Mparha wa Yehova

Salomau mukaleliye mwene wa Izrayel Yehova o muttanyuwela, omvuza: ‘Nga Salomau, onfuna wi dduvahe eni?’ Salomau ohakula: ‘Miyo ddili mima nanda kaddinziwa enkosimi. Ddinoukumbirhani muddivahe mirugu dh’oweddihana nlogo ntti nenyu.’ Yehova omwaddela: ‘Vowi weyo oddikumbirhile mirugu, ddinele oukosa muziwetxi mwilaboni mwetemwene. Ddinele vina ouvaha dhorela. Nanda ogaddiroromela, ddinouttiya okalawo malabo menjene.’

Salomau oroma omagiha Mparha. Iyene ottukula wero wapamaya, safurhi, tabwa na mabweya. Matxikwi menjene a alobwana na ayana a ewodhelo, bamagile Mparhaya. Mvirele vyaka tanu nabili Mparha omala omagiwa wi operhekeliwe Yehova. Obuya wahikana ebuwa, vadhuluva vekiwa kobiri dha sokela. Salomau okokora osogorho wa ebuwa, olobela: ‘Eh Nabuya mparha obu kuwunuwile, nne kukoddelile vamentoni venyu, masiki dhawene akelani, akelani owebedhani vina malobelo ehu.’ Yehova okosilena dhavi nlobelo vina mparha wa Salomau? Vomaguva-vene mmaleli Salomau olobela, otita motto mmiraboni, oddumeya mukutto wali vebuwaniva. Yehova wahakela malobelo na mparha wa Salomau. Monele aIzrayel esene, aziveliwa.

Eziwelo ya Mwene Salomau, yahivuwa mw’Izrayel mwetemwene ofiyedha dhilabo dhina dhotakulu. Attu akana makani orutxa, annimutamela Salomau wi akamihe. Masiki musano w’o Sabá wahidha wi amureze Salomau na mavuzo ottiyana-ttiyana. Moneliye mwakulelo wakuli Salomau, musanoya osiba dhahi: ‘Miyo kaddarumela dhaddaddela attu mwaha wawo, mbwenye ovano ddihona wi weyo ohikana zelu opitta dhiwalemi. Mulugu wawo Yehova onoururiha-wene.’ Olamulela wa Salomau, wahidhana murenddele wa nlogo notene na Izrayel. Vasogorhova dhigahidha osadduwa.