Mavuzo Ankosa Anamengesa
Yezu afuna aloge eni na mazu aba: “Kamubuwele wi ddidhilena murenddele vati apano.”
Yezu walaleya miselu wa murenddele. Nsaka dhahi wahawaddela anamafwara aye: “Kamubuwele wi ddidhilena murenddele vati apano; nne, kaddidhilena murenddele, mbwenye ohiwanana. Miyo ddidhilena ogawana; mwana wa mulobwana na babe mwana wa muyana na maye, muwenya na nyezele.” (Mt. 10:34, 35) Yezu afuna aloge eni na mazu aba?
Yezu kana efunelo yowagawa anamudhi nne muttu na mukwaye, mbwenye iyene wanziwa wi masunziho aye agahitatamula ogawana mmatakulu mena. Ottiya ejo abale agafunile okala anamafwara a Kristu mpaka obatiziwa anfwanyeela oziwa makattamiho agagumanilanina sabwa ya yosakula yawa. Dila dhina akala muttu otelile obe oteliwe na muttu ohili Mukristu odduwene agahinfwarafwara obe agahifwarafwariwa na anamudhi ena eji egahimurutxiha ororomela masunziho a Kristu.
Bibilia enowalibiha Akristu na mazu aba “egawodheya, mwandane na athu otene.” (Rom. 12:18) Mbwenye masunziho a Yezu agahidhana “ogawana” mwari mwa anamudhi ena. Eji enpadduwa akala muttu mmodha wa anamudhi onorumela masunziho a Yezu oku attu ena akoddaga. Egapadduwa dhawene amwiddani abale anokala amwiddani wa oddule onsunza ebaribari.—Mt. 10:36.
Anamafwara a Kristu ankala ntakulu nogaweya mpaddi wa relijiau anogumanana makattamiho aneha weddeyana wawa na Yehova vina na Yezu. Motagiha, anamudhi ahili Anamoona a Yehova anowamagelela oja mattanga aniwanana na relijiau ya ottambi. Agagumanana yoweha bani onfanyelani omwiwelela? Yezu ohiloga dhahi: “Onimukwela babe obe maye opitta miyo, kanfwanyela okala waga.” (Mt. 10:37) Pumwenemo, mbwenye Yezu kafuna aloge wi abale ansunza ebaribari ofiyedha okala anamafwara aye attiye wakwela anamudhi awa. Ottiya ejo iyene wafuna asunzihe wi awene anofwanyela osakula elitxi yamakamaka mwigumini mwawa. Akala anamudhi ahili Akristu anonifwarafwara sabwa ya iyo omwiwelela Yehova ninofwanyela odhowavi nakwelaga mbwenye ninofwanyela oziwa wi omukwela wehu Yehova onofwanyela okala vamburoni voroma.
Iyo ninoziwa wi widdiwa na anamudhi enopa vaddiddi. Masiki dhawene anamafwara a Yezu anofwanyela okana muyubuweloni mazu aba: “Ole ohirumela ottukula pingirhizi yaye addifwarana, kanfwanyela okala waga.” (Mt. 10:38) Na mazu mena Mukristu onofwanyela orumela ofwarafwariwa na anamudhi aye sabwa yokala namafwara wa Kristu. Na mudhidhiya awene anokaana njedhelo nawi mweddelo wawo wapama enele wattukulela amudhawo ahili Akristu otxinja mubuwelo wawa ofiyedha osunza ebaribari.—1 Ped. 3:1, 2.