Yoviteya Enivahile Wagalala Vaziwile Iyo

Wahiromaga waddeliwa makani oviteya?—a Bibilia onologa makani ooviteya antxemerhiwa “makani ooviteya.” Booviteya sabwani andha wa Mulugu. Vina anotxemerhiwa makani ooviteya vowi attu kanziwa dhologa esi. Masiki angelo anfuna oziwa venjene odheela makaniya aba. Ogahiziveliwa oziwa yoviteya gani?—

Ohivira mudhidhi mwinjene, wa wale vaddiddi mundduni, Mulugu omuttandda mulobwana woroma na muyana. Mazina awa aali Adamu na Eva. Mulugu wahavaha murala wookoddela vaddiddi wakuweliwa mundda wa Edeni. Keliwa Adamu na Eva ahimwiwelela Mulugu, awene vamodha na anawa agahisasanyedha elabo yotene bikala paraizu ninga mundda obule. Awene agahikala mparaizu namukalakala. Mbwenye weyo onowubuwela ekosile Adamu na Eva?—

Adamu na Eva ahinvanya Mulugu, noona ddabuno kanili mparaizu. Mbwenye Mulugu ohiloga wi agahikoddeliha elabo yotene, vina attu otene agahikalawo na mukalakala vina na wagalala. Iyene agakosile dhavi ejoya? Mwa mudhidhi mwinjene, attu kaziwa. Yali elobo yoviteya.

Vadhile Yezu velaboni ya vati, iyene wahasunziha attu odheela yoviteya eji. Iyene wahiloga wi yali sabwa ya Omwene wa Mulugu. Yezu wahasunziha attu wi alobele wi Omwene obu odhe. Onele osaddula elabo wi ekale paraizu wokoddela.

Weyo ohiziveliwa oziwa yoviteya eji?— Kobuwela wi abale animwiwelela Yehova banakale Mparaizu. Bibilia ononaddela dhopadduwa dhinji dha alobwana na ayana amwiwelele Yehova. Ogaziveliwa osunza sabwa ya awene?— Ndowe noone mikalelo dhaana attu eena vina ninakale dhavi ninga awene.