Yezu Kristu—Mesiya Waroromelihiwe

WILA anikamihe omuzinddiyela Mesiya, Yehova Mulugu wahavudheelela anamavuhula enjene a Bibilia wila avahe miselu mwaha wa obaaliwa, orumiwi, vina okwa wa Mvuni oddule waroromelihiwe. Mavuhulo aba otene a Bibilia aahisoriheya mwa Yezu Kristu. Aba bonyaala na mukalelo wa wumiha milomo vina anotapulela deretu. Wila niladdanihe eji, ndoweni noone mavuhulo mañgonovi abene aattagile ologa mapadduwo oowiwanana na obaaliwa wa Mesiya vina oyima waye.

Namavuhula Izaiya wahittaga ologa wila Mesiya agakalile mudhuli wa Mwene Davidi. (Izaiya 9:7) Txibarene Yezu wabaaliwe mu nihimoni na Davidi.​—Mateu 1:1, 6-17.

Mikeya, namavuhula mwina wa Mulugu, wahittaga ologa wila mwana oddu musogorhomwa agahikala mulamuleli vina yawila agabaaliwe o ‘Belemi wa Efrata.’ (Mikeya 5:2) Nsaka nibaaliwe Yezu, elabo ya Izrayel yana sidadi biili dhatxemerhiwa Belemi. Modha yakala waddamana na Nazareti, mpaddi wa omadhulu wa muruddaya, nanda yina yakala waddamana na Jeruzalemi mu Yuda. Wale, Belemi oddule wali waddamana na Jeruzalemi watxemerhiwa Efrata. Yezu wabaaliwe mu sidadi mwene mpule, txibarene ninga mwattageli ologa nivuhulo!​—Mateu 2:1.

Nivuhulo niina na Bibilia nahittaga ologa wila Mwana Mulugu agahitxemerhiwa ‘wiJipito.’ Yezu bali mwana wahittukuleliwa wiJipito. Mukweli Herodi, Yezu wahiyihedhiwa o Nazareti, wila nisoriheye nivuhulo.​—Ozeya 11:1; Mateu 2:15.

Mu tabela eli “Mavuhulo Oowiwanana Na Mesiya,” malebo alebeliwe mutxiddo mwa musorho onloga “Nivuhulo” ahikaana miselu mwaha wa Mesiya. Onokumbirhiwa wila oladdanihe miselu esi na malebo alebeliwe mutxiddo mwa musorho onloga “Osoriheya.” Okosa ejene onela wenjedhedha oliba wa nroromelo nawo mwa ebaribari ya Nzu na Mulugu.

Oku bugapepesa malebo aba, kobuwela wila malebo abale a mavuhulo aalebiwe vyaka mazana na mazana Yezu ahinatti obaaliwa. Yezu wahiloga: ‘Dhilobo dhotene dhilebiwe mu nlamuloni na Mizé vina mwa Anamavuhula vina Mmasalmuni mwaha wa miyo dhinofanyeela osoriheya.’ (Luka 24:44) Ninga munooneliwe mBibiliani mwawo, mavuhulo aba ahisoriheya, na dhitaganodha dhotene!