Ogaweya wa Omwene

Izrayel wahikana murenddele mudhidhi Salomau vamwebedhiye Yehova. Mmalelani Salomau ohatela ayana enjene, eenaya awebedha amulugu osemiwa. Vang’ono-vang’ono Salomau ohisadduwa, oroma wawebedha amulugu osemiwa vina. Yehova osilidhiwa vaddiddi. Omwaddela Salomau: ‘Izrayel onele ogaweya dhipaddi bili. Epaddi enddimuwaya ddinfuna ddavahe anamalaba awo, nanda murala wawo onohalana epaddi eng’onoya.’

Yehova ohikosa ejene mwa mukalelo waderetu. Namalaba mmodha wa Salomau, Jerobowau wela okosa oleddo, vasogorhova bagumana na namavuhulela Aija. Aija mmoneliye, ohitaya mukumi waniye paddaso 12, bamwaddela Jerobuwau: ‘Yehova onele omwaka Salomau omwene wa Izrayel, agawe dhipaddi bili. Weyo ttukula dhipaddi kumi dha mukumi obu sabwa ddi weyene onalamule maziza kumi a omweneya.’ Vewale Mwene Salomau dhapadduwile, ohiroma omutamela Jerobowau wi ampe! Jijene yattaweli Jerobowau badhowa w’Ijiptu. Mukweli Salomau, ohalilena omwene ddi mwanaye Robowau. N’eji Jerobowau ohiyelela owaniwaye o Jeruzalami.

Anddimuwa a mw’Izrayel amwaddela Robuwau eraga: ‘Akala munfuna wi muttonge nlogo ntti, mweddihe pama.’ Mbwenye amarho a Robowau ali azombwe ninga iyene amwaddela eraga: ‘Katabutxaga nlogo ntti-we! Kaalabihege na guru wi auziwe!’ Robowau ofwarile malago a azombwe akwaye. Iyene wali mwene wabure vaddiddi nona nlogo notene nimusadduwela. Nlogona nimwira Jerobowau mwene wa malogo kumi a Izrayel, abuwene aziweya ninga Omwene wa Izrayel. Malogo meena meli aziweye ninga omwene wa Juda, nanda malogo aba meeli bedda na Robowau. Maziza 12 a Izrayel ovano amala ogaweya.

Jerobowau kafuna wi attu aye adhowege o Jeruzalemi wi amwebedhe Yehova, sabwa walamulelawo wali Robowau. Weyo onoziwa sabwaya? Jerobowau wova wila nlogo naye ninadhe omukamihedha Robowau. N’eji ahawuba anang’ombe eeli, owaddela nlogo: ‘Nyuwo ananlogo kewani, o Jeruzalemi ohittabwa olapela. Mwebedhege okuno.’ Malogoya aroma wawebedha ana ng’ombe, amudduwala Yehova wili.