Nunuwihaga Ewodhelo Yehu Mmabasani a Olaleya—Nigalogaga na Mwanamurala Osilidhiwe
Ekalelini Yamakamaka: Enjene anafanyihu mmalaleyoni attu oleleya. Mbwenye Yezu wahibaza ologa wi attuya agahinidda. (Joau 17:14) Noona, kanintikina niganfanya mwanamurala osilidhiwe. Ejoya egapadduwa, ninofanyeela wakula na mukalelo onimuzivela oddule onimwimelela iyo Yehova. (Rom. 12:17-21; 1 Ped. 3:15) Okosa dhawene onele okurumutxa makaniya. Vina ejoya enela onvaha onamoona mwanamuralaya vamodha na abale annoona, yakosihaga wi awene anvuruwane Munamoona mwina wa Yehova onalaleye dila yina.—2 Kor. 6:3.
Ninakose Dhavi:
• Nikaane ekalelo yokurumuwa vina ya wandaneyana. Eji enele onikamiha ogomiha makaniya. Kumusanze mwanamuralaya agasilidhiwa. (Koh. 7:9) Txino iyeneya osilidhiwe na makattamiho aye anfanyile obe mudhidhi otwanyuwile weyo bwabure. Vina akala osilidhiwe na miselu dhehu, dila dhinjene ejo empadduwa sabwani muttuya olonyengettiwa.—2 Kor. 4:4.
• Kamwakule na mazu aderetu vina s’ohimunyimula. (Gano 15:1) Weyo omukoseli elobo emusilidhile, obe omugwaddile mazu? Vowi iyo kanimbebedhela muttu sabwa ya mabasa ehu a olaleya, ninofanyeela omukumbirha na oviyeviha sabwa ya omukopelela mudhidhi wabure. Iyene onyonyeyile na dhologa dhihili dhebaribari dhiwaliye sabwa ya iyo? Akala eli dhawene, onofanyeela ologa dhahi: “ovano ddinoziwa ewusilidhile. Noona, enkala ninga yiwale weyo sabwa ya iyo kahiyo ebaribari. Ogahiziveliwa wi dduwaddelelemo?” Iyeneya onkooddela sabwa ya mebedhelo ehu, peno ologa dha oburutxiwa wa muttu mmulogoni obe okoodda wikiwa nikami? Egakala dhawene ologe dhahi: “ddinoziwelamo. Attu enjene ahikaana mobuwelo wakakene. Ogahirumeela wulagiha enloga Bibilia sabwa ya masunzihoya abo?”
• Akala muttuya osilidhiwa vaddiddi, txino egaali yofanyeelela obudduwavo vomaguva-vene. Agaloga wi kanfuna wiyeleliwa wili na Munamoona wa Yehova omwaddele kakamwe wi yokumbirha yaye enele orihiwa.
Otagihe Dhahi Mweri Obuno:
• Washagihe anamudhi awo mwari mwa webedha wa ntakulu nawo.
• Ogamala omuttiya mwanamurala osilidhiwe, ologe na mukwawo wa mmalaleyelo mukalelo waderetu ogaakulile weyo.