Iyo Txipo Kanili Noka

1-2. (a) Ninlogela nni wi iyo txipo kanili noka nigapattiwa makattamiho? (b) Txini enone iyo mu nsunzoni ntti?

NIGAPATTIWA makattamiho orutxa ninodhaga ovona ninga nili mutakwani noka vina nihiwodhaga obudduwamo. Mbwenyi ebaribariya jawi iyo kanili noka. Babi wehu wokwela Yehova onowona makattamiho ehu, ottiya ejo bahi iyene ononikamihedha owanana. Na okwela Yehova onopikirhela: “Ddinoukamyedha.”—Iza. 41:10.

² Mu nsunzoni ntti ninele woona marhe manayi anlabihedha Yehova wi anikamihedhe (1) iyene ononeddiha, (2) ononivaha esile dhinfunihu, (3) ononibarela vina (4) ononipangarhaza. Kintanala makattamiho angumanihuna mwigumini, Yehova ohipikirhela wi txipo kananidduwale, iyene kananinyanyale. Nona iyo txipo kanili noka.

YEHOVA ONONEDDIHA

3-4. Yehova onneddiha dhavi? (Masalmo 48:14)

³ Kengesa Masalmo 48:14. Yehova onoziwa wi kaninwodha oveddiha nanya vina ninofuna osogorheliwa na iyene. Yehova oneddiha dhavi nlogo naye masaka abano? Mukalelo mmodha bwa omulabihedha Bibilia. (Ms. 119:105) Iyene onolabihedha Nzu naye wi anisunzihe okosa dhogana dhaderetu vina wunuwiha mikalelo dhinnikamihedha okana wagalala ovanene vina egumi yohimala musogorho.a Motagiha, iyene ononisunziha ohikoya ntxiga, okala wororomeleya mwa dhilobo dhotedhene vina wakwela attu ena na murima wehu wotene. (Ms. 37:8; Ahe. 13:18; 1 Pe. 1:22) Nigakosa ejuwene, ninkala amambali, amamuni, awadhi vina amarho apama.

⁴ Ottiya ejo, Yehova ohika mBibiliani mapadduwo ebaribari a attu agumanilena makattamiho vina aviwilemo dhahene ninga iyo. (1 Ko. 10:13; Tia. 5:17) Wengesa mapadduwo aba vina ovirihamo ejile ensunzihu, japama mwa iyo sabwa ya mwaha minli. Woroma, ninoziwa wi kanili noka—sabwani ena ahigumanana makattamiho akakene vina ahiwodha ovilela na nikamihedho na Yehova. (1 Pe. 5:9) Wanawili, ninosunza owanana makattamiho ehu.—Rom. 15:4.

5. Yehova onimulabihedha ani wi aneddihe?

⁵ Yehova vina onowalabihedha abali na arogora wi aneddihe.b Motagiha, anameddelela milogo dila dhinjene anoweddelela milogo wi anipangarhaze. Diskursu dhinkosani dhinolibiha nroromelo nehu vina dhinonikamihedha okalavi owiwanana. (Mer. 15:40–16:5) Anddimuwa a mmulogoni vina anovilibihedha venjene wi amukamihedhe namalaleya ddi namalaleya okala wororomeleya. (1 Pe. 5:​2, 3) Amambali anowakamihedha anawa omukwela Yehova, okosa dhogana dha malago vina okana dhilemelelo dhaderetu. (Gan. 22:6) Vina arogora anna ttotto yinjene anowakamihedha arogora ali azombwe modhela yotagiha yawa, malago ottiddihedha mabasa vina wapangarhaza.—Tit. 2:​3-5.

6. Ninawodhe dhavi olagiha otamalela mwaha wa dhotedhene dhinkosa Yehova wi anisogorhele?

⁶ Yehova onokosa mpaddi waye wi aneddihe. Ninawodhe dhavi olagiha otamalela wehu sabwa ya dhotene dhinnikosela Yehova wi anisogorhele? Gano 3:​5, 6 onologa: Omuroromele Nabuya na murima wawo wotene, kunyinddele malago. Nigakosa ejuwene, “iyene [ononitonyihedha] dilayá-dilayá.” Ejo entapulela wi iyene onele onikamihedha orabela makattamiho menjene vina okana egumi yowagalala. Ninotamalela venjene sabwa ya Yehova omuziwa muttu-muttu wa iyo vina onivaha malago okwela!—Ms. 32:8.

YEHOVA ONONIVAHA EJILE ENFUNEHU

7. Yehova onnivaha dhavi esile dhinnijombela? (Filipi 4:19)

⁷ Kengesa Filipi 4:19. Ottiya oneddihavi, Yehova ononivaha ejile enfunihu. Dhavi? Iyene onoruriha guru dhinkosihu wi nikane yoja, yowabala vina vokala. (Mt. 6:33; 2 Te. 3:12) Enononeleyamo iyo ozuzumela dhilobo esi, mbwenyi Yehova ononaddela wi kaninfwanyela ozuzumeletxa vaddiddi. (Mt. 6:25) Iyene ohipikirhela wi kananyanyale adhari aye ororomeleya agafuna nikamihedho. (Mt. 6:8; Ahe. 13:5) Ninofwanyela okuluvela kakamwe iyene agaloga wi onele ozuzumela dhojombeliwa dhehu.

8. Yehova omukamihedhile dhavi Davidi?

⁸ Koona mukalelo omukamihedhile Yehova Davidi. Davidi wahivira vyaka dhinjidhene amuttawaga Mwene Sawul. Mwari mwa mudhidhi obu worutxa, Yehova wahinvaha iyene vina alobwana aye dhotedhene dhafunani wi awodhe okalawo. Atanalelaga mukalelo wamukamihedhile Yehova vyaka esile, Davidi ohileba: “Vàlimi mpali mpaka apano voluvalilemi, kaddinamona muttu wapama opwaziwe, kaddinawona anaye alobaga dhoja.” (Ms. 37:25) Txino weyo vina ozinddiyela okwela wa Yehova mudhidhi wukamihedhiliye obe wakamihedhiliye abali ena mmidhidhini dhorutxa.

9. Vagapadduwa dhifoyo Yehova onnivaha dhavi esile dhinnijombela? (Koona vina mafoto.)

⁹ Yehova vina ononivaha ejile ennijombela vagapadduwa efoyo. Motagiha, vapadduwile dala enddimuwa o Jeruzalemi sekulu yoroma, Akristu a dhipaddi dhottiyana-ttiyana ahavahedhela abali nikamihedho nafunani. (Mer. 11:​27-30; Rom. 15:​25, 26) Na mukalelo wakakene, masaka abano nlogo na Yehova ninolagiha otapuwa mada wakakene. Vagapadduwa efoyo, Yehova onowalabihedha abali wi àvahe abale ankala mirudda dhipattiwe efoyoya, dhilobo ninga dhoja, manje, dhowabala vina mirobwe. Abali ankamihedha mabasa omaga anosasanyedha nyumba dha abali vina Nyumba dha Omwene dhigujuwile. Ottiya ejo adhari a Yehova kangonela wavaha nikamihedho mpaddi wa muyubuweloni vina womuyani abale ayelelile nyumba dhawa obe ayelele mukwani attu okweleya.c

10-11. Txini esunziliwe na empadduwele Borys?

¹⁰ Na otapuwa mada Yehova onozuzumela dhojombeliwa dha abale ahinimulabela. Nifwaraga yotagiha yaye, ninotamela marhe a walagiha opama abale ahili abalihu. (Gal. 6:10) Dila dhinjene ejo enovaha onamoona onddimuwa. Koona epadduwile na Borys musogorheli wa eskola dhahi y’o Ucrânia. Masiki ahikalaga Munamoona wa Yehova, iyene wanaweddiha na opama anamasunza aye àli Anamoona a Yehova vina wanriha esile dharumelani. Vaganile Borys ottawa koddo wila adhowe murudda wottugareya wa elabo ejile, abalihu ahimukamihedha. Musogorhomwa iyene wahona Muttupo wa Wubuwela Okwa wa Yezu. Atanalelaga dhotedhene dhamukoseli abali, Borys ohiloga: “Anamoona a Yehova ahiddizuzumela venjene vina ahiddikamihedha. Enfwanyelimi okosa ja watamalela bahi.”

¹¹ Iyo vina ninowodha olagiha ttagaraga ya Yehova modhela walagiha okwela attu otene, otaganyiha na abale ahinimulabela Yehova. (Lk. 6:​31, 36) Ninofuna venjene wi okwela wehu wakamihedhe attu onfiyedha Mulugu wehu. (1 Pe. 2:12) Masiki akala ejoya kinapadduwe, iyo ninele wagalala vaddiddi sabwa ya wakamihedha ena, sabwani “ovaha onottabiha venjene.”—Mer. 20:35.

YEHOVA ONONIBARELA

12. Nibarelo gani nimpikirhela Yehova ovaha nlogo naye ninga nikuru? (Masalmo 91:​1, 2, 14)

¹² Kengesa Masalmo 91:​1, 2, 14. Masaka abano, Yehova onopikirhela obarela nlogo naye mpaddi womuyani. Kuloga iyene onowakamihedha adhari aye odhowavi akaanaga mandano oliba na iyene. Yehova txipo kanattiye wi Satana atolotxe webedha webaribari. (Jo. 17:15) Vina ninofwanyela okuluvela wi “mugoyini endimuwa” Yehova onele wakwanihedha nipikirhelo naye na obarela nlogo naye, kahiye bahi mpaddi womuyani mbwenyi vina mpaddi womaningoni.—Ovu. 7:​9, 14.

13. Yehova onimbarela dhavi mudhari ddi mudhari waye?

¹³ Yehova onabarela dhavi mmodha-mmodha wa adhari aye? Amulabihedhaga Bibilia, Yehova ononikamihedha ottiyaniha eli yabure na yapama. (Ahe. 5:14) Nigavirihamo magano ali mu Nzuni naye, ninobareleya mpaddi womuyani vina womaningoni. (Ms. 91:4) Yehova vina ononibarela modhela mulogo. (Iza. 32:​1, 2) Abalihu anomukwela Yehova vina anokalawo mowiwanana na magano aye, nigakala vamodha na awene ninowakela nipangarhazo vina guru dhinfunihu wi nirabele dhilobo dhabure.—Gan. 13:20.

14. (a) Yehova onattiyela nni adhari aye otabuwa? (b) Nikuluvelo gani ninnivaha Masalmo 9:10? (Koona vina nota.)

¹⁴ Ebaribari wi masaka a mundduni Yehova wahabarela adhari aye ena mpaddi womaningoni. Mbwenyi enjene ahigumanana dhorutxa vina ahifiyedha okwa sabwa ya makattamiho ottiyana-ttiyana. Masaka abano vina muttu-muttu wa iyo onodhaga ogumanana makattamiho sabwa ya dhorurumutxa. (Ko. 9:11) Ottiya ejo, adhari ena a Yehova a masaka a mundduni ahifwara-fwariwa vina ahipiwa, ejo vina enodhaga opadduwa na iyo masaka abano. Yehova onottiya dhilobo esi opadduwa wila alagihe wi Satana muttambi. (Job 2:​4-6; Mt. 23:34) Yehova txino kananibarele mmakattamihoni ehu otene. Mbwenyi Bibilia ononikuluveliha wi iyene txipo kananyanyale abale animukwela.d—Ms. 9:10.

YEHOVA ONONIPANGARHAZA

15. Yehova onnipangarhaza dhavi modhela nlobelo, Nzu naye vina matugumano? (2 Korinto 1:​3, 4)

¹⁵ Kengesa 2 Korinto 1:​3, 4. Dila dhina iyo ninowanana wiwopa sabwa ya omuyelela munammudhi mukwani, opattiwa odhugudheya obe okubanya onddimuwa. Txino ovanene weyo onopattiwa makattamiho anukosiha oviwamo weka. Koddi ohikalawo muttu onnonelamo dhinupadduwela? Yehova onononelamo. Ottiya wiwavi opa, iyene ‘ononipangarhaza muwehiwani mwehu mwetemwene.’ Iyene onkosa dhavi ejuwene? Nigamulobelela Yehova nimukumbirhaga nikamihedho, iyene ononivaha “murenddele wa Mulugu ompitta dhubuwelo dha attu.” (Flp. 4:​6, 7) Iyo vina ninopangarhazeya nigengesa dhinnaddeliye mu Nzuni naye. Bibilia onolagiha mukalelo onnikwela Yehova, ononisunziha okala attu eziwelo vina ononivaha njedhelo nebaribari. Matugumano vina anonipangarhaza, mwenemo iyo ninowodha wona okwela wa abali vina olibihiwa na ensunzihu mBibiliani.

16. Yotagiha ya Nathan na Priscilla ennisunziha eni?

¹⁶ Koona epadduwile na Nathan na Priscilla ankala o Estados Unidos. Yotagiha yawa enolagiha wi Yehova ononipangarhaza vina ononilibiha modhela Bibilia. Vyaka dhing’onovi mundduni, awene ahigana omwalela mburo wajombeliwa anamalaleya. Nathan ohiloga: “Iyo nankuluvela wi Yehova agahiruriha guru dhehu.” Mbwenyi mmalelani ofiya mmabasani mwawa maswa, momaguva-mwene awene ahiroma ogumanana makattamiho a egumi vina ojombeliwa kobiri. Mvirele mudhidhi mung’onovi awene ahiyelela vatakulu, mbwenyi makattamiho awa a ojombeliwa kobiri ahidhowavi. Obuwelaga dhipadduwile, Nathan ohiloga: “Yehova kanirurihile na mukalelo wajedhelihu, nanda miyo ddannivivuza sabwaya. Koddi ddahikosa elobo yabure?” Mbwenyi musogorhomwa, Nathan na Priscilla ahizinddiyela wi kanyanyaliwe na Mulugu mudhidhi obule watamelani nikamihedho. Nathan ohiloga “Mwari mwa mudhidhi obule worutxa, mwa miyo Bibilia wali ninga marho wapama, waddivaha malago a eziwelo vina nipangarhazo. Ottiya ozuzumela makattamiho agumanihuna, nihiroma ozuzumela mukalelo wanikamihedha Yehova. Ejo enikosiha okuluvela wi Yehova agahikalavi na iyo mmakattamihoni a musogorho.”

17. Yehova ompangarhazile dhavi Helga? (Koona vina foto.)

¹⁷ Abalihu na arogora vina niparha na nipangarhazo nehu. Koona yotagiha ya Helga, onkala o Hungria. Mwari mwa vyaka dhinji, iyene wahiwanana makattamiho ottiyana-ttiyana amuttiya wodhugudheya vina amukosiha wubuwela wi kana ttima. Mbwenyi ang’anaga mundduni, iyene onowodha woona mukalelo wamukamihedha Yehova alabihedhaga abali. Iyene ohiloga: “Miyo ddanfwanyela olaba, omuzuzumela mwanaga wali muredda vina owanana makattamiho mena ottiyana-ttiyana. Vazinddiyela Yehova wi miyo kaddana guru, iyene wanddikamihedha. Mwari mwa vyaka esi 30 kaniwo labo nikoddile Yehova wakwanihedha nipikirhelo naye na oddipangarhaza. Dila dhinjene iyene onokosa ejuwene modhela mazu olibiha vina opangarhaza a abali. Midhidhi dhatamelitximi nikamihedho miyo ddanakela mensagem obe mazu otamalela.”

18. Ninawodhe dhavi wapangarhaza ena?

¹⁸ Wapangarhaza ena mukalelo mmodha wa omutagiha Mulugu wehu vina ejo gari enddimuwa mwa iyo. Kito ninawodhe dhavi okosa ejuwene? Modhela ovuruwana na ovilela, ologa na mukalelo wopangarhaza vina omukamihedha muttu onfuna nikamihedho. (Gan. 3:27) Iyo ninovilibihedha wapangarhaza abale antabuwa, na abaleya ahinimulabela Mulugu. Anamwanddamani ehu agakweliwa, agabulela obe agakala odhugudheya, iyo ninowawaredhela, ninowavuruwana na ofwaseya vina ninowawengesela Malebo annipangarhaza. Omutagiha Yehova, “Mulugu wa nipangarhazo notene,” onodhana dhopurelamo dhapama. Ninowodha wakamihedha abalihu vina opangarhaza murima wa abale ahinimulabela Yehova, nattukulelaga okana efunelo ya osunza ebaribari.—Mt. 5:16.

YEHOVA OLI MPADDI WEHU MUDHIDHI WETENE

19. Yehova onnikamihedha dhavi vina ninawodhe dhavi omutagiha?

¹⁹ Yehova onowazuzumela vaddiddi abale animukwela. Iyene kanninyanyala nigapattiwa makattamiho. Yehova ononikamihedha na mukalelo wakakene onimweddiwa babi mwanaye na okwela. Iyene ononeddiha, ononivaha dhinnijombela, ononibarela vina ononipangarhaza. Ninowodha omutagiha Babi wehu wokwela modhela wakamihedha vina wapangarhaza abale ampattiwa makattamiho. Ebaribari wi dhorutxa vina makattamiho anokosa mpaddi wa egumi mwilaboni eji, mbwenyi ninofwanyela okuluvela wi Yehova oli na iyo. Vowi iyene ohipikirhela: “Kuwove, vowi miyo dili na weyo.” (Iza. 41:10) Nona nikuluvele kakamwe wi iyo txipo kanili noka.