Yezu Ohasunziha Anamafwara Aye Olobela

Dhilobo dhakosetxa Afarizi erela oniwe. Awene ankosa dhapama wi atamaaliwe na attu. Afarizi ankosa malobelo ogonela, bageyelela abuwenevi musinagoga, mmapanbanoni wi attu otene avira asibe. Nona attu ahizuzuma vaddiddi mwalogeli Yezu wila: ‘Munalobelege ninga Afarizi. Awene anubuwela ninga Mulugu onele wazuzumela ttangwi ya mazu anlogani, oku ehili mwenemo. Nyuwo mulobelege moka na Yehova. Kamwiyelele mazu akokene. Yehova onfuna wi mumpange enenyu mmirimani.’

Nyuwo mulobelege dhahi: “Baba wehu muli odhulu, nzina nenyu nithithimihiwe. Omwene wenyu odhele iyo, ofuna wenyu okosiwege vati apano ninga odhulu.” Yezu vina wahawaddela wila yanfuneya awene olobelela dhoja dhawa, dhozuzumela dha siku, oleveleliwa dhottega, vina mazuzumo a muttu-muttu.

Yezu ohiloga vina: ‘Kamutxelele olobela. Mmulobege Babinyu Yehova dhilobo dhapama. Mambali oli wotene ononfunana mwanaye dhilobo dhapama. Nyuwo mwanenyu agaulobani mukatte, muninvaha nibwe? Agaulobani oba, muninvaha nowa?’

Yezu mmaleliye ohitapulela yafuniye ologa: ‘Akala nyuwo munoziwa wavaha anenyu sagwati dhaderetu, Babinyu wa wirimu ddittabwile wavaha muya wokoddela abale animuloba! Nona mukalele ntidi oloba.’ Weyo onofwara malago a Yezu? Koddi dhilobo gani dhinlogetxa weyo ogakosaga malobelo?