Ottiddiwa wa Yezu

Yezu na anamafwara aye avenya adhowa o Mwangoni wa Olivera. Yali vari-va-mattiyu vina wahikala mamweri. Mfiyelani mmunddani mwa Jetsemani Yezu wahawaddela anamafwara eraga: ‘Mugahala “Kalani mento.”’ Apa Yezu osusela mwari mwa munddaya, okokora. Na odhugudheya onddimuwa, ohimuloba Yehova eraga: ‘Yireye ninga munfunelinyu.’ Venevo Yehova omuruma mungelo wi amulibihe Yezu. Mwiyeleli Yezu wali anamafwara, wafwanyile ooraru agonaga. Ohiloga: ‘Muvenye! Obu kahiyo mudhidhi wogona! Ehifiya wora wi ddiperhekiwe mmadani mwa amwiddani aga.’

Juda ohifiya, odhana muttitti munddimuwa wattukulile masupadda na magorhomonddo. Juda wahiziwa wonfwanya Yezu vowi wandowaga na iyene mmunddani mwa Jetsemani. Juda ohawaddela anyakoddo wila agahatonyihedha Yezu. Mfiyeliye ohaguvela omususela Yezu ologana: “Moyoni Namasunziha,” ombejar omaguguni. Yezu omvuza: ‘Nga Juda weyo onddiguliha na beju?’

Yezu ohimela, ovuza muttittiya: ‘Munimutamela ani?’ Awene amwakula: “Ninimutamela Yezu munazareti.” Iyene ohakula: “Ddi miyo-wene,” otene adederuwela mundduni agwa. Yezu odidela: “Munimutamela ani?” awene amwakula: “Yezu munazareti.” Yezu odidela: “Ddimala owaddelani, ddi miyo-wene. Mwattiye attu aba adhowe.”

Pedro moneliye dhapadduwa, ovula supaddanaye omugwaddana niyaru n’omononi woja wa Malku, mwimeleli wa namakutha munddimuwa. Yezu ohiddodda niyaruna ohikawo bavulumuwa. Nomala Yezu omwaddela Pedro: ‘Keka sumapadda nawo mbuddunimwá. Onfuna owana na supadda, onkwa na supadda’. Anyakoddo amurija Yezu ammaga mada, anamafwara otene attawa. Muttitti omuttukulela Yezu wa namakutta Anaz. Anaz ohimvuza Yezu, mmaleliye oharuma anyakoddo wi amuttukulele wa Namakutta Munddimuwa Kaifa. Kito txini yapadduweli anamafwaraya?