Akodda Webedha Egamuttu

Mvireli mudhidhi mung’onovi, Mwene Nabukodonosor barohile nladdaniho, iyene ohubiha egamuttu yanddarhama. Ohimetxiha vatamoni elabo y’o Dura, ohakuweliha anddimuwa a elabo yotene, vina omukuwela Sídrak, Mizak na Abdenago wi ebedhe. Mwene ogwiha nlamulo naloga dhahi: ‘Mugewa wobiwa mugoloma, wa tturhuka, wa siribwi wa ttangarhi wa kasasi munddimuwa, mukokore mwire labá! Onfuna okodda okokorela nladdaniho ntti onovokedhiwa omottoni.’ Azombwe aba araru Sídrak, Mizak na Abdenago agahikokorela egamuttu, obe agafunile omwebedha Yehova?

Mwene olamula wi wiba orome. Attu otene akokora, ahirela labá egamuttu yosema, masiki dhawene Sídrak, Mizak na Abdenago kakokoreli. Alobwana alivo ahawoona, attamaga wi amwaddele mwene: ‘Ahebreu abale araru akodda webedha egamuttu yubihilenyu.’ Nabukodonosor ofiya valani ohawaddela: ‘Ddinfuna dduwoneni wili akala munokodda-wene okokorela egamuttu. Mugakodda, miyo ddinowuvokelani omottoni. Kawo mulugu onfuna wuvunani mmadani mwaga.’ Awene amwakula: ‘Kaninfuna-wene okokorela egamuttu yenyu. Mulugu wehu onele onivuna. Masiki akala ejoya kinapadduwe, ziwaní mwene wi kaninfuna webedha egamuttu yenyu.’

Nabukodonosor osilidhiwa vaddiddi. Ohapanga alobwana aye dhahi: ‘Mwekemo motto dila tanu na bili opitta munkalelagani!’ Nomala oharuma anyakoddo aye: ‘Kamageni alobwana aba, mwavokedhe mulejeni mwa motto!’ Vowila nlejena naviha vaddiddi, anyakoddo mwaddamelelani akwa. Mbwenye Sídrak, Mizak na Abdenago ahifiya muttoloni mwa motto s’ohizwa. Mwang’anelimo mwene Nabukodonosor, iyene ohawonamo alobwana anai eddaga vari va mottoya. Moneliye oroma wova, ohavuza emeleli aye: ‘Mmottoni mpule iyo kanawekilemo alobwana araru? Miyo ddinawonamo anai, mmodhayávo onkala ninga anju!’

Nabukodonosor ohaddamela omottoniwa, okuwa: ‘Nyuwo emeleli a Mulugu Wowodha-wodha, budduwelani otakulu.’ Attu otene awona Sídrak, Mizak na Abdenago bagedda mmottoni s’ozwa, antikina vaddiddi. Maningo awa, nttitti, guwo kadhazwile, nanda nne aweneya kaanuka erule ya motto.

Mwene Nabukodonosor ohiloga: ‘Mulugu wa Sídrak, Mizak na Abdenago muddimuwa. Omuruma anju waye ohavuna. Kawo Mulugu woligana na iyene.’

Weyo onofuna okalavi oweddeyana na Yehova masiki ogafwanyiwa makattamiho?