Karta ya Nikuru Nolamulela

Amudhehu Okweleya:

Vowi ninimwebedha Yehova, iyo ninokwela Nzu naye, Bibilia. Ninoziwa wila Nzuna ntti nikana mapadduwo okuluveleya, malago ororomeleya vina mulagiho w’okwela wa Yehova, onakweliyena attu otene. (Masalmo 119:105; Luka 1:3; 1 Joau 4:19) Ninofuna-wene na murima wotene wila nakamihedhe attu eena osunza ebaribari endela Mmazuni a Mulugu. Nona n’osanzaya wotene niburutxa nivuru ntti ninloga: “Kasunza na Mapadduwo a Mbibiliani.” Ngafuna ndoweni niloge vang’onovi dha nivuruna ntti.

Dhipaddi dhinji dhili munivuruni mpu, dhilebeliwe aima. Mwadhawene, anddimuwa vina anfuna osunza dha Bibilia anokamihedhiwana. Bibilia nivuru nilebeliwe attu otene, nona enokala yopureleyamo osunza mapadduwoya alimo ananikamihedhe ofwanya osanzaya.

Nivuru ntti ninonisunziha enloga Bibilia mwaha wa maromelo a ottanddiwa wa murala wa attu, mpaka musogorho. Vahikosiwa masasanyedho wi mapadduwo a Mbibiliani atadiwe mowoneya, vina mohirutxa ononelamo, afwariwaga masakaya apadduwilani.

Nivuru ntti kaninloga dha makanivi a mapadduwo ali Mbibiliani. Nihikana mazu vina mafoto alabiwe n’oyesa antomola murima wi alagihe dhinloga Bibilia ninga moneyelani.

Nttina vina ninonikamihedha ononelamo mwaha onalogela Bibilia—attu amwiwelela Yehova vina akodda omwiwelela. Nanda ninonivaha gari yosunza dhotagiha dhawa. (Roma 15:4; 1 Korinto 10:6) Nivuruna ntti nigawiwe dhipaddi 14. Omaromo wa dhipaddi dhotene ohikala ogwaddela wa makani ali mwarimwa anasunzehu.

Akala wa mambali, wengesege masunzoya na mwanawo vina mulogelege wiwanana olivo wa makani na mafoto ali vanikukuniva. Nyuwo moheli mwengese malebo a Bibilia, mwenemo muttiddiwe nipadduwona. Mukamihedhé mwanawo wi atapulele wiwanana olivo mwa esile dhengesilenyu Mbibiliani na dhilebiwe vansunzoniva. Yakakene ekosiwege akala muttuya onsunzihiwa munddimuwa.

Ninjedhela wila Nivuru ntti nakamihedhe attu otene ofwaseya murima—azombwe na anddimuwa—wi asunze Nzu na Mulugu, alabihedhe mwigumini mwawa dhetene dhisunzilani. Agakosa dhawene yopurelamoya enakale eji: otene anele omwebedha Yehova vina anele okosa epaddi ya nlogo naye.