Mavuzo Ankosa Anamengesa

Gano 30:​18, 19 onologa wi dila ya mulobwana na namwali kinnoneleyamo. Mazu aba antapulela eni?

Attu enjene na aziwitxiya anovivuza entapulela mazu aba. Mbwenyi nlebo ntti mu Tradução do Novo Mundo ninloga dhahi: Dhihikalawo dhilobo ttaru dhindditikiniha vina yanonayiya ehinwodha miyo ononelamo: Dila envira epungu odhulu, dila envira nowa mmaluguni, dila envira pa-poro mbara vina dila ya mulobwana na namwali.—Gan. 30:18, 19.

Wale, nanonelamo wi mazu aba dila ya mulobwana na namwali alogana elobo yohifwanyelela. Sabwaya? Sabwani makaniya anologa dhilobo dhohifwanyelela esuwene dhihinloga “nihakwanana.” (Gan. 30:15, 16) Ottiya ejo, versu 20 enomuloga “muyana wajeberuwa” waloga wila kakosile elobo yabure. Nona, nobuwela wila dhahene ninga epungu envava odhulu, nowa enedda mmaluguni obe paporo enedda mbara vina otene ankosa dhilobo moviteyani, mulobwana agahidha okosa elobo, attu ena s’ozinddiyela ekosiliye. Na mubuwelo obo, iyo nobuwela wi mazu aba dila ya mulobwana na namwali yatapulela elobo yabure—muzombwe woshaga wamunyengetta muyana ohishagiletxe oku muyanaya s’ozinddiyela dhifunelo dhaye.

Mbwenyi nihikana mwaha dhinnittukulela woona nlebo ntti na mukalelo wottiyana. Mwebaribari namalebaya wahitikina na dhilobo esi dhilogiliye.

Mapapi a Ebrayiko anologa wi nlebo ntti ninaddana elobo yapama. Mowiwanana na nivuru Léxico Teológico do Velho Testamento, nzu na Ebrayiko nitapuleliwe ninga “[ehinwodha] miyo ononelamo” va Gano 30:18 “enaddiwana elobo enimutikiniha vina enimumiha mulomo muttu.”

Namasunziha Crawford Howell Toy wa eskola enkuweliwa Harvard o Estados Unidos wahifiyedha ononelamo wi nlebo ntti kinaddana elobo yabure. Iyene ohileba: “Mwebaribari namalebaya watamela ononihedhemo wi dhilobo esile dhali dhotikiniha.”

Nona, ninofwanyela okuluvela wi mazu a Gano 30:18, 19 antapulela dhilobo dhotikiniha dhihinwodhihu ononelamo. Dhahene ninga namaleba wa nlebo ntti, ninotikina nigoonaga epungu evavaga odhulu, nowa yeddaga mmaluguni, papo-ro eddaga mbara vina mulobwana na muyana akwelagana vina akanaga egumi yowagalala.