Kalabihedha Deretu Mudhidhi Wawo Mmalaleyoni

Anamoona a Yehova ahiperheka muttengo wa mawora owakwana 1.945.487.604 mwari mwa yaka ya mabasa ya 2014, ejoya yolagiha yowooneya wi ninfuna nikale oliba nittiddaga mabasa a Yehova! (Masal. 110:3; 1 Kor. 15:58) Vowi “nsaka nihalilewo nili ning’onovi,” enowodheya olabihedha mowakwana mudhidhi wehu mmabasani olaleya wi nafiyedhena attu enjeene?​—1 Kor. 7:29.

Wi niwodhe olabihedha deretu mudhidhi wehu mmalaleyoni ninofanyeela oviparhapattela. Ninga motagiha, akala weyo onovira mudhidhi mwinjeene weka ohinaloga na muttu, egahiwodheya wi okose masasanyedho wi owodhe ologa na attu owinjiva? Joziweya wi mikalelodha dhinottiyana mowiwanana na mburoya. Masiki egalivi dhawene, dhowenjedhedha esi dhinfarela mutxiddo mpu dhinele wukamihedha wi orabele ‘ovada pevo.’​—1 Kor. 9:26.

• Onamoona wa Numba na Numba: Mwari mwa vyaka dhinjene, anamalaleya anokaanaga elemeelelo ya oroma labo nawa mmabasani a olaleya alaleyaga numba na numba. Mwa dhahene, vowi attu enjene ankala mmabasani mwawa na mutana, kito onoonamo dhavi oroma olaleya numba na numba mudhidhi wa txiguwo obe egudduguddu mudhidhi onkala attu enjene vatakulu bagavuma? Na mutana, ovaha onamoona mudila onodhana dhopurelamo dhinjene.

• Onamoona wa Vattaddo: Meza vamodha na estande dhinele olabihedhiwa mmimburoni mumvira attu enjene mwari mwa mirudda dha mulogo wawo. (Koona mu Mabasa Ehu a Omwene a 2013 nikuku 5.) Akala mburoya ottomiwe na mulogo wi ovahiwe onamoona wa vattaddo kamunvira attu enjeene Nikuru na Anddimuwa Animelela Mabasa a Mulogo anele osakula omwalihedha mezaya obe estandiya mburo mwina onvira attu owinjiva.

• Wawiyelela attu na Masunzo a Bibilia: Enowodheya okosa masasanyedho a wawiyelela attu vina masunzo a Bibilia mwari mwa midhidhi dhihinlabihedheya deretu mikalelo dhinji dha olaleyana? Ninga motagiha, akala olaleya wa numba na numba ompureleyamo na Sabuddu membesi, enowodheya otxinja mudhidhi wa masunzo awo a Bibilia wi akale na txiguwo obe egudduguddu? Agakosaga oleddo wa wiyelela, enowodheya anamalaleya ogawa makuru mang’ono wi anamalaleyaya awodhe okosa mabasa menjene mmalaleyoni mwawa?

Joziweya wi ninofanyeela welegela mudhidhi wehu oromilihuna olaba txibarene wagalala wehu onowenjedhedheya nigakaana dhopurelamo dhinjeene. Akala onowoona wi mikalelo dhinji dha ovahana onamoona kadhindana dhopurelamodha onofanyeela olabihedha marhe meena. Kalobela wa Yehova, “munyaya wa munddaya,” wi ofare malago aye, mwa venevo onele olabihedha deretu mudhidhi wawo mmalaleyoni!​—Mt. 9:38.