Kapitulu Kumi Na Tanu Na Nai
Kalaleyaga Nzu Na Mulugu S’ohova Elo
1. (a) Bili gani yaderetu yalaleya anamasunza a Yezu, mbwenye Ayuda ena akosile eni? (b) Mavuzo gani anfanyeelihu okosa?
OTHAMAGELA vyaka 2.000 mundduni, Yezu Kristu Mwana Mulugu, wahithikitheliwa ninga oddule wafuna okala Mwene wa velaboni yotene ya vati. Yezu wahipiwa sabwa ya otujela wa amwiddani a relijiau, mbwenye Yehova wahinvenyiha mu okwani. Dhaene, egumi ya mukalakala enowodheya modheela Yezu. Mwa dhaene, anamasunza a Yezu valaleyani bili eji yaderetu, wahitatamuwa ofarafariwa. Anamasunza ena ahifugeliwa mu kambura, mpaka owasuliwa vina orumiwa wila atxelele olaleya mwaha wa Yezu. (Merelo 4:1-3, 17; 5:17, 18, 40) Awene agaakosile eni? Weyo ogakosile eni? Ogahiwodha olaleyagavi s’ohova elo?
2. (a) Miselu gani dhaderetu vaddiddi dhinfanyeela olaleyiwa nsaka nehu? (b) Bani ana mabasa a olaleya bili yaderetu?
2 Yaka ya 1914 Yezu Kristu, Mwene wa Omwene wa Mulugu wahikiwa va mpaddoni odhulu wila alamulelege ‘vari va amwiddani aye.’ (Masalmo 110:2) Vasogorhova, Satana na adomonyo aye ahivokedhiwa velaboni ya vati. (Ovuhulela 12:1-5, 7-12) Venevo ahiroma masiku oomariha a elabo eji yabure ya ovanene. Nsaka nthi nigagoma, Mulugu onela otolotxa elabo yotene ya Satana. (Daniyel 2:44; Mateu 24:21) Abale anavuneye anela okaana njeedhelo na okalawo na mukalalaka velaboni ya vati ejene enfuna okala paraizu. Akala weyo ohakela bili eji yaderetu, onela ofuna walaleya athu ena. (Mateu 24:14) Mbwenye onfanyeela ojeedhela wila athu anakulele dhavi?
3. (a) Athu antanaala dhavi muselu wa Omwene? (b) Nivuzo gani ninfanyeelihu wakula?
3 Ogalaleyaga bili yaderetu ya Omwene, athu ena anela otanaala, mbwenye enjiya kanatanaale. (Mateu 24:37-39) Txino ena anela wubedda obe wupambiha. Yezu wahibaza ologa wila opambiha ogabudduwile mwari mwa amudhi ehu. (Luka 21:16-19) Podi vina otatamuwa omabasani wawo obe oskola. Mu dhipaddi dhiina dha elabo ya vati, mabasa a Anamoona a Yehova ahimetxiwa na nlamulelo. Ogafanyiwa makathamiho ninga abene, onela olaleyagavi nzu na Mulugu s’ohova elo nanda ‘bukala wovikomene munroromeloni?’—1 Korinto 16:13.
Kaninkuluvela Guru Dhehu
4. (a) Wila nilagihe yawila nili adhari oororomeleya a Mulugu, elobo gani elitxi yofuneya? (b) Matugumano a Okristu akaleli eni a makamaka vaddiddi?
4 Elitxi yofuneya wila muthu akale mudhari wororomeleya wa Yehova ku okuluvela esile dhinivahiliye wila dhinikamihe epaddi ya omuyani. Modha mwa esene, ba matugumano a mulogo. Malebo anonikokomeza wila nihipwazege matugumano ehu. (Ahebreu 10:23-25) Abale ankalavi Anamoona oororomeleya a Yehova ahikosa guru wila afiyege mmatugumanoni na anamebedha akwawa. Mmatugumanoni mpu, eziwelo yehu ya Malebo enowunuwa. Ninowunuwa vina ntamaalelo ninkaanelihu ebaribari ya Bibilia ejene emalilihu oziwa, vina woona deretu mukalelo wa olabihedha ebaribari eji. Ninowandana vaddiddi na abalihu Akristu mwa webedha wowiwanana vina ninolibihedhiwa okosaga efunelo ya Mulugu. Muya wa Yehova onovaha mweeddihedho modheela mulogo, vina modheela muya obu Yezu oli vari wehu.—Mateu 18:20; Ovuhulela 3:6.
5. Akala mabasa a Anamoona a Yehova anowimetxiwa, txini enkosiwana matugumanoya?
5 Weyo onodhowaga omatugumanoni, vina onothiddihedha mabasa esile dhiwaliwewo? Dila dhiina, mabasa a Anamoona a Yehova agemetxiwa, enofuneya okosaga matugumanoya na makuru mañgono mmatakulu. Txino mburodha vina mudhidhiya onothiyana, vina txino dhinofanyeela osadduliwa, matugumano mena bagakosiwa na mathiyu vaddiddi. Mbwenye, masiki na makathamiho obe dhowopiya, abali na arogori anroromeleya anokosela guru okalavo va matugumanoni otene.
6. Ninlagiha dhavi wila ninomukuluvela Yehova, nanda eji enwodha dhavi onikamiha olaleyagavi s’ohova elo?
6 Omukuluvela Yehova onwarala modheela onfiyedha na nlobelo na murima wotene, niziwaga wila ninofuna nikamihedho na Mulugu. Weyo onokosaga ejene? Yezu wahilobela dila dhinjidhene mudhidhi wa mabasa aye velaboni ya vati. (Luka 3:21; 6:12, 13; 22:39-44) Nanda omathiyu ahinathi otomeyiwa, iyene wahakokomeza anamasunza aye: “Yedhelani, lobelani, munadhe onyengetheya.” (Marko 14:38) Akala ninowafanya athu ahintanaala muselu wa Omwene, txino iyo podi onyengetheya banobanela orumiwi wehu. Akala athu anonibedda obe anonifarafara, txino iyo podi onyengetheyela omaala wila nirabele makathamiho. Mbwenye iyo nigalobelela muya wa Mulugu na murima wotene wila onikamihe olaleyaga s’ohova elo, ninela owaralihiwa wila nihinyimuwe sabwa ya dhoweha esi.—Luka 11:13; Éfeso 6:18-20.
Miselu Dhilebiwe Dha Onamoona S’ohova Elo
7. (a) Miselu dhilebiwe mu nivuru na Merelo dhikaleli eni dha va woka wa iyo? (b) Kaakula mavuzo alebiwe omagomo wa ddima eji, woonihaga deretu mukalelo onwodha onikamiha museluya.
7 Miselu dhilebiwe mu nivuru na Merelo sa va woka nanda ninofanyeela ofaseyela vaddiddi. Esi dhinologa mwaha wapemberhile makathamiho arumiwi vina anamasunza ooroma, athu oligana na iyo, nanda balagiha wila Anamoona oororomeleya a Yehova ahinova elo. Ndoweni nipepese epaddi ya miselu esi na nikamihedho na mavuzo aba vina malebo atonyiwe. Oku banigakosa ejene, koona mukalelo onwodhiwe opuramo esile dhinengesiwe.
Arumiwi aali athu aasunzile vaddiddi? Aali athu akoodda wova, peno elobo gani ejuwene yapadduwa? (Joau 18:17, 25-27; 20:19; Merelo 4:13)
Txini yamuwodhihile Pedru ologa s’ohova elo vamentoni va muthego wa Ayuda obulene wathongile wila Mwana Mulugu apiwe? (Mateu 10:19, 20; Merelo 4:8)
Arumiwi akosa eni sumana dhiñgonovi ahinathi odhowiwana va Muthegoni? (Merelo 1:14; 2:1, 42)
Alamuleli mwaarumelani arumiwi wila ahilaleye viina mu nzina na Yezu, Pedru na Joau aakulile dhavi? (Merelo 4:19, 20)
Mwamalelani ofuruliwa, arumiwi aatamelile nikamihedho na ani wili? Awene aahilobela wila ofarafariwawa wimele, obe ekoseye elobo yina? (Merelo 4:24-31)
Anamapambiha mwatamelelani wimetxa mabasa a olaleya, Yehova wavahile nikamihedho modheela eni? (Merelo 5:17-20)
Arumiwi aalagihile dhavi wila aahinonelamo sabwa yafuruleliwani? (Merelo 5:21, 41, 42)
Masiki anamasunzaya enjiya mwabalaleyani sabwa ya ofarafariwa, awene aadideli okosa eni? (Merelo 8:3, 4; 11:19-21)
8. Dhilobo gani dhohagalaliha dhabudduwile mmabasani a olaleya a anamasunza ooroma, nanda iyo nidhile dhavi ovolowa mmabasani aba?
8 Mabasa a olaleya bili yaderetu kaali a ebewe. Othamagela anamasunza 3.000 aahibatiziwa nsaka na Pentekoste yaka ya 33 E.C. “Muthengo wa alobwana na ayana amurumela Nabuya, wanunuwavi.” (Merelo 2:41; 4:4; 5:14) Na ovira wa mudhidhi, masiki namafarafara wotabala wa nlogo na Mulugu, Saulo mukadda Tarso, wahisadduwa bakala Mukristu nanda baroma ovaha onamoona wa ebaribari s’ohova elo. Iyene wahidha oziwiwa ninga murumiwi Paulo. (Galásia 1:22-24) Mabasa aromile vyaka zana dhoroma keemelile. Aba athabwiletxe mmasikuni aba oomariha nanda ahifiyedha dhipaddi dhotene dha elabo ya vati. Iyo nihikaana gari ya okamihedha mabasa aba, nanda oku banigalaba, iyo podi osunza mwa yotagiha ethiyiwe na Anamoona oororomeleya abene alabile iyo nihinathi.
9. (a) Midhidhi gani dhilabihedhi Paulo wila avahe onamoona? (b) Na makalelo gani anavuwihedhiwena athu ena muselu wa Omwene?
9 Paulo mwasunzeliye ebaribari mwaha wa Yezu Kristu, iyene wakosile eni? “Malabo-ene abo wanlaleya . . . wi Yezu ddi Mwana Mulugu.” (Merelo 9:20) Iyene wahitamaalela mahala amukaanela Mulugu, vina wannonelamo wila athu otene anfuna wiwa bili yaderetu ejile yamaliliye olaleyiwa. Paulo wali Muyuda, nanda mowiwanana na meeddelo a nsaka nthile, iyene wandhowa olaleya mmasinagoga. Iyene vina wanlaleya numba na numba vina wantanaalela bili yaderetu na athu mmamisika. Iyene wali wovisasanyedhene wila amwalele mirudda dhiswa wila alaleye bili yaderetu.—Merelo 17:17; 20:20; Roma 15:23, 24.
10. (a) Paulo walagihile dhavi yawila masiki s’ohova elo, iyene vina wanziwa ozinddiyela na mukalelo wavahiye onamoona? (b) Niwodhe dhavi wooniha mikalelo dha Paulo nigalaleyaga amudhi, anamalaba akwihu, obe anaskola akwihu?
10 Paulo kova elo, mbwenye vina wanziwa ozinddiyela, ninga munfanyeelelihu okala. Wa Ayuda iyene wakokomezi modheela nlibelo nakoseli Mulugu azamani awa. Wa Agrego iyene walogile modheela dhilobo dhaziwilani. Mudhidhi na mudhidhi iyene wanlabihedha esile dhampadduwela bagasunza ebaribari, ninga marhe a ovahana onamoona. Iyene ologile dhahi: “Ddiviliganiha na athu etene, wi, masiki erutxe, ddàvunemo ena.”—1 Korinto 9:20-23; Merelo 22:3-21.
11. (a) Paulo wakosile eni wila arabele ogudulagana na abale ampambiha? (b) Midhidhi gani dhinfanyeelihu ofara na zelu yotagiha ya Paulo, nanda dhavi? (c) Guru enda wuvi wila nilaleyege s’ohova elo?
11 Dila dhiina Paulo agoona wila yanfanyeela oroma odhowa olaleya mpaddi mwina sabwa ya opambihiwa, iyene wankosa ejene othiya ogudulagana na abale ampambiha. (Merelo 14:5-7; 18:5-7; Roma 12:18) Mbwenye iyene txipo kakaanela manyazo bili yaderetu. (Roma 1:16) Masiki Paulo vagumaniye na ohelutxiwa, masiki okoseliwa otabala na anamapambiha aasilidhiwe, ‘Mulugu wahimulibiha,’ wila alaleyegevi. Iyene wahiloga dhahi: “Nabuya wali na miyo, oddilibiha wi ddakwanihe olaleya.” (1 Tesalónika 2:2; 2 Timóteo 4:17) Yezu, Musorho wa mulogo wa Okristu, ononivahavi guru enfunihu wila nikosege mabasa athageliye ologa nsaka nehu.—Marko 13:10.
12. Ohova elo wa Okristu ontonyiyedha eni, nanda sabwaya ya ejene jivi?
12 Nihikaana sabwa dhotene dha olaleyagavi nzu na Mulugu s’ohova elo, ninga mwakosela Yezu vina adhari ena oororomeleya a Mulugu mu vyaka zana dhoroma. Eji kintapulela wahelutxa athu ena obe otamela wamagelelana museluya abale ahinfuna. Mbwenye kaninfuna onyimuwa sabwa ya athu okoodda otanaala; nne vina kanimmaalihiwa na ofarafariwa. Ninga mwakosela Yezu, ninolaleya Omwene wa Mulugu vowila thi nlamulelo nofanyeela na elabo yotene ya vati. Ninologa na nikuluvelo sabwani ninimwimelela Yehova, Mulamuleli Munddiuwa wa Elabo Yotene, vina sabwani muselu onlaleyihu kayo wehu, mbwenye bwa Mulugu. Nanda okwela wehu onimukaanelihu Yehova onofanyeela okala sabwaya enddimuwa vaddiddi ya omutamaala.—Filipi 1:27, 28; 1 Tesalónika 2:13.
Osakulela
• Ekaleli eni yofuneya walaleya muselu wa Omwene athu otene anwodheya, mbwenye ninfanyeela ojeedhela wila athuya anakose eni?
• Niwodhe dhavi olagiha wila kaninkuluvela guru dhehu wila nimulabe Yehova?
• Masunzo gani aderetu ansunzihu mu nivuru na Merelo?
[Mafoto vanikukuni 173]
Ninga mwapadduwelani nsaka na wale, nsaka na ovanene adhari a Yehova anolaleya nzu na Mulugu s’ohova elo