Onawodhe Dhavi Wagalala na Mabasa a Olaleya

1. Ena aniviwamo dhavi agàlaleyaga attu ena miselu dhapama? (Koona vina foto.)

NINGA nlogo na Yehova, iyo ninowalaleya attu ena sabwani ninomukwela Babi wehu wa wirimu vina ninofuna wakamihedha ena omuziwa iyene. Anamalaleya enji anoziveliwa na mabasa a olaleya. Mbwenyi ena anorutxiwa wagalala na mabasa aba. Sabwaya? Sabwani ena txino attu a manyazo, oku ena kanivikuluvela, ena kaniviwamo pama agadhowa vatakulu vanya se owobiwa, ena anodhaga wova ohivuruwaniwa oku ena ahisunzihiwa orabela wakulana na attu ena. Masiki amukwelaga venjene Yehova, abali aba na arogora anorutxiwa wawaddamela attu ahinaziwani wi alaleyele miselu dhapama. Masiki dhawene, awene anononelamo ttima ena mabasa aba, vina anovilibihedha mudhidhi na mudhidhi okamihedha mabasa a olaleya. Yehova onowagalala venjene na abali aba!

2. Akala onorutxiwa wagalala na mabasa a olaleya, sabwaya jani kunfwanyela okumuwa?

² Masaka mena onorutxiwaga wagalala na mabasa a olaleya? Akala ejo ehupadduwela, kukumuwe. Ejo enodhaga olagiha wi weyo oli muttu woviyeviha, kunfuna osibiwa vina kunfuna makani na attu ena. Ottiya ejo kawo muttu ohinziveliwa wakeliwa pama makamaka akala efunelo yaye ja omukosela opama muttu mwina. Kakana nikuluvelo nawi Babi wawo wa wirimu onoziwa makattamiho anupatta vina onofuna wukamihedha. (Iza. 41:13) Mwari mwa nsunzo ntti, ninele wona monelo mitanu dhinanikamihedhe owanana makattamiho aba vina mukalelo onawodhihu wagalala na mabasa olaleya.

KALIBIHIWA NA MAZU A MULUGU

3. Txini emukamihedhile namavuhulela Jeremiya walaleyela attu?

³ Oromana wale, Nzu na Mulugu nihakamihedha alabeli aye mudhidhi wakelani mabasa orutxa. Koona yotagiya ya namavuhulela Jeremiya, iyene wahittiddiwa wova mudhidhi wamwaddele Yehova wi wanfwanyela olaleya. Jeremiya ohiloga: “Miyo kaddinwodha ologa, sabwa ddili mima.” (Jer. 1:6) Txini emukamihedhile Jeremiya oliba murima wi awodhe olaleya? Yehova ologa na iyene vina omulibiha. Jeremiya ologa: “Mmurimani mwaga, nzu nenyu nali motho waddumeya magogoddo aga; ddantamela na guru ofugela mwenemo, kaddawodha.” (Jer. 20:​8, 9) Masiki Jeremiya alaleyaga murudda worutxa, muselu wakeliye wi avuwihe ohinvaha guru vina oliba murima wafuniye wi awodhe wakwaniha mabasa aye.

4. Txini empadduwa nigamwengesa Bibilia vina nigatanalela? (Kolosi 1:​9, 10)

⁴ Masaka abano Akristu anowakela guru dhinfunani modhela Bibilia. Mulebele Paulo mulogo w’o Kolosi, iyene ohawaddela wi kosunza venjene efunelo ya Yehova eji egahakamihedha “weddana makalelo animfwanyelela muthu wa Nabuya” vina “wima milima [dha mabasa] apama.” (Kengesa Kolosi 1:​9, 10.) Mabasa aba apama anowiwanana na mabasa a olaleya miselu dhapama. Nona nigamwengesa Bibilia vina nitanalela dhinengesihu omuroromela wehu Yehova onoliba, vina ninoroma ononelamo ttima ya walaleyela ena miselu dha Omwene.

5. Onawodhe dhavi opurelamo venjene agamwengesaga vina ogamusunzaga Bibilia?

⁵ Wi opurelemo venjene dhinengesiwe mBibiliani, kuwaguvetxe mudhidhi wa wengesa, osunza, vina wa otanalela. Okosege vang’ono-vang’ono. Akala onowengesa elobo ehinnonelamo weyo mowakwana-mwene, kulupe. Ottiya ejo, olabihedhe Índice das Publicações da Torre de Vigia obe Guia de Pesquisa para Testemunhas de Jeová wi ofanye makani antapulela versuya, akala onoburutxa mudhidhi wi osunze nofaseya onele olibiha nikuluvelo nawo nawi enloga Bibilia ebaribari. (1 Tes. 5:21) Nikuluvelo nawo nigonuwa onele wagalala ologa na ena mwaha wa esile dhinsunziwe.

OVISASANYEDHE PAMA

6. Ninfwanyelelani ovisasanyedha pama nihinadhowa mmabasani a olaleya?

⁶ Ogavisasanyedha deretu ohinadhowa mmabasani a olaleya, enele okala yovevuwa ologa na ena. Yezu ohakamihedha anamafwara aye ovisasanyedha ahinatti waruma murudda wadhowani olaleya. (Lk. 10:​1-11) Awene ahivirihamo dhetene dhasunzihiwani na Yezu, nona ahagalala venjene na dhetene dhiwodhilani okosa.—Lk. 10:17.

7. Ninawodhe dhavi ovisasanyedha nihinadhowa mmabasani a olaleya? (Koona vina foto.)

⁷ Ninavisasanyedhele dhavi mabasa a olaleya? Iyo ninofwanyela wubuwela vamaromo enfwanyelihu ologa, vasogorhova nitamele ologa na mazu ehu. Katamela oziwa mukalelo onakele attuya miselu dhinlaleyiwe vina mukalelo onakule weyo mavuzo awa. Venevo nigafuna ologa na muttuya ninofwaseya, ninottugareya vina ninokala wofiyedheya.

8. Na mukalelo gani Akristu ali ninga yobo y’ologo elogile murumiwi Paulo?

⁸ Paulo ohawaddela Akristu: “Nifumo-nthi, iyo ninothukula mmaningoni mwehu, ali ninga yobo y’ologo.” (2 Kor. 4:7) Nifumo ntti ttivi? Mabasa a olaleya anvuna dhigumi vina dhinloga mwaha wa Omwene wa Mulugu. (2 Kor. 4:1) Yobo y’ologo nintapulela nni? Nintapulela adhari a Mulugu analaleyela attu ena miselu dhapama. Nsaka na Paulo, aliba marhondda anlabihedha yobo y’ologo wi attukule vina akoye dhilobo dhattima, ninga dhoja vinyu na kobiri. Na mukalelo wakakene iyo ninladdanihiwa na yobo y’ologo vina Yehova ononilabihedha wi nittukule miselu dhapama. Na nikamihedho na Yehova iyo nihikana guru dhinfunihu wi nidhowegevi nilaleyaga.

OLOBELE OKUMBIRHAGA OLIBA MURIMA

9. Ninawodhe dhavi opemberha wawova attu obe wova ohivuruwaniwa? (Koona vina foto.)

⁹ Masaka mena ninodhaga wawova attu vina wova ohivuruwaniwa. Ninawodhe dhavi opemberha wova oku? Koona nlobelo nikosile arumiwi mudhidhi okoddihiwani olaleya. Ottiya opemberhiwa na wova, ahimukumbirha Yehova nikamihedho wi adhowegevi alaleyaga miselu dhapama na oliba murima. Momaguva-mwene Yehova wahakula nlobelo nawa. (Mer. 4:​18, 29, 31) Akala masaka mena ninopattiwa na wova mmalaleyoni, ninofwanyela omulobelela Yehova nikumbirhaga nikamihedho. Kamukumbirhe Yehova wi awukamihedhe wakwela attu wi owodhe walaleya miselu dhapama.

10. Yehova onnikamihedha dhavi wi nikale anamoona aye? (Izaiya 43:​10-12)

¹⁰ Yehova ohinisakula wi nikale Anamoona aye vina iyene ohipikirela onikamihedha oliba murima. (Kengesa Izaiya 43:​10-12.) Ninele wona mikalelo minai dhinlabihedhiye wi anikamihedhe. Yoroma, Yezu oli na iyo mudhidhi wetene onlaleyihu miselu dhapama. (Mt. 28:​18-20) Yanawili, Yehova ohattoma anju wi anikamihedhe okosa mabasa aba. (Ovuh. 14:6) Yaneraru, Yehova onolabihedha muya waye wokoddela wi anikamihedhe wubuwela dhetene dhisunzilihu. (Jo. 14:​25, 26) Yanonayi, ninokana nikamihedho na abalihu nigalaleyaga. Na nikamihedho na Yehova, abalihu na arogora okweleya, iyo nihikana dhetene dhinfunihu wi nilibe murima vina nidhowegevi nilaleyaga.

OVIPARHAPATTELE VINA OKANE MONELO WOFWANYELELA

11. Onawodhe dhavi wafwanya attu enji ogakala mmabasani a olaleya? (Koona vina foto.)

¹¹ Weyo onokumuwa ogàfwanya attu ang’onovi obe ogahafwanye attu mmatakuluni mwawa? Kavivuze: ‘Attuya anfwanyeya wuvi mudhidhi obuno?’ (Mer. 16:13) ‘Ali o mabasani obe adhowile omusika?’ Akala jijuwene, ogahiwodha wafwanya attu ena ogalaleyaga murampani? Mbali dhahi onkuweliwa Josue ohiloga, “Ddihitamela marhe a olaleya mudhidhi onnedda miyo mmamisika vina mwego munfwanyeya attu enji.” Iyene na mwadhiye Bridget, anowafwanyaga attu mmawani mwawa agadhowa olaleya na mattiyu obe na Maddimingu na txiguwo.—Ef. 5:​15, 16.

12. Ninawodhe dhavi ozinddiyela ejile enrumela attu vina enadhugudha?

¹² Akala onozinddiyela wi muttuya kanfuna ovuruwana miselu dhinlaleyiwe, katamela oziwa enrumela iyene vina dhinimuzuzumiha. Josue na Bridget anolabihedha nivuzo ninfwanyeya nikuku noroma na folhetu wi aromena makani. Motagiha, alabihedhaga folhetu Onimoona dhavi Bibilia? awene anologa: “Attu ena anubuwela wi Bibilia nivuru na Mulugu oku ena anowaganyedha. Monelo wawo buvi?” Dila dhinji eji enowattukulela awene okana makani apama.

13. Ninlogela nni wi mabasa ehu anosogorha masiki akala attu kanfuna onivuruwana? (Gano 27:11)

¹³ Masiki akala attuya kanvuruwana miselu dhinlaleyihu mabasa a olaleya anosogorhavi. Sabwaya jani? Sabwani iyo ninkosa ennifunana Yehova vina Mwanaye Yezu—olaleya miselu dhapama. (Mer. 10:42) Masiki akala kanininfwanya muttu wi nilogena obe attu anokodda ovuruwana miselu dhinlaleyihu, enowodheya iyo wagalala sabwani ninoziwa wi ninomwagalaliha Babi wehu wa wirimu.—Kengesa Gano 27:11.

14. Txini ennittukulela wagalala akala mbali ononfwanya muttu onrumela miselu dhinlaleyihu?

¹⁴ Iyo ninowagalala venjene mbali aganfwanya muttu onfuna ovuruwana miselu dhinlaleyihu. Mwang’aneli ohiladdaniha mabasa a olaleya na omutamela mwana orimelile. Attu enjene anovilibihedha omutamela mwanaya mmimburhoni dhottiyana-ttiyana. Venevo mwanaya agafwanyiwa—kahiye muttuya onfwanyile onagalala bahi—mbwenyi otene anowagalala. Na mukalelo wakakene mulogo wotene onokamihedha mabasa a walaleya attu a murudda ottomeliwehu, vina iyo notene ninowagalala muttu agaroma wona matugumano ehu.

OZUZUMELE OMUKWELA YEHOVA VINA ATTU

15. Ovirihamo nlebo na Mateu 22:​37-39 ennikamihedha dhavi ottangaramela mabasa a olaleya? (Koona vina ya kapa.)

¹⁵ Enowodheya ozuzumela mabasa a olaleya modhela wubuwela mukalelo onimukwelihu Yehova vina attu ena. (Kengesa Mateu 22:​37-39.) Kobuwela wagalala onkana Yehova aganonaga nizuzumelaga mabasa a olaleya vina wagalala onkana attu sabwa ya oroma omusunza Bibilia! Kobuwela wi otene anvuruwana miselu dhinlaleya iyo vina angana omulabela Yehova anodhaga okana gari ya okalawo namukalakala.—Jo. 6:40; 1 Tim. 4:16.

16. Ninawodhe dhavi ofwanya wagalala mmabasani ehu a olaleya masiki akala kaninwodha obudduwa vatakulu? Kavaha dhotagiha.

¹⁶ Kito ogahiwodhe obudduwa vatakulu sabwa ya elobo-txilobo enupatta? Akala ejo enopadduwa, kazuzumela okosa enwodhiwe wi olagihe omukwela wawo Yehova vina wakwela attu ena. Mudhidhi wa ezini ya COVID-19, Samuel na Dania kawodha obudduwa vatakulu. Mwari mwa mudhidhi obu worutxa, awene anlaleya alabihedhaga telefoni, makarta vina annedhiha masunzo a Bibilia alabihedhaga Zoom. Samuel wannavaha onamoona attu otene àfwanyiye o clínica yang’aniwiye sabwa ya eredda ya kanser. Iyene ohiloga: “Makattamiho anodhaga onittiya wolemene mpaddi wa muyubuweloni, womaningoni vina womuyani. Nona jamakamaka ofwanya wagalala mmabasani animuttiddelihu Yehova.” Mudhidhene obo, Dania wahigwa bakala myeri miraru se owodha wedda. Musogorhomwa iyene wahiroma wedda na kadera ya maroda mwari mwa myeri mitanu na modha. Iyene ohiloga: “Miyo ddihivilibihedha okosa yawodhimi mwari mwa makattamiho addipatta. Miyo ddannimulaleyela enfermera wadha oddona vina attu adhana dhilobo vatakulu. Ottiya ejo ddanloga makani apama ddilabihedhaga telefoni na muyana dhahi wali mwimeleli wa empereza yaddikamihedha wang’anela egumi yaga.” Sabwa ya makattamiho àpatta, Samuel na Dania kawodha okosa venji ninga mwakoselani wale, masiki dhawene awene ankosa mpaka mwawodhelani vina ahagalala venjene na dhopurelamodha.

17. Onawodhe dhavi opurelamo monelo dhilogiwe mwari mwa nsunzo ntti?

¹⁷ Kavilibihedhe ovirihamo ttarho esi ttanu dhonilehu mwari mwa nsunzo ntti. Monelo modha-modha oli ninga engredienti onlabihedhihu wi nipiyena dhoja. Nigataganyiha engredienti dhotedhene endelavoya, yoja yoziva. Sabwa ya ovirihamo monelo esi ninele okala omala-nawale wi niwane na dhubuwelo dhohifwanyelela vina ninele okana wagalala mmabasani a olaleya.