Weyo Onele Obazela Opurelamo Gari?
Wubuwela Okwa wa Yezu Ondawo Ononilibiha wi Nilagihe Ntamaalelo
1. Gari gani yamakamaka enda na Wubuwela Okwa wa Yezu?
1 Wubuwela Okwa wa Yezu onakale labo 14 wa Abrili ononivaha gari yamakamaka ya okaana vina olagiha ntamaalelo modheela opama wa Yehova. Malebo va Luka 17:11-18 anotonyihedha mukalelo onoona Yehova vamodha na Yezu ntamaalelo. Mokubanyanimwene, muttu mmodha bahi wa abale kumi aana maranya avulumutxiwe wahipurelamo gari ya otamaalela. Musogorho, nvaho wa yobolo onele ogomiha kakamwe maredda otene okosaga egumi yamukalakala okala ebaribari! Mohaganyedha, iyo ninele omutamaalela Yehova labo na labo modheela mareliho abo. Mbwenye iyo ninalagihe dhavi ntamaalelo nehu mwari mwa sumana dhindawo?
2. Ninakaane dhavi ntamaalelo modheela yobolo?
2 Kakaana Ntamaalelo: Murima wa ntamaalelo onda na dhubuwelo. Wi anikamihedhe olibiha efunelo yehu modheela yobolo, masasanyedho a makamaka a wengesa wa Bibilia wa nsaka na Wubuwela Okwa wa Yezu podi ofanyiwa mwego mottiyana, ninga mu kalendario, na Examine as Escrituras Diariamente. Sabwaya jani kamunsunza makaniya aba na anamudhi? Okosa ejuwene enele wunuwiha ntamaalelo nehu mwaha wa yobolo. Ejoya dila yina enele okaana yopurelamo yamakamaka mwigumini mwehu.—2 Kor 5:14, 15; 1 Joau 4:11.
3. Mikalelo gani dhinawodhena iyo olagiha ntamaalelo nehu mudhidhi wa Wubuwela Okwa wa Yezu?
3 Olagiha Ntamaalelo: Ntamaalelo ninlagihiwa na mabasa. (Kol 3:15) Muliba maranya oddule wotamaalela wahinveda Yezu wi amutamaalele. Mohaganyedha, iyene wahiloga na emwerumweru awaddelaga attu eena sabwa ya ovulumutxiwa waye wa matikiniho. (Luka 6:45) Kito niloge wi otamaalela wehu wa yobolo onele onittukulela olaleya mwaha wa Wubuwela Okwa wa Yezu? Olaba ninga pionero wokamihedha obe wenjedhedha mabasa ehu a olaleya mwari mwa mudhidhi wa Wubuwela Okwa wa Yezu mukalelo mwina wolagiha ntamaalelo. Omattiyu wa Wubuwela Okwa wa Yezu, murima wotamaalela onele onikosiha wi namoyele abale anadhe onoonavo vina onikaliha omala na wale wi nakule mavuzo awa.
4. Ninawodhe dhavi okosa wi Wubuwela Okwa wa Yezu enakale elobo yokubanya?
4 Wubuwela oku wa Okwa wa Yezu onakale womariha? (1 Kor 11:26) Iyo kaninziwa. Mbwenye enziwa iyo jawila wubuwela oku ogavira, enele odhowa gari yehu yamakamaka ya olagiha ntamaalelo. Weyo onele obazela opurelamo? Mazu a ntamaalelo a mulomo wehu vina ntamaalelo na murima wehu amudheelena wagalala Yehova, Mwinya wa yobolo.—Masal 19:14.