na mukalakala. Omagomo wa Olamulela wa vyaka eso Txikwi, venevo Yezu bamalile othidda deretu mabasa aye ninga Mwene vina Namakutha Mesiya, iyene “onoperheka omwene” mmadani mwa Babi waye, “dhahene Mulugu oner’okala mwinya wa etene na dhetene.” (1 Korinto 15:24-28) Mudhidhene obo Satana onela ofuguleliwa mwari mwa mudhidhi muñgonovi wila ehe nlogo na athu nimalile woboliwa wila oone akala anokamihedha olamulela onddimuwa wa Yehova wa elabo yotene. Yoweha eji yogomihedha egamala, Yehova onela omutolotxa Satana vamodha na anamavanya akwaye abene athegile na iyene. (Ovuhulela 20:7-10) Abale anakamihedhe olamulela onddimuwa wa Yehova, kuloga wila olamulela waye wofanyeela, anakale bamalile olagiha wila awene ahiroromeleya kakamwe. Venevo anela okaana omarho wofiyedhana na Yehova. Yehova onela wawakela ninga ana aye a alobwana na ayana, vina onela wathiya wila akaane egumi ya mukalakala.—Roma 8:21.
17. (a) Txini enapadduwele Omwene omagomo wa vyaka txikwi? (b) Na mukalelo gani oli ebaribari wila Omwene “kunatolotxiwe-wene”?
17 Dhaene mabasa a Yezu vina a 144.000 owiwanana na elabo ya vati anela osadduwa. Ki musogorho mabasa awa anakale avi? Bibilia kanloga. Mbwenye akala ninokamihedha mororomeleya olamulela onddimuwa wa Yehova, ninela okalawo omagomo wa Omwene wa Vyaka Txikwi wila noone esile dhaafunilena Yehova vamodha na dhothanddiwa dhaye dhotikiniha. Na dhaenevi, olamulela wa Kristu wa Vyaka Txikwi onela ‘odhowavi’ vina Omwene waye “kunatolotxiwe-wene.” (Daniyel 7:14) Na mukalelo gani? Mukaleloya mmodha bwawila, mpaddo wolamulela kunavahiwe athu ena abene ana mubuwelo wothiyana, sabwani Yehova ddinakale Mulamuleliya. Vina Omwene obu, ‘kunamale-wene’ sabwani dhilobo dhinfunani osoriha dhinela okalawo na mukalakala. (Daniyel 2:44) Nanda Mwene vina Namakutha Mesiya vamodha na alamuleli vina anamakutha akwaye anela othithimihiwa na mukalakala sabwa ya mabasa awa oororomeleya vamentoni va Yehova.
Osakulela
• Omwene wa Mulugu okaleli eni yowakula modha bahi ya ogomihana makathamiho a nlogo na athu? Mwene wa Omwene wa Mulugu oromile olamulela mudhidhi gani?
• Elobo gani enuhagalaliha yowiwanana na Omwene wa Mulugu vamodha na esile dhinfunani okosa?
• Dhilobo gani dhisorihile Omwene esene dhinoonihu ovanene, ki iyo nina epaddi gani mwa esene?
[Foto vanikukuni 92, 93]
Omwene wa Mulugu ogalamulelaga, athu otene anela osunza esile dhinafunana Mulugu