Ddisunza Wandana na ‘Attu a Malogo Otene’

EJIYA ehinatti opadduwa, miyo ddahikaana efunelo y’oziwa ebaribari. Ddahiziveliwa vaddiddi vadhile mmani ottambirha manivuru a Bibilia. Mmanivurunimwa mwahikala mafoto addizivela woona. Mafotoya andditota namunigwa, waddikosiha mavuzo menjene. Vowi babani kafuna wi miyo ddimusunze Bibilia, mmani wansunza na miyo iyene agavenyavo. Ddihisunza ofiyedha omperhekela Yehova egumi yaga. Nona, ddibatiziwe yaka ya 1943, o Blackpool, Inglanterra baddina vyaka kumi.

OMAROMELO WA OMULABA YEHOVA

Oromana siku nibatiziwemi, mmani na miyo nandhowa mmalaleyelo. Mmalaleyonimwa nanlabihedha fonografu. Aba ali makina manddimuwa, alemela kilu 5 Masiki baddili mwana, ddanttebavi!

Vakwanihilemi vyaka 14 ddafuna okala pionero. Mmani oddaddela wila ddihinatti okala ddanfanyela omwaddela nameddelela milogo. Mmwaddelelimi iyene oddakulile wila ddirome osunza mabasa agaddikamihedhi okala pionero. Ddimwiwelela, dditamela mabasaya. Mulabelimi vyaka bili, miyo odhowa omulogana nameddelela milogo mwina wi ddinfuna ddikale pionero. Iyene oddakula dhahi: “Enokala, karoma ovanene.”

Nona, mweri wa Abrili wa 1949, miyo na mma niguliha dhanehu dhetene, nimwalela o Middleton, waddamela o Manchester, wi nakale apionero. Mmvirelani myeri minai, ddimukosa mbali dhahi wi nikale vamodha apionero. Abali a okwatti anikosa wila nimwalele mulogo dhahi mung’ono w’o Irlam. Mudhidhene obo, mmani wali pionero na murogora dhahi wa mulogo mwina.

Vowila mulogo wamwalelihu wana abali ang’ono osogorhela, miyo na mukwaga nahittomiwa wi neddihege matugumano banina vyaka 17 bahi. Vasogorhova ddhimwalela mulogo mwina dhahi mung’ono wahanetxa abali wi ddakamihedhe. Mwenemo mwetemwene mwaviremi, ddahimala owarala wi ddakele mabasa-mabasavi.

Munuwelimi, mu yaka ya 1950 ddittukula petisau ya Escola Bíblica de Torre de Vigia de Gileade. Saddu Dezemburu wa 1952, ddikuweliwa wi ddakulele mabasa a onyakoddo. Ddittapa ddinuka, miyo wubuwela wi ddikumbirhe ddifudhiwemo sabwa ddafuna ddikale pionero. Muttego onakulela dha anyakoddo okodda yakumbirhilemi, ofiyedha oddittongela okala mukambura vyaka tanu namodha. Baddili mwenemo ddihakela niwobo wi ddakose turma 22 y’eskola ya Gileade. Mbulutxeliwe miyo mukambura Julho wa 1953, ddidhowa o New York.

Mfiyelimi, yaka ya 1953 ddiromile omoona Asembeleya wa Sociedade do Novo Mundo. Novenya, ddimuwela Kumboi ddidhowa ogusini wa Lansing, o New York, wenewo wafwanyeya eskolaya. Kaddanetxa kobiri sabwa ddela obudduwa-wene mukambura. Mukitelemi mukumboini ddiwela Karera yadhowa ogusuni wa Lansing, vowi kaddana kobiri, ddimboleya mukwaga dhahi korowa 25.

DDITTOMELIWA ODHOWA ELABO YINA

O Gileade nihivahiwa mashagiho addikamihedhi wi ‘ddiviliganihe na attu etene.’ (1 Korinto 9:22) Vattomeliwehu odhowa o Filipina, miyo, Paul Bruun, na Raymond Leach, nahigilati mudhidhi mung’onovi banigajedha apasaporti ehu wi abudduwe. Mmalelihu nimuwela paporo banidhowa o Rotterdam, elabo ya Holanda. Novenya, nihabuya Mwinje wa Mediterraneo, Mono wa mwinje Suez, na Bara yakadda India nidhowaga o Malazia, nomala nikwaranyedha o Hong Kong. Mmalelihu malabo 47 banili mwiko, vadhidho, nifiya o Manila labo 19 na Novemburu 1954.

Wenewo, yanfuneya ovisaddula wi nilemele mweddelo, elabo, vina elogelo eswa. Mwadhawene, iyo noraru nahittomeliwa mulogo dhahi walogiwa Engelezi o Sidadi y’o Quezon. Mvireli myeri mitanu na mmodha, niziwa mazu mang’onovi a elogelo ya Tagalog. Osogorhowa, nigahisunza elogelo yina.

Siku dhahi banigeyela mmalaleleyelo, miyo na mukwaga Leach, nihifwanya vatakulu vehu makarta aloga wi nihittomeliwa okala anameddelela milogo. Miyo ddana vyaka 22 bahi, nona, vattomeliwemi okala nameddelela nilogo pasunzilemi wi ddinofwanyela okala muttu ‘oniviliganiha na attu otene.’

Mukalelimi nameddelela milogo, diskursu yaga yoroma ddikosile vatamuni ohela wa sidadi. Mudhidhe-ne obo diskursu dhakosiwa vatamuni obe vattaddo! Muromelimi weddelela milogo dhottiyana-ttiyana, ddihikosa diskursu vattaddo, mmamisika, osogorho wa ngome dhinddimuwa, mmakomeni mwa rampa dhinddimuwa. Siku dhahi baddili o San Pablo City, ddahikodda okosa diskursu vataddo sabwa ya muzogwe. Nona ddahawaddela anddimuwa a mulogo wi nimwalele mu Numbani ya Omwene. Nomala awene addivuza akala egahikala ovuwiha ninga matugumano a vattaddo masiki vahakosiwani vattaddo.

Dila dhetene ddasama mmatakulu mwa abali. Masiki mirala dhina badhili dhing’ono, dhakala dhoyesa. Malabo mena ddagona vanikagalani, vati. Ohaba nahaba okodde wa numba, muttu-muttu wavira wela onona nakala tibwini, nona pavenevo vasunzilemi ohaba na guwo. Suwa yali vakuvi nadhowa na karera dila dhina na sikarera. Ddile oromavi okosa mabasa a opionero mpaka ogomiha kaddigulile karo.

Etagalo enlogimi kaddisunzile oskola, ddisunzile dhawene. Ddisunziletxe na wavuruwana abali omatugumanoni, obe mmabasani olaleya. Miyo ddinowatamalela vaddiddi abali, awene ahikosa guru y’oddikamihedha osunza elogeloya, s’ohiddipela malago.

Movira wa mudhidhi, ddikosa masadduwo wi ddakwanihe gari yaga ya mabasa. Wahifiya mudhidhi wattomeliwemi wi ddivuwihe miselu mwinternetini. Wali mudhidhi waliwo Kongeresu nanda mbali Nathan Knor adha weddiha Kongeresuya yaka ya 1956. Vowi kaddaromilege wirana, ddahikumbirha nikamihedho. Yaka yina, Mbali Frederick Franz wa okatti wahidha onaredhela. Osogorhowa nahikaana Kongeresu mwina, nanda ddahittomiwa wi ddikale musogorheli. Vakongeresuniva, Mbali Frederick Franz agakosaga diskursu, wabala guwo dha akadda Filipina dhinkuweliwa barong tagalo. Abali agamoona anziveliwa vaddiddi, nanda ejiya eddisunziha wi ‘ddiviliganihe na attu etene.’

Mudhelimi okala munddimuwa wa katti, ddihikosa masadduwo mena. Mudhidhene obo nanlagiha filmi A Felicidade da Sociedade do Novo Mundo. Nalagihaga nantabuwana ovaveliwa dhibu, mabarata, na dhilobo dhina sabwani nooniha vatamuni na mattiyu. Yakwekwetta dhibudha yali txeza ya makinaya. Nigamala ofuga nankana goi yosela. Masiki vaalani yorutxa weddiha mittupo ninga esene, yanihagalaliha jowi attu enjene anziveliwa osunza wedda na Mulugu.

Namakutta wa kapela ya Katolina yahivenya odhowa wawabihedha alamuleli wi anittiyihe okosa asembeleya. Mukoselani dhawene, kavo wawodha ovuruwana dhaloga namakosa diskursu, sabwani awene ela woba sinu, wi aninyagulena. Na makattamiho abo otene, attu ansunzavi ebaribari, nanda enjene anomulaba Yehova ompaka ovanene.

GARI DHINA DHAKELILEMI

Yaka ya 1959 ddihiwobiwa wi ddalabe o Betel. Wenewo-tti kusunzilemi dhilobo dhinji. Musogorhomwa ddihaddeliwa wi ddaredhele milogo dhina. Mufiyelimi o Tailandia ddihimuziwa misionaria dhahi wakuweliwa Janeti Dumond. Muziwanelihu niroma olebelana makarta, musogorhomwa nitelana. Noheli ninomulaba Yehova nosanzaya mwa vyaka 51.

Ddihijavo vaddiddi, wona nlogo na Yehova mu vilabo dhowakwana 33. Ddinotamalela vopitta sabwa ya gari yanimi voroma, eddivahile owodha wowatagiha attu a mahimo ottiyana-ttiyana. Mwetemwene mvirilemi ddihona wila Yehova txibarene onowakwela attu a mahimo otene.—Merelo 10:34, 35.

NINOVIRIHAMOVI

Miyo na mwadhaga Janeti nihiziveliwa vaddiddi olaba o Filipina, nanda mpaka ovanene ninolabavi o betel y’o Quezon. Ddabuno ohikala anamalaleya opitta vyaka 60 mundduni. Masiki ddimulabilevi Yehova vyaka gwé, ddinofunavi otamalela gari-garivi enddivaha Yehova. Motagiha, nanfwanyela wiwelela masadduwo akosiwe ovanenevi apa.

Eniziveliletxe jowila nihikosa muli mwetemwene guru wi nifware malago a Yehova. Vina ninovisasanyedha orava mweddelo wa abali anafwanyihu. Mwenemo munnifunana Yehova, ninokosa guru wi ‘niviliganihe na attu etene.’