Jeruzalemi Onogujuliwa

Attu a nlogo na Judá amuttiya Yehova, ahawebedha amilugu onyengetta. Yehova ofuna wakamihedha mwa vyaka dhinjene. Oharuma anamavuhulela enjene wi awaddele dhotakala dherani, kafunile ovuruwana. Awene ela wateya anamavuhulelayá. Yehova agagomihile dhavi webedha wabure wakosa nlogo na Judá?

Nabukodonosor mwene w’o Babilónia wela opemberha nlogo-na-nlogo. Dila yoroma yadhowiliye o Jeruzalemi, omuttiddawo mwene Jowakim, anddimuwa, anyakoddo, vina anamawodha mabasa a osema battukulela o Babilónia. Iyene vina ottukula mafumo otene ali mumparhani mwa Yehova. Nomala Nabukodonosor omwira Zedekiya mwene w’o Judá.

Voromavene, Zedekiya omwiwelela Nabukodonosor. Mmalelani malogo ali vakuvi, vina anamavuhulela onyengetta, amwabihedha Zedekiya wi anvanye mwene w’o Babilónia. Jeremiya wamwaddela: ‘Ogavanya, Judá onogweliwa dala, maredda na okwa.’

Zedekiya vattongiliye vyaka tanu na ttaru, ofuna onvanya mwene w’o Babilónia. Iyene okumbirha nikamihedho na anyakoddo a akadda Ejipitu. Mwiwalele Nabukodonosor, oharuma anyakoddo aye wi amugujule Jeruzalemi, amaga misasa owerewera muttetteya. Jeremiya omwaddela Zedekiya: ‘Yehova baloga akala onoviperheka onovuneya weyo vina muttetteya.’ Ogakodda, akadda Babilónia anodha amuddumeye Jeruzalemi, vina anoutxedha. Zedekiya omwakula: ‘Kaddinfuna oviperheka!’

Jivirile yaka na jiddiga, akadda Babilónia avolowa mu Jeruzalemi addumeya muttetteya. Addumeya mparha, ahapa attu enjene, enaya ahattukula wi afugele.

Venevo Zedekiya ottawa, akadda Babilónia amuttamagiha, amuttidda. Anfwanyile waddamela o Jeriko, amuttidda anfiha vali mwene Nabukodonosor. Mwene w’o Babilónia, ohattidda ana Zedekiya, ohapa mwinya awonaga. Novenya omuttidda Zedekiya omutwa mento, omweka mukambura, okwela mwenemo. Masiki dhawene, Yehova ohaddela nlogo na Judá yafuniye wawirela: ‘Dhigavira vyaka 70, ddinele ouwiyihedhani o Jeruzalemi.’

Koddi txini egapadduweli aima attukuleliwe o Babilónia? Agahikalavi oweddeyana na Yehova?