Wakamihedhe Attu Ena Ovilela Makattamiho

1. Dila dhinji Yehova onakula dhavi malobelo a alabeli aye?

WANZIWA wi Yehova onodhaga wulabihedha wi akule nlobelo na muttu onlobela na ntidi? Ejo enopadduwa. Akala weyo wa munddimuwa wa mmulogoni, mudhari worumeeliwa, pionero obe namalaleya. Kintanala akala weyo wa muzombwe, wa muttu wowunuwelavo, wa mbali obe murogora. Muttu onimukwela Yehova agamukumbirha nikamihedho, dila dhinji Mulugu onowalabihedha anddimuwa a mmulogoni vina alabeli aye ororomeleya wi ampangarhaze. (Kol. 4:11) Jowagalaliha omulabela Yehova vina wakamihedha abali na mukalelo obu! Enowodheya wakamihedha ogapadduwa maredda ovapeya, efoyo obe ofwarafwariwa.

KAKAMIHEDHE ATTU ENA VAGAPADDUWA EREDDA YOVAPEYA

2. Enkalela nni yorutxa wakamihedha attu ena mudhidhi oniteya eredda yovapeya?

² Eredda yovapeya enodhaga onirutxiha wakamihedha attu ena. Motagiha, iyo txino ninofuna wawona amarho ehu mbwenye ninoziwa wi okosa ejo kahiye yobareleya. Txino iyo ninofuna wawoba abale ahina kobiri yowakwana wi adhe vatakulu vehu wi nije vamodha, mbwenye eji vina kinwodheya. Obe txino ninofuna wakamihedha attu ena, mbwenye enokala yorutxa sabwani anamudhi ehu anotabuwa. Masiki bili dhawene iyo ninofuna wakamihedha abali ehu, Yehova onowagalala aganona nakoselaga abali ehu ejile enwodhihu. (Gano 3:27; 19:17) Txini enfwanyela iyo okosa?

3. Ninsunza nni na anddimuwa a mmulogoni mwa Desi? (Jeremiya 23:4)

³ Enfwanyela okosa anddimuwa a mmulogoni. Akala weyo wa munddimuwa wa mmulogoni kaaziwe pama abali a mmulogoni. (Kengesa Jeremiya 23:4.) Desi, murogora mmodha ologiwe nsunzo nivirile ohiloga dhahi: “Anddimuwa a mmulogoni a nikuru nehu na mabasa a olaleya ahivitaganyiha na miyo vamodha na abali ena mmabasani a olaleya vina mmabasani mena.”b Guru dhikosile akumbuzi aba dhihimukamihedha Desi mmwadhehile eredda ya COVID-19 vina mwayeleli iyene anamudhi aye mwaha wa ereddaya.

4. Anddimuwa a mmulogoni amukamihedhile dhavi Desi nanda txini ensunzani?

⁴ Desi onotapulela: “Ninga miyo ddanaziwa pama anddimuwa a mmulogoni mwehu vina ali amarho aga kiyali yorutxa wapanga ejile yaddipadduwela vina makattamiho agumanimina.” Txini ensunzavo anddimuwa a mmulogoni? Mwakumbuze abale anasogorhela nyuwo ahinatti okala mmakattamihoni. Kalani amarho awa. Vina akala vanowiteya eredda enubarelani olaga na awene kove-na-kove, kavedani marhe a ologa na awene. Desi ohiloga: “Dila dhina anddimuwa enjene anddiligarela vasikuni obe anddivahedha mensagem.” Iyene owenjedhedha: “Malebo addengeselani anddiginya murima waga masiki miyo baddiziwile pama versudha esi.”

5. Anddimuwa a mmulogoni anaziwe dhavi nikamihedho ninfuna abali na arogora?

⁵ Elobo modha enawukamihedhe oziwa makattamiho angumanana abali na arogora awo ja ovikosa mavuzo a malago. (Gano 20:5) Awene ahikana yoja, ahikana murobwe, ehikalawo elobo yina enajombela? Vahikala ngovi enoniha wi anele oyelela ganyo obe numbaya yawa enele onongeya? Anofuna nikamihedho na guverno? Desi wahikamihedhiwa na dhilobo dhamujombela na abali ena. Mbwenye nikamihedho nomuyani nakeliliye ttimukamihedhile owanana makattamiho anfwanyile. Iyene ohiloga: “Anddimuwa a mmulogoni ahilobela vamodha na miyo. Masiki miyo ddihubuwelaga esile dhilogilani, ddinowubuwela mukalelo waviwilemo miyo, yakala ninga Yehova wela ologa ‘Weyo kuli weka.’”—Iza. 41:10, 13.

6. Txini enfwanyela okosa abali a mmulogoni wi akamihedhe attu ena? (Kang’ana foto.)

⁶ Enfwanyela okosa attu ena. Ninojeedhela wi anddimuwa a mmulogoni asogorhelege dhilobodha. Mbwenye Yehova ononiwoba iyo notene wila nalibihe vina nakamihedhe abali akwehu. (Gal. 6:10) Masiki ekale elobo eng’onovi enlagiha okwela wehu ejuwene enowodha omulibiha venjene muttu oli muredda. Enowodheya mwana omulebela kartau obe omukosela dezenyo mbali wa mmulogoni wi amulibihe. Enowodheya muzombwe odhowa omusika ogula dhilobo dha murogora. Ononamo dhavi osasanyedha yoja wi odhowe wattiye vatakulu va mbali oli muredda egawodheya? Enoziweya wi vamuruddani vagapadduwa eredda yovapeya abali otene a mmulogoni anofuna opangarhaziwa. Txino jofuneya otamela mudhidhi mung’onovi matugumano agamala wila nalibihe abali na arogora nikosaga ejuwene kove na kove obe na vidiyu konferensia. Anddimuwa a mmulogoni anofuna vina olibihiwa. Abali ena ahaperhengezela makarta anddimuwa a mmulogoni wi atamaalele, mwaha wa olabaga na guru mudhidhi obu wa oredda. Japama okosa epaddi yehu wila nakamihedhe vina nilibihena muttu na mukwaye!—1 Tes. 5:11.

WAKAMIHEDHE ATTU ENA VAGAPADDUWA EFOYO

7. Efoyo entota makattamiho gani orutxa?

⁷ Efoyo enozuzumiha egumi ya muttu mohijedheleya. Abale ampattiwa efoyo anoyelela dhawa, numbawa obe abale anakwelani. Abali vamodha na arogora ehu vina anopattiwa dhifoyo esi. Txini enfwanyela iyo okosa wi nakamihedhe?

8. Txini enfwanyela okosa anddimuwa a mmulogoni na amwazambo a ntakulu efoyo ehinatti opadduwa?

⁸ Enfwanyela okosa anddimuwa a mmulogoni. Anddimuwa a mmulogoni, kakamihedheni abali wi akale ovisasanyedhene efoyo ehinapadduwa. Mukaane ebaribari wi abali otene a mmulogoni, anoziwa marhe a ovibarela vina ahikana ewodhelo ya ologa na anddimuwa a mmulogoni. Margaret, ologiwe nsunzo nivirile ohiloga dhahi: “Anddimuwa a mmulogoni mwehu ahikosa epaddi ya dhofuneya dha vamulogoni anaddelaga wi motto obule waddumeyile takwa kuwattimile wotene. Ahiloga vina wi akala alamuleli a elabo anologa wi jofuneya obudduwa momaguva-mwene mmuruddanimwa, mubudduwe momaguva.” Muselu obu wali wofuneya sabwani muvirile sumana tanu motto wahitatamuwa mutakwani. Va webedhani wa ntakulu amwazambo anofwanyela wona txini enfwanyela okosa muttu ddi muttu vageteya efoyo. Akala weyo vamodha na anawo munokala ovisasanyedhene enele okala yovevuwa okala ofwaseyene vina obareleyene vageteya efoyo.

9. Anddimuwa a mmulogoni anawodhe dhavi olaba mumodhani efoyo ehinatti vina egamala opadduwa?

⁹ Akala weyo oli mwimeleli wa nikuru na olaleya, kakana ebaribari wi ohikana manumeru a abali otene a nikuru nawo ohinatti opadduwa efoyo. Okose lista nina manumero anlabana abaliya. Dhawene ogapadduwa efoyo weyo onele owodha ologa na namalaleya ddi namalaleya wa nikuru nawo wila oziwe nikamihedho ninfuniye. Ogamala omperhekele miseludha eso mwimeleli wa nikuru na anddimuwa a mmulogoni odduwene onamperhekele nameddelela milogo. Mugalaba mowiwana, munele okana dhopurelamo dhapama. Mmaleli ozwa takwa ejile, musogorheli wa anddimuwa a mmulogoni a mulogo wa Margaret kagonile mwari mwa mawora 36, sabwani wakela miselu dha anddimuwa a mmulogoni abuwene atamela ologa na abali vina arogora owakwana 450 attaweli mirudda dhina. (2 Kor. 11:27) Dhahene, otene afuna mburo wokala ahiwodha wakela nikamihedhona.

10. Anddimuwa a mmulogoni anfwanyelela nni wona ninga mabasa amakamaka walibiha abali? (Joau 21:15)

¹⁰ Wavaha nikamihedho nomuyani vina walibiha abale apattiwe na ezini mabasa a anddimuwa a mmulogoni. (1 Ped. 5:2) Vagapadduwa ezini, anddimuwa a mmulogoni anofwanyela vamaromo okana ebaribari wi abali na arogora ali obareleyene, ahikana yoja, guwo vina mburo wokala. Mbwenye dhigavira myeri dhinjidhene, abale anviluwa anele ofunavi nikamihedho vina olibihiwa. (Kengesa Joau 21:15.) Harold onlaba ninga mukamihedhi wa Filiali vina ontugumana vamodha na abali enjene apattiwe ezini ohiloga: “Enottukula mudhidhi wi muttu eyelele okala ninga mwaliye. Anodhaga oroma odduwala esile dhiyelelilani, mbwenye mobuwelo wo wayelela amudhawa vina mafumo awa na dhilobo dhina kunvira momaguva. Dhubuwelo esi dhinodhaga wattukulela wiwa opa wili. Okana dhubuwelo esi kahiyo otowa nroromelo, eji enompadduwela muttu-muttuvi.”

11. Nikamihedho gani ninfwanyelela ovahiwa anamudhi ampattiwa dhifoyo?

¹¹ Anddimuwa a mmulogoni anofwara malago a wi “onlaní na abale anunla.” (Rom. 12:15) Abali anviluwa ngovi ya efoyo anofuna ovahiwa nikuluvelo nawi Yehova vamodha na abali a mmulogoni anowakwela. Anddimuwa a mmulogoni vina ahikaana muttorho wa wakamihedha anamudhi aba ozuzumelavi mabasa a omuyani ninga olobela, nsunzo nomwinya, wona matugumano vina okamihedha mabasa olaleya. Anofwanyela vina wakokomeza amambali wila alibihe anawa ofwaseyela wona esile dhihinnongeya na efoyo. Ababi, mwakamihedhe anenyu oziwa wi Yehova ddi Marho wawa vina onakalege na awene. Kamudduwale wawaddela wi enowodheya okalavi mumodhani na abali ali orugunuwa elabo yotene abuwene ali omala-nawale wi anikamihedhe.—1 Ped. 2:17.

12. Txini enakose attu ena wi akamihedhe abale afwanyiwe efoyo? (Kang’ana foto.)

¹² Elobo enfwanyela okosa attu ena. Akala ehipadduwa efoyo vakukuvi, wavuze anddimuwa a mmulogoni wi awaddele enakose weyo wi okamihedhe. Txino enele ofuneya weyo wavaha mburo wokala abale apattiwe efoyoya obe abali ankamihedha mabasa a omaga. Obe enele ofuneya ovivelela wi wavahe dhoja vina dhinajombela anamalaleya. Akala efoyoya epadduwile oddayi enowodheya weyo okamihedha. Dhavi? Modhela walobelela abale apattiwe. (2 Kor. 1:8-11) Weyo txino onakose ejuwene na mivaho dhinakosiwe wila dhikamihedhiwena mabasaya. (2 Kor. 8:2-5) Akala weyo onowodha odhowa opadduwile efoyoya wi wakamihedhe, wavuze anddimuwa a mmulogoni enfwanyela weyo okosa wi okamihedhe. Agawobiwa wi odhowe wakamihedhe txino enele ofuneya ovahiwa maswagiho wi okale womala-nawale wila owodhe ottidda mabasaya anafuneye wenewo.

WAKAMIHEDHE ABALI OVILELA OFWARAFWARIWA

13. Makattamiho gani anfwanyiwa abali ankala dhilabo dhinkoddihiwa mabasa ehu?

¹³ Dhilabo dhinkoddihiwa mabasa ehu, ofwarafwariwa onorutxiha okalawo wa abali ehu. Abali ankala dhilabo-dhene eso anorutxiwa okana kobiri wi agule dhovikalihanawo, anokala aredda vina anowayelela mukwani attu okweleya. Sabwa ya ofwarafwariwa oku anddimuwa a mmulogoni txino kanwodha odhowa wenewo wi awonewo obe ologa na ofuru na abale anfuna olibihiwa. Jijene epadduwile na Andrei, ologiwe nsunzo nivirile. Murogora dhahi wa nikuru naye na mabasa a olaleya wahikana makattamiho a ofwanya kobiri. Wahikosa asidenti na karo. Yanfuneya okosiwa operasau vina kawodha olaba. Sabwa ya ofwarafwariwa vina COVID-19 abali ahikosa mpaka vawodhilani wila amukamihedhe nanda Yehova wanziwa yapadduwa.

14. Yotagiha gani yapama enfwanyela olagiha anddimuwa a mmulogoni ya omukuluvela Yehova?

¹⁴ Enfwanyela okosa anddimuwa a mmulogoni. Andrei wahilobela vina wahikosa mpaka vawodhiye. Yehova wakulile dhavi? Owalabihedha abali aye ana ofuru. Abali ena aninvelela murogora osipitale. Enagu ahinvaha kobiri wila emukamihedhe. Yehova wahattukulela abali aba okosa mpaka vawodhani vina iyene wahiruriha wiwanana wawa na oliba wawa murima. (Aheb. 13:16) Anddimuwa a mmulogoni, mabasa ehu agakoddihiwa mwattome abali ena wi awukamihedheni. (Jer. 36:5, 6) Opitta esi dhotene, mmukuluvele Yehova. Iyene ohikana ewodhelo yowukamihedhani wakwanihedha dhojombeliwa dha abali vina arogora.

15. Nitamele dhavi wiwanana na abalihu nihinatti ofwarafwariwa?

¹⁵ Enfwanyela okosa attu ena. Mabasa ehu agakoddihiwa, iyo txino nigatugumana makuru mang’ono. Nona jamakamaka wunuwiha ovanene murenddele na abalihu. Niwane na Satana ottiya na abalihu. Nidduwale dhovonya dha abalihu, kanijedhe ovira mudhidhi mwinjene nihiwananile na abalihu. (Gano 19:11; Ef. 4:26) Kakala womala-nawale wi wakamihedhe attu ena. (Tito 3:14) Nikamihedho ninvahile attu ena murogora oddule wajombeliwa ehiddiginya mirima dha abali a nikuru naye na mabasa a olaleya. Awene ahikalavi ofiyedheya ninga anamudhi.—Masal. 133:1.

16. Mowiwanana na Kolosi 4:3, 18, enwodheya dhavi iyo wakamihedha abali na arogora anfwarafwariwa?

¹⁶ Abali matxikwi na matxikwi anomulabela Yehova masiki afwarafwariwaga. Ena anofugeliwa sabwa ya nroromelo nawa. Enowodheya iyo walobelela amudhawa vina walobelela abali abale anika vangovini ofuru wawa wi akamihdhe abali na arogora mpaddi womuyani, womaningoni vina anoniha wi kana muladdu agattongiwaga.c (Kengesa Kolosi 4:3, 18.) Kupwaze guru ena nlobelo!—2 Tes. 3:1, 2; 1 Tim. 2:1, 2.

17. Onawodhe dhavi ovisasanyedhela ovanene ofwarafwariwa?

¹⁷ Enowodheya weyo vamodha na amudhawo ovisasanyedhela ovanene ofwarafwariwa. (Mer. 14:22) Kutamele wubuwela dhilobo dhabure dhotene dhigadhile opadduwa. Ottiya ejo, mulibihe mandano enyu na Yehova vina mwakamihedhe aninyu okosa yakakene. Akala dila dhina onokala wodhugudhene onfugulele murima wawo Yehova na nlobelo. (Masal. 62:7, 8) Ninga anamudhi, mulogele mwaha dhotene dhinenyuna dhinuttukulelani omukuluvela Yehova.d Dhawene, egapadduwa efoyo omukuluvela wawo Yehova vina ovisasanyedhela efoyo enele wavaha anawo guru ya oliba murima vina okana murenddele.

18. Dhilobo gani dhinjeedhelihu okana musogorho?

¹⁸ Murenddele wa Mulugu ononiwodhiha okala ofwaseyene. (Fil. 4:6, 7) Yehova onofwasiha murima wehu masiki na eredda yovapeya, vizini obe ofwarafwariwa masaka abano. Iyene onowalabihedha anddimuwa a mmulogoni anlaba na guru wila anikumbuze. Ononivaha notene gari yokamihedhana muttu na mukwaye. Murenddele onkanihu masaka abano ononisasanyedhela dhoweha dhinddimuwa dhinagumanihuna musogorho vina “goyi enddimuwa.” (Mt. 24:21) Mudhidhi obuwene iyo ninele ofuna okana murenddele vina wakamihedha attu ena okosa yakakene. Vano eso dhigavira, kaninafwanyiwe makattamiho annittiya odhugudheyene. Omagomelowa, ninele ojavo esile dhotene dhinnifunana Yehova—murenddele wawakwana vina wohimala.—Iza. 26:3, 4.