Okale Txenjewa wi Onagwele Munyengetteyani

1-2. (a) Malago gani avahile Yezu anamasunza aye? (b) Anamasunza a Yezu amunyanyaleli eni? (Koona vina mafoto.)

YEZU ohiloga dhahi “txibarene, muya onofuna; vano maningo bobanile.”a (Mt. 26:41b) Mazu aba anolagiha wi Yezu, wanziwa wi nili attu ohiligana vina ninodhaga okosa yottega. Mbwenyi vina anonitxejeriha: Ninofwanyelela ohivikuluveletxa. Yezu ahinatti ologa mazu aba omattiyu obulene, anamasunza aye ahiloga wi txipo kagamunyanyalile. (Mt. 26:35) Ejile yalogilani yali yapama. Mbwenyi kaazinddiyeli mukalelo ogamunyanyalani momaguva sabwa ya makattamiho agadhile wapatta musogorho. Nona Yezu wahawaddela dhahi: “Kakalani txenjewa mudidele olobela, wila munagwele munyengetteyani.”—Mt. 26:41a.

² Mokubanya-mwene, anamasunza a Yezu kadhowilevi akalaga txenjewa. Mufugeliwe Yezu anamasunza aye àlivi na iyene obe ahumuttawa sabwa ya wova? Sabwa ya ohikala txenjewa anamasunza a Yezu ahikosa ejile elogilani wi kagakosile—awene ahimunyanyala Yezu.—Mt. 26:56.

3. (a) Wi nikale aweddeyana na Yehova ekaleleni yapama ohivikuluveletxa? (b) Txini enonihu mu nsunzoni ntti?

³ Iyo kaninfwanyela ovikuluveletxa. Ebaribari wi ninovilibihedha mpaka vanwodhelihu wi nihimunyimule Yehova. Mbwenyi, nili attu ohiligana sabwa ya ejuwene enokala yovevuwa okosa dhilobo dhabure. (Rom. 5:12; 7:​21-23) Mohijedheleya-mwene, ninodhaga wehiwa wi nikose elobo yabure. Wi nikalevi aweddeyana na Yehova vina Mwanaye, ninofwanyela ofwara malago a Yezu a okala txenjewa nigagumana yoweha. Nsunzo ntti ninele onikamihedha okosa ejuwene. Vamaromo ninele woona mudhidhi gani onfwanyelihu okala txenjewa. Musogorhomwa ninele woona ninawodhe dhavi orabela dhoweha. Omamalelo ninele woona txini enanikamihedhe okalavi txenjewa.

KAKALA TXENJEWA —NA DHOWOBANA DHAWO?

4-5. Ninfwanyelela nni okalela txenjewa dhottega dhinoneya ninga dhing’ono?

⁴ Masiki dhottega dhinoneya ninga dhing’ono dhinodhaga wobaniha mandano ehu na Yehova. Vina dhinodhaga onittukulela okosa dhottega dhinddimuwa.

⁵ Iyo notene ninodhaga ogumanana dhoweha dhiganittukuleli okosa yottega. Mbwenyi, muttu-muttu ohikana yowobana ninga: Okosa yottega enddimuwa, okana mweddelo wonyakuwa obe weddihiwa na mweddelo wa mwilaboni. Ena txino anowanana efunelo ya okosa mararuwo. Ena anowanana mweddelo wohifwanyelela ninga ovitxatxela vina wawona attu bali yovi. Oku ena anowanana wawova attu vina ena anorutxiwa orumela monelo dha attu ena. Txino ena anowanana ekalelo ya owali obe dhilobo dhina. Ninga mulogile Tiago; “muttu-muttu onehiwa na vidhivi-dhivi dha mmurimani mwaye.”—Tia. 1:14.

6. Iyo notene ninfwanyelela oziwa eni?

⁶ Weyo onoziwa dhowobana dhawo? Jawopiha ologa wi kanina dhowobana vina ninele owodha owanana yoweha-yowehavi. (1 Jo. 1:8) Mbwenyi kudduwale, Paulo ohiloga wi masiki abale ana ettomo anodhaga okosa yottega agahikale txenjewa. (Gal. 6:1) Nona ninofwanyelela oziwa wi iyo notene nihikana dhowobana.—2 Kor. 13:5.

7. Ninfwanyela ovibarela mwa eni? Kaladdaniha.

⁷ Vamalilehu ozinddiyela dhowobana dhehu, txini enfwanyelihu okosa? Ninofwanyela ovilibihedha wi nihigwele munyengetteyani. Wi niladdanihe, masaka a Bibilia dhipaddi dhawobana dha rhinga dha sidadi dhali misuwo. Jijuwene yattukulela okalavo anamang’anela enjene. Na mukalelo wakakene ninofwanyelela okala txenjewa na dhowobana dhehu wi niwodhe owanana dhoweha dhiganittukulele ottega.—1 Kor. 9:27.

NINAWODHE DHAVI OKALA TXENJEWA

8-9. Muzombwe onlogiwa va Gano kapitulu 7 agawodhile dhavi orabela okosa yottega enddimuwa? (Gano 7:​8, 9, 13, 14, 21)

⁸ Ninawodhe dhavi okala txenjewa vina orabela dhoweha dhiganittukulele okosa yottega enddimuwa? Enowodheya osunza na muzombwe onlogiwa va Gano kapitulu 7. Iyene wahikosa mararuwo na muyana wali jeberuwa. Versu 22 enologa wi muzombwe oddule wahinfwara momaguva-mwene. Makaniya anowoniha wi muzombweya ohikosa dhilobo vang’ono-vang’ono dhimuttukuleli ottega.

⁹ Txini emuttukulele muzombwe oddule ottega? Vamaromo-vene vati varibaga, iyene wahifwara dila enaddamela wa muyana ole wa jeberuwa. Vasogorhova iyene wahifiya vatakulu vaye. (Kengesa Gano 7:​8, 9.) Musogorhomwa vamoneliye muyanaya kamuttawile. Ottiya ejuwene, iyene orumela ovahiwa beju na muyanaya vina ohivuruwana dhalogiye wila ohiperheka mukutto wowandaniha. Txino iyene wafuna wi muzombwe oddule obuwele wi wali muttu wapama. (Kengesa Gano 7:​13, 14, 21.) Muzombweya kohikosa dhilobo esile kagagweli vamuregani ya okosa yottega enddimuwa.

10. Muttu agadhile dhavi okosa yottega yakakene ekosile muzombwe oddule?

¹⁰ Nipadduwo ntti ninowoniha endhaga ompadduwela muttu-muttu wa iyo. Txino ninodhaga okosa yottega enddimuwa banubuwela wi dhilobodha dhipadduwile momaguva-mwene. Txino ena anologa, “Dhilobodha dhipadduwile mohijedheleya-mwene.” Mbwenyi nigatanalela deretu ninowona wi yottega eji yodhelavo ya dhogana dhabure. Txino dhotene dhiromile na ohasakula deretu amarho vina mavego aniwanana na mweddelo wa mwilaboni, saiti dhapepesiye—obe mimburho dhakaliye dhali dhohifwanyelela mwa Mukristu. Txino muttuya wahittiya olobela, omwengesa Bibilia, wona matugumano vina odhowa mmabasani olaleya. Dhahene ninga muzombwe onlogiwa munivuruni na Gano, txino yottega eji kipadduwile momaguva.

11. Wi nihikose yottega, txini enfwanyelihu orabela?

¹¹ Ninsunzavo eni na nipadduwo ntti? Iyo kaninfwanyelela orabela yottega bahi mbwenyi ninofwanyelela orabela ejile enanittukulele ottega. Salomau ohinonihedhamo ejuwene na ejile empadduwele muzombwe oddule vina muyana wa jeberuwa. Iyene alogaga mwaha wa muyana oddule wa jeberuwa, ohinivaha nlago ntti: Kufware dila yawa. (Gano 7:25) Iyene vina ohiloga dhahi: “Omutxatxame muyana wa dhawene, kunyigale vatakulu vaye.” (Gano 5:​3, 8) Ejo ebaribari, wi nihikose yottega ninofwanyela orabela elobo eganittukuleli omunyimula Yehova.b Ejo eniwanana na orabela dhilobo dhinoneya ninga kahiye dhabure mwa Akristu mbwenyi dhiganittukuleli okosa yottega. —Mt. 5:​29, 30.

12. Job waganile eni vina eji emukamihedhile dhavi ohigwela munyengetteyani? (Job 31:1)

¹² Wi nirabele okosa yottega, ninofwanyelela ogana okosa dhilobo dhapama. Jijuwene ekosile Job. Iyene wahikosa nipagano na mento aye wi kagawang’anile anamwali na dhifunelo dhonyakuwa. (Kengesa Job 31:1.) Sabwa ya okosa ejile yaganiliye mmurimani mwaye wahiwodha orabela okosa mararuwo. Enowodheya iyo vina ogana orabela elobo-txilobo eganittukuleli ogwela munyengetteyani.

13. Ninfwanyelela nni obarela mubuwelo wehu? (Koona vina mafoto.)

¹³ Iyo vina ninofwanyelela obarela dhubuwelo dhehu. (Obud. 20:17) Ena anubuwela wi agahikose elobo yabure kavali makani otanalelaga mukalelo ogali dhilobodha kokosa yottega. Mbwenyi mukalelo obu wa wubuwela bwabure vaddiddi. Muttu onivitanalela akosaga yottega mwebaribari iyene onowunuwiha efunelo ya okosa yottega. Iyene onovika vamuregani onfwanyeliye owanana. Ebaribari wi dila dhina ninodhaga okana dhubuwelo dhabure. Enfuneya ja orabela momaguva-mwene dhubuwelo esi baniroma wubuwela dhilobo dhapama. Nigakosa ejuwene kaninattiye dhubuwelo dhabure wunuwa mpaka okosa yottega enanirutxe owanana. —Fil. 4:8; Kol. 3:2; Tia. 1:​13-15.

14. Txini enanikamihedhe orabela okosa yottega?

¹⁴ Txini enfwanyelihu okosa wi nirabele ogwela va muregani wa okosa yottega? Ninofwanyelela okana nikuluvelo nawi wiwelela malamulo a Yehova onodhana maruriho. Dila dhina enokala yorutxa wiwananiha dhifunelo vina dhubuwelo dhehu na efunelo ya Mulugu. Nigavilibihedha okosa ejuwene, ninele okana mubuwelo wotxena vina ninele okana dhopurelamo.

15. Ekalele nni yofuneya wunuwiha dhifunelo dhapama?

¹⁵ Iyo notene ninofwanyelela wunuwiha dhifunelo dhapama. Nigasunza widda dhilobo dhabure vina nigakwela dhili dhapama ninolibiha yogana ya odhowavi nikosaga dhili dhapama vina ninorabela dhilobo dhiganittukuleli ottega. (Am. 5:15) Okana dhifunelo dhapama enele onikamihedha owanana yoweha yohijedheleya.

16. Okosa dhilobo dhomuyani dhinanikamihedhe dhavi okala txenjewa? (Koona vina mafoto.)

¹⁶ Ninawodhe dhavi wunuwiha dhifunelo dhapama? Ninokosa ejuwene nigazuzumela dhilobo dhomuyani. Nigakala mmalaleyoni vina mmatugumanoni, ninolibiha efunelo yehu ya omwagalaliha Yehova. Vina kaninattukuleleye okosa elobo yabure. (Mt. 28:​19, 20; Aheb. 10:​24, 25) Nigengesa vina nisunza Nzu na Mulugu nitanalelaga ejile ensunzihu ninolibiha okwela dhilobo dhapama vina widda dhilobo dhabure. (Jos. 1:8; Masal. 1:​2, 3; 119:​97, 101) Kudduwale yawaddeli Yezu anamasunza aye: “Mudidele olobela, wila munagwele munyengetteyani.” (Mt. 26:41) Nigamulobelelaga Babihu wa wirimu, ninonvaha gari ya onikamihedha vina olibiha efunelo yehu ya omwagalaliha. —Tia. 4:8.

OKALEVI TXENJEWA

17. Dhowobana gani dhamuzuzumiha Pedro?

¹⁷ Txino nihiwodha owanana dhowobana dhehu dhina. Mbwenyi enele ofuneya owanana dhowobana dhehu dhina mwari mwa mudhidhi mwinjene. Koona empadduweli murumiwi Pedro. Vamukoddiliye Yezu dila tharu ohilagiha wi wanawova attu. (Mt. 26:​69-75) Musogorhomwa iyene wahilagiha oliba murima mudhidhi olaleyiliye mu sinedriyuni, enoneya ninga iyene wahimala opemberha wawova attu. (Mer. 5:​27-29) Mbwenyi vyaka dhina musogorhomwa, sabwa ya wawova abale atxetteliwe, wahittiya oja na Akristu ahali Ayuda. (Gal. 2:​11, 12) Pedro wahiyelela wawova attu. Enoneya ninga iyene kawodhile opemberha yowobana eji.

18. Akala nihikana yawobana txini enfwanyelihu okosa?

¹⁸ Elobo yakakene enodhaga opadduwa na iyo. Dhavi? Txino nikana yowobana yobuwelihu wi nihiwodha opemberha. Motagiha, mbali dhahi ohiloga: “Mwari mwa vyaka kumi ddahiwodha ottiya wawona attu bali yovi vina ddahikana nikuluvelo wi ddahiwodha opemberha. Mbwenyi yowobana eji yanddittukulela odhowavi ddikanaga efunelo ya wawona attu bali yovi.” Mowagalaliha-mwene iyene keyelele mundduni. Wahinonelamo wi wanfwanyelela owanana ekarho eji malabo etene—txino iyene onele okosa ejuwene mwari mwa egumi yaye yotene mwilaboni ejino yabure. Na nikamihedho na mwadhiye vina anddimuwa a mmulogoni, iyene onowodha owanana yowobana eji.

19. Akala nihikana yowobana ehinapemberhihu txini enfwanyelihu okosa?

¹⁹ Akala nikana yowobana ehiwodhilihu opemberha ninakose eni wi enanittukulele ottega? Ninofwanyelela ofwara malago a Yezu a “[okala] txenjewa.” Masiki vanoniwe wi ohiliba, kadhowagavi orabelaga dhilobo dhigawuttukuleli ottega. (1 Kor. 10:12) Kobuwela dhukamihedhile owanana dhoweha vina kadhowagavi okosa ejuwene. Gano 28:14 onologa dhahi: Wohagalala dduddule onkala txenjewa. —2 Ped. 3:14.

DHOPURELAMO DHA OKALA TXENJEWA

20-21. (a) Dhopurelamo gani dhinakanihu nigakala txenjewa wi ninagwele munyengetteyani? (b) Nigakosa mpaddi wehu Yehova onanikamihedhe dhavi? (2 Korinto 4:7)

²⁰ Ninofwanyela okana nikuluvelo nawi guru dhetene dhinkosihu wi nikale txenjewa vina nihikose yottega, dhinodhana dhopurelamo masiki akala yottegaya enodhana wagalala wa mudhidhi mung’onovi. Mbwenyi ninoziwa wi ninele okana wagalala webaribari nigafwara magano a Yehova. (Aheb. 11:25; Masal. 19:8) Yehova onipaddutxile wi nikalegewo mowiwanana na malamulo aye. (Wita 1:27) Dhahene ninele owodha okana mubuwelo wotxena vina okana njedhelo nokalawo namukalakala. —1 Tim. 6:12; 2 Tim. 1:3; Jud. 20, 21.

²¹ Ebaribari wi, “maningo [ahobana].” Mbwenyi eji kintapulela wi kaninfwanyela ovilibihedha. Yehova oli womala na wale wi anivahe guru dhinfunehu. (Kengesa 2 Korinto 4:7.) Kudduwale wi Yehova ononivaha owodha onddimuwa. Mbwenyi vamaromo ninofwanyelela okosa mpaka vanwodhelihu wi niwodhe owanana yoweha. Nigakosa mpaddi wehu nikuluvele wi Yehova onele wakula malobelo ehu wi niwodhe owanana dhowobana dhehu. (1 Kor. 10:13) Na nikamihedho na Yehova ninowodha okalavi txenjewa vina owanana dhoweha.