Yezu Onowedda Vadhulu va Manje

Yezu kahiyo wila wawodha wavulumutxavi attu obe wavenyiha amarafula, mbwenye wanwodha vina wang’anele guru dha muzogwe, pevo na manje. Mmlaliye olobela vamwangoni, iyene ohang’ana mutxiddo bona wila mwinje wa Galileya wela ottittima pevo. Anamafwara aye ali mmwanddiyani avilibihedhaga wabuwela epaddi yina. Yezu ohitita bedda vadhulu va manje adhowaga wali mwanddiyaya. Anamafwara mmonelani muttu bagedda vadhulu va manje, ahiroma ogurumela. Yezu ohawaddela: ‘Kamove. Ddi miyo!’

Pedro ohiloga: ‘Nabuya, akala ddinyuwene, kaddittiyeni ddidhe wenewo.’ Yezu omwakula: ‘Kadhawuno.’ Na pevoya, Pedro ohivenya mmwanddiyani, ohedda vadhulu va manje adhowaga oli Yezu. Pedro amwaddamelaga Yezu, oroma wang’ana pevo, ottiddiwa wova. Oroma oririma. Pedro ohikuwa na lizu noliba: ‘Nabuya ddivuneni!’ Yezu ottidda nlada na Pedro, omwaddela: ‘Oromelini waganyedha? Oyeveliwe nroromelo?’

Yezu na Pedro ahiwela mwanddiya, nomala pevoya ehimaala. Weyo onubuwela wi anamafwara aahitikina? Awene ahiloga: “Txibarene nyuwo muli Mwana-Mulugu.”

Eji kahiyo dila yoroma yalamula Yezu manje. Dila yina yali mudhidhi wabuwela Yezu na anamafwara aye kobela yina ya mwinje, nanda Yezuya bagagona mmwanddiyani. Yezu bagagona, wahoba pevo y’owali. Nebe nela okupedheya mmwanddiyani, mwanddiyaya buroma odhala manje. Anamasunza akuwa na lizu noliba amvenyihaga Yezu: ‘Nabuya ninokwa! Kanikamihedheni!’ Yezu ovenya ohiloga na mwinjeya: “Kakurumuwa!” Venevo mwinjeya ohimaala noo. Yezu ohavuza anamasunzaya dhahi: ‘Kamuna nroromelo?’ Awene anloga oka-oka: “Iyi, odduya bani, ofiyedha orumeliwa na pevo, na bara vina?” Venevo awene azinddiyela wila agamuroromela Yezu, kanovege elobo.