Onowodha Ottiyaniha Ebaribari na Ottambi?

1. Oniviwamo dhavi sabwa ya osunza ebaribari?

NINGA nlogo na Yehova iyo ninokwela ebaribari enfwanyeya mBibiliani vina nroromelo nehu nindela mBibiliani. (Rom. 10:17) Iyo ninokuluvela wi Yehova ohita mulogo Wokristu ninga “ntxikwa [vina] musathi wa ebaribari.” (1 Tim. 3:15) Ninowagalala venjene wawiwelela abale annisogorhela. Abali aba anononihedhamo ebaribari ya mBibiliani vina anonikamihedha okalawo mowiwanana na efunelo ya Mulugu.—Aheb. 13:17.

2. Mowiwanana na Tiago 5:​19, txini egadhile opadduwa mmalelihu osunza ebaribari?

² Mbwenyi masiki mmalelihu osunza ebaribari ya mBibiliani vina orumela ofwara malago a nikuru na Yehova, ninodhaga ogwela vamuregani banittiya ofwara malagoya. (Kengesa Tiago 5:19.) Satana agahiziveliwa iyo kuttiya omukuluvela Bibilia vina malago anakelihu munikuruni na Yehova.—Ef. 4:14.

3. Ninfwanyelela nni okalavi oweddeyana na ebaribari? (Éfeso 6:​13, 14)

³ Kengesa Éfeso 6:​13, 14. Mohigonela Satana onele ovuwiha miselu dhottambi dhinattukulele malogo olupela nlogo na Yehova. (Ovuh. 16:​13, 14) Iyo vina ninoziwa wi satana onele okosa muli-mwetemwene wi anyengette nlogo na Mulugu. (Ovuh. 12:9) Nona, jamakamaka ovishagiha ovanene wi niwodhe ottiyaniha ebaribari na ottambi vina okalavi mwibaribarini. (Rom. 6:17; 1 Ped. 1:22) Wi niviluwe mu goyini enddimuwa enele ofuneya okosa ejuwene!

4. Txini enasekeserhe iyo mwari mwa nsunzo ntti?

⁴ Mu nsunzoni ntti ninele wona mikalelo minli dhinanikamihedhe ozinddiyela ebaribari ya mBibiliani vina orumela osogorheliwa na nikuru na Yehova. Musogorhomwa ninele osekeserha moonelo miraru dhinanikamihedhe odhowavi nittiddelaga ebaribari.

MIKALELO DHINFWANYELIHU OKANA WI NIWODHE OZINDDIYELA EBARIBARI

5. Omova Yehova onanikamihedhe dhavi ozinddiyela ebaribari?

⁵ Omova Yehova. Omova Yehova entapulela wi iyo ninomukwela venjene, sabwa ya ejuwene kanigafunile okosa elobo-txilobo egamunyimulile, nona iyo ninofuna osunza ottiyaniha yapama na yabure, ebaribari na ottambi wi nirumeliwe na Yehova. (Gano 2:​3-6; Aheb. 5:14) Vowi dila dhinjene dhinziveliwa attu dhinomusilidha Yehova, iyo txipo kaninfwanyela ottiya wi wawova attu okale onddimuwa opitta omukwela wehu Yehova.

6. Anamabeddegela kumi attiyile dhavi ologa ebaribari sabwa ya wawova attu?

⁶ Akala wawova attu onokala onddimuwa opitta omova Yehova ninodhaga ottiya ebaribari. Katanalela yotagiha ya anamabeddegela kumi na eli adhowile wona elabo yapikirhele Yehova wavaha ana Izrayel. Ena kumi mwa abuwene, ahittiya wi wawova attu okale onddimuwa opitta omukwela wawa Yehova. Awene ahawaddela dhahi ana Izrayel otene: “Kaninwodha owana na awene, vowi akana guru opitha iyo.” (Oleb. 13:​27-31) Ebaribari wi na moonelo wa attu, Akadda Kaná ali oliba opitta ana Izrayel. Mbwenyi ologa wi kagawodhile wapemberha amwiddani awa yatapulela ohimukuluvela Yehova. Anamabeddegela abale kumi anfwanyela ozuzumela ejile yafunana Yehova ana Izrayel. Awene vina anfwanyela otanalela dhotene dhakoseli Yehova mundduni. Dhahene awene agahubuwela wi akadda Kaná kali elobwene vamentoni va Yehova oli namawodha-wodha. Mottiyana na alobwana aba, Jozuwé na Kaleb anfuna orumeliwa vamentoni va Yehova. Awene ahawaddela ana Izrayel: “Mulugu aganifunana, onoziwa onivolotxamo, onivaha [elaboya].”—Oleb. 14:​6-9.

7. Ninalibihe dhavi omova Yehova? (Koona vina foto.)

⁷ Wi nunuwihe omova wehu Yehova, ninofwanyela ozuzumela enimuzivela dila dhotene dhinkosihu dhogana. (Masal. 16:8) Ogengesaga mapadduwo a mBibiliani kavivuze, ‘Kukala miyo ddigaganile okosa elobo gani?’ Motagiha mudhidhi ologile anamabeddegela abale kumi miselu dhawobaniha. Weyo ogahirumela dhologa dhawa, ogahawova attu obe omukwela wawo Yehova ogahuttukulela omwagalaliha? Nlogo na Izrayel kafunile orumela ebaribari yalogile Jozuwé na Kaleb. Sabwa ya ejuwene awene ahiyelela gari ya ovolowa Mwilaboni Yopikirheliwa.—Oleb. 14:​10, 22, 23.

8. Mukalelo gani onfwanyelihu wunuwiha vina sabwaya jani?

⁸ Oviyeviha. Yehova onanonihedhamo bahi ebaribari abale ali oviyeviha. (Mt. 11:25) Na oviyeviha iyo ninorumela nikamihedho ninakelihu wi nisunze ebaribari. (Mer. 8:​30, 31) Masiki dhawene, ninofwanyela okala txenjewa wi ninadhe okala attu ovittukulela. Ejo egapadduwa ninodhaga oroma wubuwela wi moonelo dhehu silitxi dhamakamaka opitta magano a mBibiliani vina malago a nikuru na Yehova.

9. Ninawodhe dhavi okalavi attu oviyeviha?

⁹ Nigafuna okalavi attu oviyeviha, ninofwanyela wubuwela wi nigaviladdaniha na Yehova, iyo kanili elobwene. (Masal. 8:​3, 4) Vina ninofwanyela olobela wa Yehova nikumbiraga nikamihedho wi nikale attu oviyeviha vina nirumele osunzihiwa. Yehova ononisunziha dhubuwelo dhaye modhela Bibilia vina nikuru naye. Iyene vina onele onikamihedha ovaha ttima marhe anlabihedhiye ottiya dhubuwelo dhehu. Ogamwengesaga Bibilia, katamela wona mukalelo onkwela Yehova oviyeviha vina onidda iyene ovittukulela na opanela. Kakosa guru wi okalevi muttu woviyeviha akala onowakela mabasa anawuvahe ettomo.

NINAWODHE DHAVI OTTIDDELAVI EBARIBARI

10. Yehova omulabihedhile ani wi avahe malago vina asogorhele nlogo naye?

¹⁰ Okuluvele nikuru na Yehova. Masaka a mundduni Yehova wahimulabihedha Mizé, vina musogorhomwa Jozuwé wi avahe malago nlogo na Izrayel. (Jos. 1:​16, 17) Ana Izrayel anrurihiwa vawonani alobwana aba ninga emeleli a Yehova. Vyaka mazana menjene musogorhomwa vetiwe mulogo Wokristu, arumiwi kumi na eli basogorhela nlogo na Mulugu. (Mer. 8:​14, 15) Musogorhomwa nikuru ntti nahunuwa vina nahitaganyiheya na anddimuwa ena a mmulogoni o Jeruzalemi. Sabwa ya ofwara malago akelani na alobwana aba ororomeleya, “[milogo] dhanliba muroromelani; muthengo wa akristu wanunuwa siku-siku.” (Mer. 16:​4, 5) Masaka abano, iyo vina ninorurihiwa venjene nigewelela malago a nikuru na Yehova. Yehova agavihiwilemo dhavi iyo kokodda warumela abale asakuliye wi anisogorhele? Enowodheya wakula nivuzo ntti nigoona yapadduwile ana Izrayel mudhidhi wadhowani Elabo Yopikirheliwa.

11. Txini yapadduwele abale akoddile omwiwelela Yehova vina abale àsakuleliye wi asogorhele nlogo naye? (Koona vina foto.)

¹¹ Nsaka dhahi ana Izrayel mudhidhi wadhowani Mwilaboni Yopikirheliwa anddimuwa a nlogo ahimusadduwela Mizé vina mabasa avahiwiye na Yehova. Awene ahiloga: “Akadda nlogo notene [ottiya Mizé bahi] anomukoddelela Nabuya; Nabuya onkala vari vawa.” (Oleb. 16:​1-3) Masiki ekalaga ebaribari wi mwa Yehova nlogo notene nali nokoddela iyene wamusakulile Mizé wi asogorhele nlogona. (Oleb. 16:28) Amusadduwelaga Mizé, mwebaribari alobwana aba ela omusadduwela Yehova. Awene kazuzumeli efunelo ya Yehova; ottiya ejo azuzumeli dhifunelo dhawa—okana nttittimiho vina ettomo. Yehova ohatolotxa alobwana abale vina ena matxikwi na matxikwi ali mpaddi wawa. (Oleb. 16:​30-35, 41, 49) Na mukalelo wakakene masaka abano ninoziwa wi Yehova kanarumela abale ahinfwara malago a nikuru naye.

12. Ninfwanyelela nni okuluvela nikuru na Yehova?

¹² Enowodheya iyo vina okuluvela nikuru na Yehova mudhidhi wetene. Egafuneya okosa matxinjo wa esile dhinrumelihu dhiniwanana na ebaribari ya mBibiliani obe mukalelo onimwebedhihu Yehova, abale ansogorhela nikuru na Yehova anokosa momaguva matxinjoya. (Gano 4:18) Awene ankosa ejuwene sabwani anofuna omwagalaliha Yehova. Awene vina anovilibihedha okosa dhogana esi mowiwanana na enloga Mazu a Mulugu. Oddule oli mudhari wa Yehova onofwanyela okosa ejuwene.

13. “Mazu a egumi,” antapulela eni vina txini enfwanyelihu okosa?

¹³ “Fwará mazu a Egumi.” (2 Tim. 1:13) “Mazu a egumi” anaddiwana masunziho a Okristu anfwanyeya mBibiliani. (Jo. 17:17) Esuwene dhili nipara na dhetene dhinrumelihu. Nikuru na Yehova ninonisunziha ottiddela masunziho aba. Nigakosa ejuwene ninele orurihiwa.

14. Akristu ena a masaka a mundduni attiyile dhavi ofwara “mazu a egumi”?

¹⁴ Txini egadhile opadduwa iyo kuttiya ofwara “mazu a egumi”? Koona yotagiha eji. Nsaka zana noroma Akristu ena anvuwiha miselu dhottambi dhaloga wi siku na Yehova namala ofiya. Enoneya ninga awene ahakela karta—txino yalebiwe na murumiwi Paulo—yaloga ejuwene. Ahikanaga matibelo owakwana Akristu ena o Tesalónika ahirumela miselu esi vina ahiroma wawaddela attu ena. Awene kutanalela dhasunzilani na Paulo kaganyengettiwe. (2 Tes. 2:​1-5) Paulo wahawaddela abali aba wi kafwanyela orumela dhotene dhewa awene. Wi akamihedhe musogorho, Paulo ohipuliha karta yanawili yalebeliye akadda Tesalónika alogaga: “Miyo Paulo ddamwinyene ddinowurumelani malejelo, alebilemi na madaga. [Ezinddiyelo] enafwanyegena nyuwo karta dhaga dhetene, jijene. Miyo Paulo mulebani, madaga babene.”—2 Tes. 3:17.

15. Ninawodhe dhavi orabela miselu dhottambi dhinkala ninga dhebaribari? Kavaha yotagiha. (Koona vina mafoto.)

¹⁵ Txini ensunzihu na mazu alebele Paulo akadda Tesalónika? Nigewa muselu ohiniwanana na ejile ensunzihu mBibiliani obe nigaziwa miselu dhinkala ninga dhebaribari ninofwanyela okana eziwelo. Nsaka dhahi akadda União Soviética àli amwiddani ehu, ahavahedhela abalihu karta nakala ninga nadhela o’katti enddimuwa. Kartana naloga wi abali ena anfwanyela wita nikuru nawa nigawodhilani ovisogorhela. Kartana nakala ninga nali na ebaribari. Mbwenyi abali àli wororomeleya kanyengettiwe. Awene ahizinddiyela wi miselu dhali mukartanimwa kadhewanana na esile dhasunzilani. Masaka abano vina abale anidda ebaribari dila dhinji anolabihedha internet na redes sociais wila avuwihe miselu dhottambi vina atote ogawana.Ottiya onyanyala mweddelo wehu ninofwanyela otanalela nofwaseya akala dhiniwihu obe dhinengesihu dhinowiwanana na dhibaribari dhinsunzihu.—2 Tes. 2:2; 1 Jo. 4:1.

16. Mowiwanana na Roma 16:​17, 18, txini enfwanyelihu okosa akala muttu onottiya ebaribari?

¹⁶ Odhowegevi okalaga wowiwananeyana na abale aneddeyana na Yehova. Yehova onfuna wi nimwebedhe iyene mumodhani na abalihu. Iyo ninele owodha okosa ejuwene nigattiddelavi ebaribari. Muttu onvuwiha miselu dhihiniwanana na ebaribari onowita ogawana mmulogoni, nona Yehova ononaddela wi narabele. Nigahikose ejuwene ninodhaga oroma orumela dhilobo dhihili dhebaribari vina ottiya omwiwelela Yehova.—Kengesa Roma 16:​17, 18.

17. Dhopurelamo gani dhinkana iyo sabwa ya ozinddiyela ebaribari vina ottiddelavi?

¹⁷ Nigazinddiyela ebaribari vina nittiddelavi ninowodha okalavi ofiyedheya na Yehova vina nroromelo nehu ninoliba. (Ef. 4:​15, 16) Ottiya ejo kaninanyengettiwe na masunziho ottambi a Satana vina ninele owodha okala wobareleya na nikamihedho na Yehova mu goyini enddimuwa. Nona kattiddelani ebaribari dhahene “Mulugu onvaha murenddele, onokala na nyuwo.”—Fil. 4:​8, 9.