Mwene Woroma wa Izrayel

Yehova wahattoma anamattonga wi aweddihege aIzrayel, mbwenye aIzrayeliya kafunile. Awene amukumbirha Samuwel: ‘Iyo nininfuna mwene. Sabwa malogo otene anlamuleliwa na amwene.’ Samuwel ozinddiyela wi yubuwelo eji yali yabure, noona omuloba Yehova eziwelo. Yehova ompanga, ‘Awene kanukodda weyo. Anddikodda miyo. Kapange wila ddinele wavaha mwene, mbwenye mweneya onelege walogosa dhilobo.’ Masiki mwiwalani yalogile Yehova, awene adidelavi: ‘Kanintanalawo. Munivahe mwene!’

Yehova wahimwaddela Samuwel wi mweneya woroma agakalile Sawul. Siku nidhowile Sawul omwaredhela Samuwel o Rama, Samuweliya omuttidda omukuttulela makura va musorho.

Nomala, Samuwel okuweliha nlogo notene wi nimone mwene wawa muswa. Mfiyelani, kamoni Sawuliya. Onoziwa sabwaya? Iyene wela ovivita okodde wa dhobo. Mmutamelelani amona, ahidhana vari, amwimetxa. Sawul wali muttu wokoddela-wene, wolapa opitta attu otene alivo. Samuwel ologa: ‘Mmone muttu ousakulelini Yehova.’ Nlogo nikuwa: ‘Munottabeliwa mwene!’

Omaromelo-wene Mwene Sawul wanninvuruwana Samuwel vina wahimwiwelela Yehova. Nomala batxinja. Epadduwile dhahi: Mwene kafuniwana okutta mukutto. Arumelihiwa okosa ejuwene akala namavuhulela. Siku nimodha, Sawul ohiperheka mukutto yekavo s’omujedha Samuwel, bagona ninga Samuweliya wela ogonela ofiya. Samuwel wonilemo dhavi ovanya wa Sawul? Iyene ompanga dhahi: ‘Weyo ohinvanya Yehova.’ Sawuliya osunzavo elobo?

Mmalelani, Sawul adhowaga owana na akadda Amalek, Samuwel ompanga wi ahimuttiyevo nne mmodha. Venevo Sawul okodda wiwelela, omuttiya ovuneya mwene Agag. Yehova omwaddela Samuwel dhahi: ‘Sawul oddinyanyala, kavuruwanile dhimwaddelemi.’ N’eji Samuwel osiridhiwa kakamwe, ompanga Sawul: ‘Weyo okodda ovuruwana dhinloga Nabuya, iyene onele omusakula mwene mwina.’ Samuwel mvenyeliye wi adhowege, Sawul omuttidda mukumaye, okatuwa. Nomala, Samuwel ompanga Sawul dhahi: ‘Yehova okatula omwene wawo.’ Yehova wafuna wi amusakule muttu mwina ahalena omweneya- muttu wamuzivela murima.