Dhipano Dhehu dha Osunzana Dhili Mukashani
1. Akristu abale anlaleya anladdanihedhiwani na amesirhi?
1 Mesirhi onolabana dhipano dhottiyana. Dhikalawo dhipano dhiina dha mukashani dhinlabihedhiwa na mudhidhiya mowiwanana na mabasaya, dhiina dhinlabihedhiwa mudhidhi wotene. Amesirhi a ewodhelo awene mudhidhi wotene anokaanaga dhipanodha esi dhamakamaka mukashani mwawa, aweneya anolabihedha na ewodhelo yotene. Bibilia onomulibiha Mukristu oli wotene wi alabihedhe dhipano dhaye mmabasani a olaleya akalaga “ninga namalaba ohinkalela manyazo mabasa anthiddeye.” (2 Tim. 2:15) Epano yehu yamakamaka yosunzihana eli mukashani txini? Mazu a Mulugu—epano yamakamaka enlabihedhihu wi “naasunzihe attu.” (Mt. 28:19, 20) Noona, ninofanyeela okosa guru wi nilabihedhe ‘mazu a ebaribari mofanyeelela.’ Eji epano enlabihedhihu mudhidhi wotene eli mukashani mwehu ya osunzihana ejuwene enfanyeela olabihedhiwa mofanyeela na Akristu otene wi naasunzihe attu ebaribari.—Gano 22:29.
2. Dhipano dhehu dhamakamaka sivi?
2 Epano Yehu Yamakamaka ya Osunzihana: Ottiya Bibilia, epano gani yina enfanyeelihu olabihedha? Epano yoroma ena iyo wi nisunzihena ebaribari ya Bibilia tti nivuru, Txini Ensunziha Bibilia Txibarene? Nigagomiha nsunzo na nivuru ntti na namasunzaya, iyo ninolabihedha nivuru niina, “Kalanivi Mu Okwelani mwa Mulugu” wi nimusunzihe olabihedha magano a Bibilia mwigumini mwaye malabo otene. Noona iyo ninofanyeela okaana ewodhelo yowakwana yolabihedha manivuru aba meeli. Mabrochura meena anofanyeela wekiwa mukashani yehu ya dhipano dhosunzihana. Miselu Dhapama dha Mulugu! eji epano yina ya oromana nsunzo na Bibilia. Akala mmuruddani mwehu attuya kanziwa wengesa deretu obe akala elogelo yawa iyo kanina manivuruya obe nina mang’ovi, iyo podi olabihedha brochura Kanvuruwane Mulugu Wila Okalewo Namukalakala. Epano yina ya makamaka ya wakukuselana attu munikuruni mwehu tti brochura Bani Ankosa Ofuna wa Mulugu Nsaka na Ovanene? Vidiyu dhiina dhinkamihedha wasunzihana attu ninga: Ninimusunzela Eni Bibilia?, Txini Enkosiwa va Numbani ya Omwene? vina Deus tem nome? dhipano dhinfanyeelihu osunza wi nilabihedhe deretu.
3. Mabasa Ehu a Omwene anabudduwege ananikamihedhege okosa eni?
3 Mabasa Ehu a Omwene anadhege anele onikamihedha okaana ewodhelo ya olabihedha mofanyeela manivuru a makamaka ali mukashani ya dhipano dhosunzihana. Akala ninovilibihedha olabana dhipano esi mofanyeela, iyo ninele okala txenjewa na malago anloga: “Vyañgane wamwinya, vina dhinsunzihewe, kalelá ntidi esidhá. Dhahene onovivuna weyo, vina abale anuvuruwana.”—1 Tim. 4:16.