Abali Eli Aswa Ankosa Epaddi ya Nikuru Nolamulela
LABO 5 wa Otuburu wa yaka ya 2024, wahivuwihiwa muselu wowagalaliha vaddiddi mmatugumanoni a vayakani: Mbali Jody Jedele na Mbali Jacob Rumph ahittomiwa wila akose epaddi ya abali a Nikuru Nolamulela na Anamoona a Yehova. Oheli anomulabela Yehova n’ororomeleya mwari mwa vyaka dhinjene.
Jody Jedele na mwadhiye, Damaris
Mbali Jedele obaliwe o Missouri, Estados Unidos vina oleliwe mwibaribarini. Iyene na anamudhi aye akala murudda wahali abali enjene. Sabwa ya ejuwene, iyene ohaziwa abali na arogora enjene a dhipaddi dhottiyana-ttiyana a elabone ejile adha olaleya miselu dhapama. Iyene wahiziveliwa vaddiddi voniliye okwela vina wiwanana wa abali aba. Obatiziwe labo 15 wa Otuburu wa 1983. Iyene wanziveliwa vaddiddi odhowa mmalaleyoni, nona Setemburu wa yaka ya 1989 wahiroma mabasa a opionero wa mudhidhi wotene.
Mbali Jedele bali muzombwe, amambali aye annimuttukula iyene na abalaye wi adhowe aredhele Beteli. Waredhela oku ohakamihedha awene okana yogana ya okamihedha o Beteli—jijuwene ekosilani vasogorhova. Setemburu wa 1990 Mbali Jedele wahikonvidariwa wi akamihedhe o Beteli y’o Wallkill. Iyene oromile okamihedha Mparha Wokuputta, musogorhomwa wahikamihedha Mparha Onlaba Mumodhani na Masipitale.
Mudhidhene obule, milogo dhaloga Espanhol dhannunuwa vina dhanjombeliwa abali. Nona Mbali Jedele wahidhowa okamihedha mulogo mmodha vina wahiroma osunza Espanhol. Mudhidhi mung’onovi musogorhomwa wahimuziwa Damaris, murogora walaba ninga pionera muruddene obule. Vasogorhova ahitelana vina mwadhiyeya Damaris wahikonvidariwa wi akamihedhe o Beteli vamodha na iyene.
Yaka ya 2005 awene ahibudduwa o Beteli wi adhowe àkamihedhe amambali awa. Mwari mwa mudhidhene obule awene alaba ninga apionero a mudhidhi wotene. Mbali Jedele ohikamihedha ninga namasunziha wa Eskola ya Mabasa a Apionero vina ohikamihedha Mpara onlaba Mumodhani na Masipitale vina Mpara Womaga.
Yaka ya 2013, Mbali Jedele na mwadhiye ahikonvidariwa wi eyelele o Beteli wi akamihedhe mabasa a omaga akosiwa o Warwick. Oromana venevale ahikamihedha Beteli y’o Patterson na o Wallkill. Mbali Jedele ohikamihedha vina Mpara Womaga na Mpara Onlaba Mumodhani na Masipitale. Marsu wa 2023, iyene ohittomiwa ninga mukamihedhi wa Mpara wa Mabasa. Obuwelaga mabasa otene attomeliwiye, Mbali Jedele ohiloga dhahi: “Nigakela mabasa maswa masaka mena ninodhaga okala ozuzumene. Mbwenyi pavenevo vanfwanyelihu omukuluvela Yehova sabwani ddi iyene onakwaniha eganiliye.”
Jacob Rumph na mwadhiye, Inga
Mbali Rumph obaliwe o California, Estados Unidos. Muhimani mwaye, maye wahittiya olaleya vina otugumana, masiki dhawene wahikosa guru yinjene wi amusunzihe Mbali Rumph ebaribari ya mBibiliani. Ottiya ejo, vyaka dhotedhene iyene wandowa omoona bibe odduwene wali Munamoona wa Yehova. Iyene ohimukamihedha wunuwiha efunelo ya omusunza Bibilia, vasogorhova vaniyena vyaka 13 wahikumbirha omusunza Bibilia. Labo 27 wa Setemburu wa yaka ya 1992 wahibatiziwa. Mowagalaliha-mwene, maye wahiyelela otugumana vina olaleya, babe na abalaye ahiroma wunuwa mpaddi womuyani vina ahibatiziwa.
Muzombweni mwaye, Mbali Rumph ohoona wagalala wanna apionero. Nona mmalileye ogomiha masunzo aye oskola, wahiroma olaba ninga pionero mweri wa Setemburu wa 1995. Yaka ya 2000, wahimwalela o Equador wi akamihedhe mulogo wajombeliwa anamalaleya. Wenewale wahimuziwa Inga, murogora w’o Canadá wali pionera. Awene ahidha otelana. Mmalelani otelana ahikamihedha mabasa a Omwene sidadi modha y’o Equador wanna anamalaleya ang’onovi. Ddabuno mulogoya ohunuwa vaddiddi.
Na mudhidhiya, Mbali Rumph na mwadhiye ahittomiwa ninga apionero a vawoka vina musogorhomwa ninga anameddelela milogo. Yaka ya 2011 ahikonvidariwa wi akose Eskola ya Gileadi turma 132. Mmalelani ogomiha masunzoya ahikamihedha mabasa a Omwene dhilabo dhottiyana-ttiyana vina attidda mabasa ottiyana-ttiyana, ninga: Mabasa o Beteli, mabasa a omisionario vina anameddelela milogo. Mbali Rumph vina wahikana gari ya okala namasunziha wa Eskola ya Anamalaleya a Omwene.
Sabwa ya ezini ya COVID-19, Mbali Rumph na mwadhiye ahiyelela o Estados Unidos. Awene akonvidariwa wi adhowe o Beteli y’o Wallkill, wenewo Mbali Rumph wahakela mashagiho a Mpara wa Mabasa. Vasogorhova awene ahittomeliwa wili mabasa o Beteli w’o Equador wenewo olabiliye ninga Musogorheli wa Filiali. Yaka ya 2023 awene ahidhowa o Warwick. Janero wa 2024, Mbali Rumph wahittomiwa ninga mukamihedhi wa Mpara wa Mabasa. Obuwelaga mabasa akosiliye, iyene ohiloga dhahi: “Enkosiha mabasa okala avawoka kahiyo mburoya onlaba muttuya, mbwenyi ba attuya anlabihuna.”
Iyo ninowatamalela vaddiddi abali aba sabwa ya mabasa ankosani vina ninodhowavi ‘narihaga attu ninga aba.’—Flp. 2:29.