Kafara Merelo a Anamavuhulela—Mikeya
1. Nivuzo gani natanaalele Mikeya, mbwenye kito mabasa aye olaleya akooddile eni okala ebewene?
1 ‘Omagomo wa mikalelo dha dhilobo dha elabo ejino yotakala onadhe mudhidhi gani?’ Namavuhulela Mikeya txino wahubuwela nivuzo noligana na ntti mudhidhi olaleyile iyene miselu dha ottonga wa Yehova odheela osadduwela wa amwene a Muizrayel vina Juda. Noona, mabasa aye olaleya kaali ebewene. Yaka ya 740 A.E.C, mudhidhi wakalawo Mikeya, Mazu a Yehova odheela osadduweliwa wa Samariya ahisoriheya. (Mik. 1:6, 7) Musogorhomwa, Jeruzalemi wahitolotxiwa yaka ya 607 A.E.C. (Mik. 3:12) Iyo ninamutagihe dhavi Mikeya mudhidhi onjeedhela iyo ottonga wa otolotxa wa Yehova masiku abano ehu?
2. Na mukalelo gani vina sabwani enfanyeela iyo otonyihedhe ovilela mudhidhi onjeedhela iyo labo na Yehova?
2 Kavilela: Mikeya ohileba: ‘Mbwenye wa miyo ddinele omwag’anela Yehova. Ddinela olagiha mikalelo dha ojeedha wa Mulugu mvulumutxi waga.’ (Mik 7:7) Mwebaribari, Mikeya katonyihile mukalelo wohitanaala ajeedhaga wi omagomo ofiye. Iyene wahikosavi mabasa aye ninga namavuhulela wa Yehova. Mudhidhi onjeedhela iyo labo na Yehova, ninofanyeela okala wozuzumela ‘mabasa okoddela na meeddelo ofanyeela vamodha na ekalelo ya ovilevela.’ (2 Ped. 3:11, 12) Ovilela wa Yehova onowavaha attu mudhidhi wi atxinuwe. (2 Ped. 3:9) Noona, iyo ninorumeela wogoleliwa na malago omulugu vina natagihaga anamavuhulela vina nikaanaga ovilela wakakene.—Tia. 5:10.
3. Ninfanyeelelani omukumbirha Yehova wi nikaane muya waye wokoddela?
3 Kakuluvela guru dha Yehova: Masiki Mikeya wahakela ettomo ya wopiha, iyene wanimutamela Yehova wi anvahe guru ya wakwanihedha. (Mik. 3:8) Kayo yebewene wi Mazu a Mulugu anonilibiha okuluvela guru ya Yehova. Iyene anowavaha guru abale alemile wi awodhe wakwanihedha ettomo yawa ya omuyani. (Masal. 84:5, 7; Iza. 40:28-31) Iyo nahiromaga weha nanyene esuwene mwigumini mwehu na mabasa okoddela? Weyo mudhidhi wotene onomukumbirha Yehova guru ya muya wokoddela waye?—Luka 11:13.
4. Mukalelo wa egumi ya Mikeya ennivaha yotagiha gani yaderetu ddabuno?
4 Mwigumini mwaye, Mikeya wahika efunelo ya Mulugu vamburoni woroma. Iyene wahisakula okalavi wororomeleya masiki valiye worigiwa na attu otakala yubuwelo. Moligana, ovilela wehu onowehiwa malabo otene. Ndoweni nilibihe wimela wehu mwa ‘weedda na nzina na Yehova mwari mwa mudhidhi wohiziweya vina na mukalakala.’—Mik. 4: 5.