Onawodhe Dhavi Opemberha Dhowaganyedha

1-2. (a) Masaka mena dhowaganyedha gani dhinkanaga adhari a Yehova? (b) Txini enasekeserhe iyo mu nsunzoni ntti?

MASAKA mena iyo notene ninokanaga dhowaganyedha.a Motagiha, kamubuwele muzombwe oli namalaleya onivivuza akala Yehova onomutanala txibarene. Sabwa ya waganyedha oku, iyene onubuwela wi kanfwanyela obatiziwa. Kamubuwele vina mbali wowunuwelavo okosile venjene mmabasani a Yehova valiye muzombwe ottiya otamela mabasa aganvahile kobiri yinjene, ovano kobiri enttambirhiye enakwanela wi àsapelena anamudhi aye bahi. Iyene txino onowaganyedha akala wahikosa yogana ya malago valiwe muzombwe. Kamubuwele murogora wowunuwelavo ohina guru dhaniye bali muzombwe. Iyene txino onokumuwa sabwani kanwodha okosa dhilobo dhawodhiye okosa wale. Weyo wahiromaga ovikosa mavuzo aba: ‘Yehova Txibarene onodditanala? Guru dhikosilimi mundduni wi ddiwodhe omulabela venjene Yehova dhihikana dhopurelamo? Ddihikaana ttima vamentoni va Yehova?’

² Nigahipemberhe dhowaganyedha dhehu, eji enodhaga wobaniha nroromelo nehu ofiyedha ottiya omulabela Yehova. Mu nsunzoni ntti, ninele osunza magano a mBibiliani anawodhe onikamihedha nigakana dhowaganyedha esi (1) Yehova txibarene onodditanala? (2) Dhogana dhikosilimi mundduni dhali dheziwelo? obe (3) Ddihikana ttima vamentoni va Yehova?

ONAWODHE DHAVI OGOMIHA DHOWAGANYEDHA DHAWO

3. Na mukalelo gani onawodhihu ogomiha dhowaganyedha dhehu?

³ Mukalelo mmodha wa ogomiha dhowaganyedha dhehu ja otamela dhowakuladha mBibiliani. Nigakosa ejuwene, ninele okana guru, wunuwiha mandano ehu na Yehova vina okala wovisasanyedhene wi nikalevi ovikomene munroromeloni.—1 Kor. 16:13.

4. Ninawodhe dhavi “[opima] dhetene”? (1 Tesalónika 5:21)

⁴ Kengesa 1 Tesalónika 5:21. Koona wi Bibilia ononikokomeza “[opima] dhetene.” Eji entapulela nni? Entapulela wi ninofwanyela okuluvela wi ejile enrumelihu ebaribari nigaladdaniha na enloga Bibilia. Motagiha, Katanalela eji, muzombwe onivivuza akala Yehova onomutanala, iyene onofwanyela wubuwela wi sabwa ya waganyedha oku entapulela wi Yehova kanimutanala? Nne, iyene onofwanyela opima dhotene, onakose ejuwene modhela otanalela monelo wa Yehova mwaha wa makaniya.

5. Ninawodhe dhavi “onvuruwana” Yehova agakulaga mavuzo ehu?

⁵ Nigamwengesaga Bibilia enkala ninga “nininvuruwana” Yehova bagaloga na iyo. Mbwenyi wi nigomihe waganyedha wehu ninofwanyela ovilibihedha. Voroma ninofwanyela wengesa dhipaddi dha mBibiliani dhiniwanana na waganyedha wehu. Enowodheya olabihedha dhipano dhinjidhene dhosunzana dhinnivaha nikuru na Yehova wi nipepese makani aba. (Gano 2:​3-6) Enowodheya vina omulobelela Yehova wi arurihe masasanyedho ehu a opepesa vina anikamihedhe ozinddiyela monelo waye mwaha wa makaniya. Musogorhomwa ninofwanyela otamela magano a mBibiliani vina dhotagiha dhiniwanana na makani ehu. Enowodheya vina osunza na mapadduwo a attu anlogiwa mBibiliani anna dhubuwelo vina dhowaganyedha dhahene ninga iyo.

6. Matugumano annikamihedha dhavi ogomiha dhowaganyedha dhehu?

⁶ Mukalelo mwina wa “onvuruwana” Yehova ja okala mmatugumanoni. Nigonaga matugumano otene, ninokana gari ya ovuruwana madiskursu vina dhowakula dha abali na arogora esuwene dhinanikamihedhe ogomiha waganyedha wehu. (Gano 27:17) Ovano ninfuna none mukalelo onagomihe iyo dhowaganyedha dhehu.

YEHOVA ONODDITANALA?

7. Mavuzo gani ankanaga attu ena?

⁷ Wahiromaga ovivuza, ‘akala Yehova onowutanala?’ Akala muttu kaniviwonana ttima, onodhaga wubuwela wi kinwodheya okala marho wa Muttanddi wa elabo. Txino Mwene Davidi vina wobuwela dhahene. Iyene wahitikina vaddiddi sabwa ya wona wi Yehova wanazuzumela attu ofiyedha ovuza: “Nabuya, muthu txini ofiyedha nyuwo omuzuzumela, mwana muthu nni, agobuweliwa na nyuwo?” (Masal. 144:3) Onafwanye wuvi yowakula ya nivuzo nikosile Davidi?

8. Mowiwanana na 1 Samuwel 16:​6, 7, 10-12, txini enoona Yehova mwa attu?

⁸ Bibilia, ononisunziha wi Yehova onowazuzumela attu anoniwa ninga kana ttima. Motagiha, Yehova ohimuruma Samuwel wi adhowe vatakulu va Jesé wi amuttikittele mwanaye mmodha odduwene agakalile mwene wa Izrayel. Mudhidhene obule mwa anaye atanu na araru Jesé ohakuwela atanu na araru mbwenyi kamukuwelile Davidi, ettogohiya.b Masiki dhawene, Yehova wamusakulile Davidi. (Kengesa 1 Samuwel 16:​6, 7, 10-12.) Yehova wanimuziwa Davidi vina ejile yali mmurimani mwaye—muzombwe wamukwela venjene Yehova.

9. Onfwanyelela nni okuluvela wi Yehova onowutanala? (Koona vina foto.)

⁹ Kobuwela mukalelo olagihile Yehova wi onowuzuzumela. Motagiha iyene onohuvaha malago aniwanana na dhojombeliwa dhawo. (Masal. 32:8) Ejo enlagiha wila iyene onowuziwa vina onononelamo mowakwana-mwene esile dhinfuniwe. (Masal. 139:1) Venevo vandowiwe olabihedhaga malago a Yehova vina wonaga mukalelo onukamihedhiye, kunaganyedhe wi Yehova onowuzuzumela. (1 Map. 28:9; Mer. 17:​26, 27) Yehova onowona guru dhotedhene dhinkosiwe wi omulabele. Iyene onowona vina mikalelo dhawo dhapama nona onofuna okala marho wawo. (Jer. 17:10) Iyene onfuna wi weyo orumele Omarho waye.—1 Jo. 4:19.

DHOGANA DHAGA DHA MUNDDUNI DHALI DHA MALAGO?

10. Mavuzo gani ankanaga iyo nigatanalela dhogana dhikosilihu mundduni?

¹⁰ Masaka mena muttu onodhaga wubuwela akala dhogana dhikosiliye mundduni dhali dha malago. Motagiha txino muttu ohittiya mabasa apama obe marhondda aganvahile kobiri yinjene wi amulabele Yehova mowakwana-mwene. Mbwenyi ovano ohivira mudhidhi mwinjene obe vyaka dhinjidhene. Txino iyene onowona wi ovano attu akosile dhogana dhottiyana na dhaye ankala ninga anna kobiri yinjene obe egumi yottugareya. Nona muttuya onodhaga ovivuza: ‘Guru dhikosilemi mundduni wi ddiwodhe omulabela Yehova dhihikana dhopurelamo? Obe ddanfwanyela olaba venjene wi ddiwodhe okana egumi yottugareya ovanene?’

11. Txini yamuzuzumiha namaleba wa Masalmo 73?

¹¹ Akala onokaanaga dhowaganyedha esi katanalela mukalelo oviwilemo namaleba wa Masalmo 73. Iyene ohona wi attu ena ahamulabela Yehova ahikana dhorela dhinjene, egumi yapama vina kaana dhozuzumiha. (Masal. 73:​3-5, 12) Moniliye wi egumi ya attu aba yela wedda pama wahiroma wubuwela wi guru dhakosiye wi amulabele Yehova kadhana dhopurelamo. Dhubuwelo esi dhannimukumula venjene munasalmo oddu, iyene wali wodhugudheyene mudhidhi wotene. (Masal. 73:​13, 14) Txini ekosiliye wi agomihe dhubuwelo esi dhowobaniha?

12. Mowiwanana na Masalmo 73:​16-18, txini emukamihedhile munasalmo okana murenddele?

¹² Kengesa Masalmo 73:​16-18. Munasalmo oddu wahidhowa mmusanani mwa Yehova. Sabwa ya okala vamodha na alabeli ena a Yehova, iyene wahiwodha wubuwela pama. Ohinonelamo wi masiki attu abale vanani egumi yapama awene kaana njedhelo na musogorho. Mutanaleli munasalmo ejuwene, iyene wahikana murenddele vina wahinonelamo wi omwika Yehova vamburoni voroma mwigumini mwaye yogana yapama vaddiddi yafwanyeliye okosa. Venevo wahigana odhowagavi amulabelaga Yehova.—Masal. 73:​23-28.

13. Ogakana dhowaganyedha sabwa ya dhogana dhikosiliwe mundduni txini enawukamihedhe okana murenddele? (Koona vina foto.)

¹³ Na nikamihedho na Bibilia enowodheya weyo vina okana murenddele. Dhavi? Katanalela dhilobo dhotene dhapama dhinna weyo otaganyiha na mandano awo na Yehova. Kudduwale vina wi abale ahinimulabela Yehova kanna nikamihedho naye. Txino attu aba anovaha ttima vaddiddi dhorela dhawa obe dhittomo dhawa sabwani kanna njedhelo na musogorho. Mbwenyi weyo onowakela mivaho dhinjidhene dha Yehova vina onoziwa wi musogorho onele wakela mareliho ahinubuweliwe. (Masal. 145:16) Katanalela eji, kinwodheya weyo oziwa mowakwana-mwene mukalelo ogali egumi yawo ddabuno kokosa dhosakula dhottiyana. Mbwenyi elobo modha joziweya: Muttu onkosa dhogana atanalelaga omukwela waye Yehova vina attu ena dila dhotene onele okana dhinfuniye wi akaane wagalala.

AKALA ONUBUWELA WI KUNNA TTIMA VAMENTONI VA YEHOVA

14. Mavuzo gani ankanaga attu nanda sabwaya jani?

¹⁴ Adhari ena a Yehova kanwodha okosa mpaka mwawodhelani sabwa ya wuluvala vina makattamiho a egumi. Attu ena anowaganyedha akala Yehova onovaha ttima mabasa ankosani. Txino anovivuza, ‘Miyo ddihikana ttima vamentoni va Yehova?’

15. Nikuluvelo gani nana namaleba wa Masalmo 71?

¹⁵ Namaleba wa Masalmo 71 wampattiwa na dhubuwelo esi. Iyene ohilobela dhahi: “Kamuddithiye meka, guru dhaga dhigamalamo.” (Masal. 71:​9, 18) Masiki na dhubuwelo esi, munasalmo wahikana nikuluvelo nawi Yehova agahimukamihedha, iyene kokalavi oweddeyana. Munasalmo oddu wahisunza wi Yehova onowagalala vaddiddi adhari aye agakosa mpaka munwodhelani wi amulabele masiki ahiwodhaga okosa mpaka mwafunelani.—Masal. 37:​23-25.

16. Txini enwodha attu owunuwelavo omukosela Yehova vina attu ena? (Masalmo 92:​12-15)

¹⁶ Abali owunuwelavo, kakanani mubuwelo wakakene ona Yehova mwaha wa makattamiho enyu. Masiki muhikanaga guru yinjene, Yehova onowodha wulabihedhani wi mudhowegevi mulibaga mpaddi womuyani. (Kengesa Masalmo 92:​12-15.) Nona kuzuzumele dhilobo dhihinwodhiwe okosa, ottiya ejo kazuzumela dhinwodhiwe okosa. Motagiha, enowodheya wakamihedha ena modhela yotagiha yawo vina wazuzumela attu ena. Enowodheya ologa mukalelo wukamihedhile Yehova ovilela vyaka esi dhotene, enowodheya vina ologa mwaha wa njedhelo noliba niniwe na mapikirhelo a Yehova a musogorho. Vina kudduwale wi malobelo awo anodhaga wakamihedha ena. (1 Ped. 3:12) Ebaribariya jawi kintanala makattamiho ehu, iyo notene ninowodha onvaha Yehova elobo vina attu ena.

17. Ninfwanyelela nni orabela oviladdaniha na ena?

¹⁷ Akala onokumuwa sabwa ya ohiwodha okosa mpaka mwafuneliwe mmabasani a Yehova kakana ebaribari wi iyene onovaha ttima venjene dhinwodhiwe okosa. Txino onoladdaniha dhinwodhiwe okosa na dhinkosa attu ena. Orabele kakamwe mubuwelo obu! Sabwaya jani? Sabwani Yehova kanniladdaniha na ena. (Gal. 6:4) Motagiha, Maria ohinvaha Yezu makura onukela vina a muttengo mwinjene. (Jo. 12:​3-5) Oku mamukwela wa muyelegi wikile mukashani ya mumparhani kobiri bili dha muttengo mung’onovi. (Lk. 21:​1-4) Mbwenyi Yezu kaaladdanihile ayana aba, ottiya ejo iyene wonile dhikosile ayana aba ninga ezinddiyelo ya nroromelo nawa. Na mukalelo wakakene, Yehova onovaha ttima elobo-elobovi enimukoseliwe sabwa ya omuroromela wawo vina omukwela wawo masiki weyo wonaga ninga kunna ttima.

18. Txini enanikamihedhe ogomiha dhowaganyedha dhehu? (Koona vina kasha “Nzu na Mulugu Ninowodha Wukamihedha Ogomiha Dhowaganyedha Dhawo.”)

¹⁸ Masaka mena iyo notene ninokanaga dhowaganyedha. Ninga monelihu Bibilia onowodha onikamihedha ogomiha dhowaganyedha esi. Nona kavilibihedhe ofwanya dhowakula dha mavuzo awo. Ogakosa ejuwene onele okana nikuluvelo ottiya okumuwa. Yehova onowuwona vina onowuzuzumela. Ottiya ejo onovaha ttima guru dhinkosiwe wi wike vamburoni voroma Omwene waye vina iyene ohipikirhela wuttuva. Nona kakana nikuluvelo wi Yehova onowawona adhari aye ororomeleya ninga attu anfwanyelela wakela okwela vina ozuzumela waye.