Yehova Onowattuva Abale Animutamela na Murima Womyala

1, 2. (a) Okwela na nroromelo dhiniwanana dhavi? (b) Mavuzo gani anfunihu woona?

BABIHU Yehova onolibela waruriha adhari aneedda na iyene. Obu mukalelo onlagiha wi Yehova ononikwela, iyo vina ninomukwela “vowi ddi iyene oromile onikwela.” (1 Joau 4:19) Omukwela wehu Mulugu vanunuwani, panvadda omuroromela wehu vowi ninokuluvela wi iyene onowattuva animukwela.​—Kengesa Ahebreu 11:6.

² Yehova namattuva! Eji entonya eliye obe enkosiye. Ebaribariya jowila, nigahikaane nikuluvelo nawila Yehova onowattuva emeleli aye animutamela na murima womyala, nroromelo nehu ninkala nohakwana. Sabwaya jani? Sabwani “omuroromela Mulugu thi nikoma n’owakela dhinjyedhihu.” (Ahebreu 11:1) Omuroromela Mulugu ontapulela okuluvela wila iyene onowaruriha aneddaniye. Okana njeedhelo nawila ninele ottuviwa onnilibiha dhavi? Yehova owodhile dhavi wattuva emeleli aye a mundduni vina a nsaka na ovanene? Aba makani anfunihu woona.

YEHOVA OLIBELA WATTUVA EMELELI

3. Nlibelo gani ninengesihu va Malakiya 3:10?

³ Yehova onolibela wattuva emeleli aye ororomeleya. Iyene ononiwoba wila ninvahe enikaleli yapama nanda nikuluvele wila onere oniruriha. Yehova mwinyene ologa: “Ddonenina ejene.” Okwaranyanavi eraga: “Txibarene ddinere ourubwihedhani muzogwe, ddinjivihe vilo dhenyu.” (Malakiya 3:10) Ninolagiha wi ninotamaalela niwobo naye akala ninofuna woona mabasa aye.

4. Ninkuluvelelani nlibelo nili va Mateu 6:33.

⁴ Yezu wahawaddela anamafara aye wila awene kowika vamburoni voroma Omwene, Mulugu agahakamihedha. (Kengesa Mateu 6:33.) Yezu wahiloga ejuwene sabwani wanziwa wila malibelo a Mulugu kanvonya. (Izaiya 55:11) Iyo vina ninowodha okana ebaribari wila nigamuroromela Yehova, onele wakwanihedha nlibelo ntti: “Miyo kaddinauthiye weka kaddinaunyanyale.” (Ahebreu 13:5) Nlibelo ntti na Yehova ninonikamihedha okuluvela mazu a Yezu ali va Mateu 6:33.

5. Yamwakulile Yezu murumiwi Pedru ennilibiha dhavi ovanene?

⁵ Murumiwi Pedro wahinvuza Yezu dahi: “Kopeni, iyo nithiya dhetene, niufwarani; ninapure nni?” (Mateu 19:27) Yezu kamusaddeyile Pedro sabwa yovuza dhahene. Ottiya ejuwene, Yezu wahawaddela namasunza aye wila Mulugu agahattuva na guru dhakosani. Anamafaraya na attu eena anele wakela gari yolamula wirimu musogorho. Nanda wahawaddela wila masiki ovanene awene agahittuviwa; iyene ologa: “Muthu onathiye numba yaye, peno abalaye, arogoraye, babe maye anaye, mindda dhaye thangwi y’oddiroromela miyo, ddinakele esodha senjedhedhiwevo dila zana vina onere othidda egumi yohimala.” (Mateu 19:29) Anamafara otene a Yezu anowafanya mmulogoni ababi, amai, abali, arogora vina aima. Eji elobo ya ttima vaddiddi opitta dhilobo dhinkosihu Mumweneni mwa Mulugu.

‘NANGURA NINTTIDELA EGUMI’

6. Yehova onlibelelani wattuva emeleli aye?

⁶ Masiki vanjehuvo mareliho ahinpimeya a Mulugu ovanene, ninojedhela vina wakela mareliho awakwana musogorho. (1 Timóteo 4:8) Oziwa wila Yehova onolibela wattuva emeleli aye ororomeleya, enonikamihedha owanana makattamiho. Ninolibihavi nroromelo nehu nigaziwa wila Yehova “onowathuva abale animutamela.”​—Ahebreu 11:6.

7. Nroromelo ninligana dhavi na nangura?

⁷ Yezu vakosiye Diskursu ya Vamwangoni ohiloga dhahi: “Hagalalaní, thabaní, vowi othuveliwa wenyu wirimu kunddimuwa-wene; anamavuhulela vina asosiwa nyuwo muhinathi.” (Mateu 5:12) Emeleli a Mulugu eenaya anattuveliwe okala wirimu. Oku eena aakelaga egumi velaboni ya vati mparaizu. Obu bu mwahaya mwina ‘w’ohagalala vina ottaba.’ (Masalmo 37:11; Luka 18:30) Iyo notene ninowodha okana nroromelo ‘ninlibiha, ninimetxa murima wehu.’ (Ahebreu 6:17-20) Ninga nangura ninimulikiha paporo masiki agafanyiwa pevo enddimuwa, njeedhelo nehu ninonikamihedha okala owimelene pwi. Oziwa ejuwene enonivaddiha wi nivilele nigafanyiwa masoso.

8. Njeedhelo nehu ninvugula dhavi mazuzumo?

⁸ Njedhelo nehu ninonivugulela mazuzumo. Malibelo a Mulugu anowodha ovoliha mazuzumo ehu ninga envoliha balsamo vilodda. Ninolibiheya oziwa wila Yehova ononikubarela akala ninomuttiyedha mmadama dhetene dhinnikattamiha. (Masalmo 55:22) Ninokaana ebaribari wila Mulugu “onowira esile dhinkwaranya vopitha dhinlobihu, dhinubuwelihu, na guru dhinlabaniye mmurimani mwehu.” (Éfeso 3:20) Dhilobo dhinnivaha Yehova si dhinji, “dhinkwaranya vopitta dhinlobihu.”

9. Ohikaana ebaribari wila onele wakela maruriho a Mulugu?

⁹ Nigafuna wi nittambirhe mareliho a Yehova, yoromaya nimuroromele Yehova na magano aye. Mizé wahapanga dhahi ana Izrayel: “Nabuya onoururihani mwilaboni enfuna Mulugu wenyu ouvahani wi akale yenyu-ene; ejiyá enireya nyuwo mugarumela enloga Nabuya Mulugu wenyu muvirihagamo malamulo otene anuvahani miyo ddabuno. Nabuya Mulugu wenyu onere oururihani ninga muwupikirheliyeni.” (Olibiha 15:4-6) Weyo onoziwelamo-wene wila Yehova onele oururiha akala onomulabavi na nroromelo? Akala onororomela, onokosa deretu.

YEHOVA WAHATTUVA

10, 11. Yehova wamuttuvile dhavi José?

¹⁰ Bibilia olebeliwe wi nimpurelemo. Noona mwenemo ninofwanyamo dhotagiha dhowila Mulugu wahattuva adhari aye awale. (Roma 15:4) José wali yotagiha yapama yottuviwa. Voroma abalaye amuguliha bakala munyaperhezu. Vasogorhova, mwadhi wa fumu waye wahimuzivalela ofiyedha afugeliwa mukambura w’Egiptu. Koddi Joséya valiye mukambura, wahimunyanyala Yehova? Nne-wene. Bibilia onttaka dhahi: “Nabuya wali na iyene,” nanda “Nabuya wamukamihedha wi mabasa aye otene edde pama.” (Wita 39:21, 23) Na makattamiho aba otene, José wahimujedhelavi Mulugu n’ovilela.

¹¹ Nsaka niina musogorhomwa, Faraó ohinfugulela José mukambura mwaliye, nanda ohinvaha ettomo enddimuwa yokala mambo w’Ejiptu wotene. (Wita 41:1, 37-43) José mwateleliye ahabala aima eeli, “muthajiya, omuttuva nzina na Manassé, obuwelaga ‘Mulugu oddidduwaliha segedho dhaga dhotene. Oddithuvela opwaza oddirele amudhaga.’” (Wita 41:51, 52) Yehova wahimuttuva José ttamgwi y’okala oweddeyana, nanda wahiwodha wavuna anaIzrayel vina akadda Ejipto nsaka naliwo dala yottidda motto. José wahiziwa wila Yehova ddwamuttuvile vina ddamururihile.​—Wita 45:5-9.

12. Yezu walagihile dhavi nroromelo vehiwiye?

¹² Mwinaya ddi Yezu wamwiweleli Yehova masiki vari va makattamiho, nanda Yehova wahimuttuva. Txini yamukamihedhi Yezu okaanavi nroromelo? Mazu a Mulugu anowakula dhahi: “Iyene orumela okwa [vapingirhizini] katanalile manyazo a mukweloya, vowi wanziwa wi masoso abo agamala, onofwanya othaba onddimuwa.” (Ahebreu 12:2) Ejo ebaribari, Yezu wafwanya ottaba onddimuwa omuwodhihile okoddeliha nzina na Mulugu. Nanda Yehova wahimuttuva Yezu na gari dhottiyana-ttiyana. Bibilia onloga wila, iyene “oviyeviha vothabwa.” “Nona Mulugu omvuwiha, omvaha nzina ninpitha mazina mena etene.”​—Filipi 2:9.

YEHOVA KANDDUWALA DHINIREHU

13, 14. Yehova oniwamo dhavi na oderetu onimukoselihu?

¹³ Ninokana ebaribari wila Yehova onottittimiha mabasa ankosihu wi nimwebedhena. Iyene onoziwelamo akala kannivikuluvela, obe nigaroma waganyedha dhiwodhelo dhehu. Iyene onoziwelamo nigafwanyiwa mazuzumo a otowa ganyo obe osapela murala wehu. Onoziwelamo vina akala kanindowetxa mmabasani olaleya sabwa ya eredda enifwanyile obe makattamiho meena. Nikaane ebaribari wi Yehova onottittimiha ororomeleya wehu masiki vari va masoso.​—Kengesa Ahebreu 6:10, 11.

¹⁴ Ninadduwale vina wila Yehova “Onowakela nlobelo na attu otene.” Nikaane ebaribari wila nigamuloba iyene ononakula. (Masalmo 65:2) “Babi onneddela thagaraga babi onnipangarhaza,” onele onivaha dhetene dhinfunehu wi ninfiyedhe iyene. Dila dhina iyene onowalabihedha abalihu a mmulogoni. (2 Korinto 1:3) Mulugu onfuna wi iyo naweddele ttagaraga attu ena. Bibilia onologa: “Onrumela oboleyiwa na muyelegi, omboleyile Nabuya; onaperheke ddi Nabuyene.” (Gano 19:17; Mateu 6:3, 4) N’eji, nigakala attu otapuwa mada na abalihu, Yehova onele wona wi dhetene dhaderetu dhinakoselihu abalihu, ninimukosela iyene. Nanda iyene onolibela wattuva attu apamaya.

NINOTTUVIWA OVANENE VINA MUSOGORHO

15. Weyo onjeedhela wi wakele mareliho a wirimu obe velaboni ya vati? (Koona foto eli omaromo.)

¹⁵ Akristu ali attikitteliwi anojeedhela wakela “mperhe oninfwanyelela muthu womyala murima” ondela wa Yezu. (2 Timóteo 4:7, 8) Akala weyo onjedhela mperhe wowakela mareliho a velaboni ya vati, Mulugu vina onoukwelavi. Matxikwi menjene a “mabila mena” a Yezu anjeedhela ottuviwa na egumi yohimala mparaizu velaboni ya vati. Awene “aner’ojavo murenddele munddimuwa.”​—Joau 10:16; Masalmo 37:11.

16. Yolibiha gani enfwanyihu va 1 Joau 3:19, 20?

¹⁶ Onofiyaga mudhidhi banigona ninga mabasa ankodihu kanimuzivela Yehova, obe banigona ninga kaninkosetxa mabasa ofiya. Dila dhina ninovyona ninga kaninfwanyela otamaaleliwa. Elobo-elobovi enubuwelihu, kanidduwale mazu aba: “Mulugu onopitha mirima dhehu, iyene onoziwa dhetedhene.” (Kengesa 1 Joau 3:19, 20.) Omwebedha wehu Yehova na nroromelo obe omukwela, bunnivaha ebaribari wila iyene onele onittuva, masiki akala ninubuwela wila dhinkosihu kadhina ttima vamentoni vaye.​—Marko 12:41-44.

17. Mareliho gani anttuviwehu ovanene?

¹⁷ Masiki vankalihu mmasikuni omariha a elabo ejino ya Satana, Yehova kanttiya waruriha emeleli aye. Iyene ononivaha eziwelo yowakwana na osanzaya ondela mubalini mwehu. (Izaiya 54:13) Pumwenemo, ninga mulogeli Yezu, Mulugu ononittuva ovanene na omudhi wa abali na arogora a dhilabo dhotene. (Marko 10:29, 30) Masiki n’abaleya animutamela Mulugu na murima womyala, anele ojavo murenddele, ottaba na osanzaya.​—Filipi 4:4-7.

18, 19. Emeleli a Yehova aniwamo dhavi mwaha wa mareliho anakelani?

¹⁸ Emeleli a Yehova orugunuwa elabo yotene, anojavo mareliho a ottuviwa andela wa Baba wehu. Sabwa ya ejuwene Balbina w’o Alemanha ologile dhahi: “Ddinomutamaalela Yehova vopitta sabwa y’oddikamihedha owanana makattamiho aga vina y’okalaga na miyo malabo otene. Otakulu wa elabo kawo nibarelo. Miyo ddinfwanya nibarelo ddigeeddaga na Yehova, onddikubarela mmyononi mwaye. Elobo-elobovi enimukoselimi, iyene onoddiyihedha mareliho ahimpimeya.”

¹⁹ Yotagiha yina ja murogora Paulina ona vyaka 70 w’o Kanada, iyene onowiwa opa wa yunu, onedda gula-gula. Iyene ologile wila, masiki vaniwiye opa ahiwodhaga wedda, kantxelela mabasa a olaleya. Onloga dhahi: “Miyo ddinolaleya na telefoni obe ddinolaleya murampani. Nanda ddinovilibihaga na olebela dhilobo dha mmanivuruni mwehu wi ddengesege veli-veli. Kadernona munlebelimi, ddinkuwela ‘Kaderno Ninddikalihawo.’ Ddigang’ana malibelo a Yehova, ddinolibiheya vaddiddi. Mwa makattamiho ba makattamiho anddifwanya, onddikamihedha ddi Yehova.” Txino makattamiho anufwanya ahittiyana n’aba alogilehu a Paulina obe Balbina. Weyo onowubuwela marhe anururiha Yehova obe marhe anaruriha Yehova abali eena. Josanzayiha vaddiddi oziwa wila Yehova ononittuva ovanene vina onele onittuva musogorho!

20. Ninfuna ojedhela elobo gani akala ninomulabavi Yehova na nroromelo?

²⁰ Kanidduwale wila olobela, ‘ononifwanyiha ottuveliwa onddimuwa.’ Vina nikaane ebaribari wila ‘nigera ennifunana Mulugu,’ ‘ninodha wakela eroromelihiliye.’ (Ahebreu 10:35, 36) Bahi-to, kanitxelele olibiha nroromelo nehu, vina ndoweni niviperhekele omulaba Yehova. Nikaane nikuluvelo wi omulaba wehu Mulugu kaninttiddana vati!​—Kengesa Kolosi 3:23, 24.