Nunuwihe Ekalelo Yehu ya Olobela

1. Yehova onfuna wi alabeli aye akose eni? (Koona vina foto.)

WEYO ogafuna nipangarhazo onimutamela ani? Iyo ninoziwa yowakula ya nivuzo ntti. Enowodheya onfiyedha Yehova Mulugu modhela nlobelo. Jijuwene enkosa iyo. Iyene onfuna wi nilobelege nihilemagana—obe mudhidhi wotene. (1 Tes. 5:17) Nihikana ofuru w’omulobelela vina omukumbirha wi eddihe egumi yehu. (Gano 3:5, 6) Yehova, Mulugu wotapuwa mada enoniha ejuwene jawi iyene ononittiya iyo omulobelela mudhidhi wotene onfunihu.

2. Txini enasunze iyo mwari mwa nsunzo ntti?

² Nlobelo nvaho wamakamaka ona iyo. Mbwenyi na dhokosa dha siku na siku enodhaga okala yorutxa otamela mudhidhi wila nilobele. Ottiya ejo ninodhaga wona wi jofuneya wunuwiha ekalelo yehu ya okosa nlobelo. Mowagalaliha mwene, Malebo anonikamihedha okosa ejuwene. Mwari mwa nsunzo ntti, ninele wona mukalelo wa otamela mudhidhi wila nilobele nifwaraga yotagiha ya Yezu. Vina ninele wona, makani matanu amakamaka anfwanyelihu wika mmalobeloni mwehu wi nunuwihe ekalelo yehu ya olobela.

YEZU WANTAMELA MUDHIDHI WOLOBELA

3. Txini yaziwa Yezu mwaha wa malobelo?

³ Yezu wanziwa wi Yehova wanvaha ttima malobelo. Ahinatti odha velaboni ya vati, Yezu wahona mukalelo wakula Yehova malobelo a alobwana na ayana ororomeleya. Motagiha, Yezu wali vakuvi mudhidhi wakula Yehova malobelo a Davidi, Ana, Eliya na ena. (1 Sam. 1:10, 11, 20; 1 Amwe. 19:4-6; Masal. 32:5) Nona Yezu wahasunziha anamafwara aye olobelaga mudhidhi wotene akuluvelaga wi Yehova onowawakula!—Mt. 7:7-11.

4. Yotagiha gani yapama ya olobela enittiyedhi Yezu?

⁴ Malobelo amukoseli Yezu Yehova yotagiha enfwanyela iyo ofwara. Mmabasani aye a olaleya, Yezu wanlobela dila dhinjene ahilemaga. Iyene wantamela mudhidhi wila alobele sabwani wankana mabasa menjene vina vakaliye vankala attu enjene. (Mk. 6:31, 45, 46) Iyene wanvenya na membesi wi alobele. (Mk. 1:35) Dila modha, iyene wahilobela omattiyu wotene ahinatti okosa yosakula yamakamaka. (Lk. 6:12, 13) Omattiyu womariha ahinatti okwa aziwaga wi mudhidhi wotabutxiwa mpaka okwa wela waddamela, Yezu wahilobela dila dhinjene.—Mt. 26:39, 42, 44.

5. Ninamutagihe dhavi Yezu nigalobelaga?

⁵ Yotagiha ya Yezu enonisunziha wi masiki nikane dhilobo dhinjidhene dhokosa, enofuneya otamela mudhidhi wi nilobele. Dhahene ninga Yezu ninofwanyela otadela mudhidhi wi nilobele—ovenya na membesi, obe na mattiyu. Nigakosa dhahene, ninomutonyihedha Yehova wi iyo ninovaha ttima nvaho obu wa olobela. Murogora onkuweliwa Lynne onowubuwela mukalelo oviwilemo iyene vasunzileye mwaha wa olobela. Iyene ohiloga, “Vaziwile miyo wi enowodheya ologa na Yehova mudhidhi-mudhidhivi, eji eddikamihedha omona ninga Marho waga ofiyedheya, nona ddittukuleleya wunuwiha ekalelo yaga ya olobela.” Kinaganyedheya wi enjene mwa iyo, niniviwamo na ekalelo yakakene. Ovano ndoweni none makani matanu anfwanyelihu ologa mmalobeloni mwehu.

MAKANI MATANU A OLOGA MMALOBELONI

6. Mowiwanana na Ovuhulela 4:10, 11, txini eninfwanyelela Yehova?

⁶ Omuttittimihe Yehova. Modhela wonihiwa, murumiwi Joau wahawona anddimuwa owakwana 24 wirimu amwebedhaga Yehova. Awene animuttittimiha Mulugu alogaga, “munofwanyela othithimihiwa, [vina] orihiwa.” (Kengesa Ovuhulela 4:10, 11.) Angelo ahikana vina mwaha dhinjene dhinattukulela omuttittimiha Yehova. Awene ali wirimu na iyene vina anomuziwa pama. Angelo aba anoziwa mikalelo dha Yehova modhela dhotene dhinkosiye. Awene agonaga dhokosa dha Yehova, anottukuleleya omuttittimiha.—Job 38:4-7.

7. Txini ennittukulela omuttittimiha Yehova?

⁷ Iyo vina ninofuna omuttittimiha Yehova mmalobeloni mwehu, nimwaddelaga ennittukulela otikina dhilobo dhinkosiye vina omuriha. Ogamwengesa Bibilia, katamela ononelamo mikalelo dha Yehova dhinuzivela. (Job 37:23; Rom. 11:33) Ogamala omwaddele Yehova sabwaya enziveliwa weyo mikalelo esi. Mukalelo mwina wa omuttittimiha Yehova ku omutamalela mwa dhilobo dhotene dhinnikosela iyene vina dhinakoseliye abalihu ali Akristu. Mudhidhi wotene iyene ononeddiha vina ononibarela.—1 Sam. 1:27; 2:1, 2.

8. Dhilobo gani dhinnittukulela omutamalela Yehova? (1 Tesalónika 5:18)

⁸ Omutamalele Yehova. Iyo nihikana mwaha dhinjene dhinnittukulela omutamalela Yehova nigalobelaga. (Kengesa 1 Tesalónika 5:18.) Enowodheya omutamalela Yehova sabwa ya dhilobo dhotene dhina iyo; sabwani, mivaho dhotene dhawakwana dhinda wa iyene. (Tia. 1:17) Motagiha, ninomutamalela Yehova sabwa ya dhilobo dhokoddela dhittanddiliye mwilaboni. Ninomutamalela sabwa ya onivaha egumi, murala wehu, amarho ehu vina njedhelo na musogorho. Kanidduwale omutamalela Yehova sabwa ya gari enivahiliye ya okala amarho aye.

9. Ninfwanyelela eni ovilibihedha omutamalela Yehova?

⁹ Txino enofuneya ovilibihedha wubuwela mwaha dhina iyo dha omutamalela Yehova. Attu enjene masaka abano kanziwa otamalela. Awene onovilibihedha otamela okana dhinfunani oku adduwalaga otamalela dhilobo dhinani. Iyo nigapattiwa na mikalelo esi, malobelo ehu anoroma okala muddonddonddo wa dhokumbirha dhehu bahi. Wi ejene enapadduwe ninofwanyela wubuwela mudhidhi wotene otamalela dhilobo dhinnikosela Yehova.—Lk. 6:45.

10. Otamalela omukamihedhile dhavi murogora wana makattamiho orutxa? (Koona vina foto.)

¹⁰ Otamalela onodhaga onikamihedha nigapattiwa makattamiho. Koona yotagiha ya murogora onkuweliwa Kyung-sook, enfwanyeya mu A Sentinela, 15 de Janeiro de 2015. Adotoro aye ahimwaddela wi wahikana eredda ya kanseri. Iyene ohiloga: “Oziwa wi ddikana eredda eji, eddipa vaddiddi, yakala ninga egumi yaga yahimala ogoma vina ddahova vaddiddi.” Txini emukamihedhile murogora oddu owanana makattamiho aye? Iyene ohiloga wi na mattiyu ahinatti ogona wanlobela atamalelaga dhilobo tanu dhapama dhinpaduweli labonene ntto. Sabwa yokosa ejuwene iyene waniviwamo pama vina wanimwaddela Yehova omukwela waye. Iyene wahidha ononelamo wi Yehova onowakamihedha alabeli aye ororomeleya agafwanyiwa makattamiho, ottiya ejo iyo ninowakela mareliho menjene opitta makattamiho annigwela. Dhahene ninga murogora Kyung-sook, iyo nihikana mwaha dhinjidhene dhinnittukulela omutamalela Yehova, masiki nifwanyiwaga makattamiho. Omulobelela Yehova vina omutamalela, ononikamihedha ovilela vina odhowagavi nagalalaga.

11. Yafuneyela nni anamafwara a Yezu oliba murima, mudhidhi ogadhowile Yezu wirimu?

¹¹ Omukumbire Yehova awuvahe oliba murima wi owodhe olaleya. Ahalagawo malabo mang’onovi wi Yezu eyelele wirimu, iyene ohakokomeza anamafwara aye olaleyela eliye “mu Jeruzalemi, mu Judeya, mu Samariya, mwilaboni mwetemwene, ofiyedha okomoniwá.” (Mer. 1:8; Lk. 24:46-48) Musogorhomwa, anddimuwa a Ayuda ahimuttidda Pedro na Joau badhowana Omuttegoni, wenewo ahikoddihiwa olaleya vina ahitxutxiwa. (Mer. 4:18, 21) Txini ekosile Pedro na Joau?

12. Mowiwanana na Merelo 4:29, 31, arumiwi akosile eni?

¹² Mutxutxiwe Pedro na Joau na anddimuwa a marelijiau, awene ahiloga: “Mubuwele nyuwo mwanya, akala japama vamentoni va Mulugu, ourumelani nyuwo opitha iyene. Iyo kaninwodha omalàna dhonilehu, dhiwalehu.” (Mer. 4:19, 20) Vafuruliwe Pedro na Joau, anamafwara a Yezu ahimukosela Yehova nlobelo, amukumbirhaga wi akamihedhe odhowavi akosaga efunelo yaye. Awene ahilobela: “Nivaheni iyo emeleli enyu guru dh’olaleyana mazu enyu nihovaga.” Yehova ohakula nlobelo ntti.—Kengesa Merelo 4:29, 31.

13. Txini ensunza iyo na yotagiha ya mbali Jin-hyuk?

¹³ Enowodheya iyo watagiha arumiwi modhela odhowavi nilaleyaga masiki alamuleli anikoddihe. Jijuwene epadduwile na mbali onkuweliwa Jin-hyuk, iyene wahifugeliwa sabwa ya ohikosa mpaddi wa elabo. Bali mukamburha, wahittomeliwa waweddiha anyakambura enagu akala vawavene, mbwenyi iyene wanfwanyela ologa na awene kofunaga elobo, wahikoddihiwa ologa na awene makani-makanivi ttabwa-ttabwa sabwa ya Bibilia. Venevo wahimulobelela Yehova amukumbirhaga oliba murima vina zelu wi awodhe olaleya egawodheya. (Mer. 5:29) Jin-hyuk ohiloga: “Yehova ohakula malobelo aga modhela oddivaha oliba murima vina eziwelo, miyo ddahiroma weddiha masunzo a Bibilia ohigonela vamusuwo wa sela. Na mattiyu miyo ddanleba makarta, wi ddavahedhe afugeliwi enagu mmangwananimwa.” Dhahene ninga Jin-hyuk, enowodheya iyo vina olobela nikumbiraga oliba murima vina eziwelo, nikuluvelaga wi Yehova onele onikamihedha olaleya.

14. Txini enanikamihedhe owanana makattamiho ehu? (Masalmo 37:3, 5)

¹⁴ Kakumbirha nikamihedho na Yehova wi owodhe owanana makattamiho. Enjene mwa iyo ninogumanana makattamiho a eredda vina a muyubuweloni, attu ena ahayelela mukwani amudhawa, enagu anogumanana makattamiho orutxa vamuralani, ofwara-fwariwa obe makattamiho mena. Yottabwaya, makattamiho ninga pandemia na koddo dhinottabwiha makattamihoya. Onfugulele Yehova murima wawo. Omwaddele dhotedhene dhinupadduwela, dhahene ninga munlogeliwe makani na marho wawo. Okuluvele wi Yehova onele wukaliha.—Kengesa Masalmo 37:3, 5.

15. Malobelo anwodha onikamihedha dhavi ovilela makattamiho? Kavaha yotagiha.

¹⁵ Enanikamihedhe ovilela mmakattamihoni ohitxelela olobela. (Rom. 12:12) Yehova onoziwa dhinapadduwela adhari aye vina—“[onowiwa] dhinunlela abale animuriha.” (Masal. 145:18, 19) Kristie pionera wa vyaka 29 ohinonelamo wi eji ebaribari. Iyene wahiroma okana makattamiho manddimuwa a egumi. Eji ehimuttukulela iyene okala okumuwene. Osogorhowa, iyene wahizinddiyela wi maye wahikana eredda egamuttukuleli okwa. Kristie ohiloga: “Miyo ddannimulobelela Yehova ddihilemaga, ddimukumbirhaga guru wi ddiwodhe owanana makattamiho abale siku-na-siku. Ottiya ejo miyo ddandhowavi ddonaga matugumano otene vina ddankosa nsunzo naga nomwinya.” Ohenjedhedha: “Olobela ohiddikamihedha. Miyo ddahikaana ebaribari wi Yehova wali vakuvi na miyo, oziwa ejuwene yanddikurumutxa. Makattamiho aga a egumi ali ahinatti ogoma, mbwenyi oziwa wi Yehova wannakula malobelo aga yanddivaha murenddele vina ofwasa.” Ninofwanyela wubuwela wi Yehova onowodha wavuna mmakattamihoni abale animukwela.—2 Ped. 2:9.

16. Ninfunela nni nikamihedho na Yehova wi niwodhe orabela dhoweha?

¹⁶ Omukumbirhe Yehova wi awukamihedhe orabela dhoweha. Iyo nili attu ohiligana, nona ninofwanyela mudhidhi wotene ovilibihedha orabela okosa dhilobo dhabure. Mbwenyi Satana onokosa muli mwetemwene wi akattamihe egumi yehu. Murega mmodha onlabihedhiye mavego anlagiha mararuwo. Mavego ninga aba anodhaga odhaliha mubuwelo wehu na dhilobo dhonyakuwa—si dhubuwelo esuwene dhigadhile onittukulela okosa yottega enddimuwa vina ottiya wandana na Yehova.—Mk. 7:21-23; Tia. 1:14, 15.

17. Nigamala omulobelela Yehova nimukumbirhaga nikamihedho, txini enfwanyelihu okosa? (Koona vina foto.)

¹⁷ Akala ninofuna opemberha okosa dhilobo dhabure ninofwanyela okumbirha nikamihedho na Yehova. Yezu ohikumbirha ejene mwasunzihiliye anamafwara aye olobela alogaga: “Kamunittiye ogwela munyengetteyani, munirabelihe mwiddani.” (Mt. 6:13) Yehova onofuna onikamihedha mbwenyi iyo ninofwanyela omukumbirha nikamihedho. Ottiya ejo, ninofwanyela okosa dhilobo mowiwanana na malobelo ehu. Ninofwanyela vina okosa muli mwetemwene wi nirabele mubuwelo vina moonelo wabure wa elabo eji ya Satana. (Masal. 97:10) Iyo nigamwengesaga vina nigamusunzaga Bibilia ninodhaaliha muyubuweloni mwehu dhilobo dhapama vina dhofwanyelela. Odhowa mmatugumanoni vina odhowa mmabasani a olaleya enele onikamihedha ovibarela mwa dhubuwelo dhabure. Dhahene Yehova onele wakwanihedha dhipikireliye kanarumele wi iyo nifwanyiwe manyengetto ahinwodhihu opemberha.—1 Kor. 10:12, 13.

18. Iyo notene ninfwanyela odhowagavi nikosaga eni?

¹⁸ Ninofwanyela olobela wi nidhowegevi nikalaga attu ororomeleya vamentoni va Yehova ttabwa-ttabwa masaka aba omariha. Katamela mudhidhi labo na labo wi omutapulele murima wawo Yehova modhela nlobelo. Yehova onfuna wi iyo ninfumburhele segedho dha mmurimani mwehu modhela nlobelo. (Masal. 62:8) Omutamalele vina omuttittimihe Yehova mudhidhi wotene sabwa ya dhilobo dhotedhene dhinkosiye. Omukumbirhe wi awukamihedhe oliba murima ogalaleyaga. Olobele okumbirhaga nikamihedho wi owodhe owanana makattamiho vina owodhe orabela yoweha-yowehavi. Kumuttiye muttu obe elobo-txilobo wuzuzumiha omulobelela Yehova. Yehova onakula dhavi malobelo ehu? Ninele woona yowakula ya nivuzo ntti nsunzo ninfwarela.