Ebaribari Mwaha Wa Baba, Mwana Vina Muya Wokoddela

ATTU anrumeela nsunziho na Oraru anloga wila Mulugu ali attu araru​—Baba, Mwana vina Muya Wokoddela. Enologiwa wila kadda muttu mwa attu aba araru anoligana, wa guru dhotene vina wohikaana maromo. Mowiwanana na nsunziho na Oraru, Baba iyene Mulugu, Mwana iyene vina Mulugu nanda Muya Wokoddela vina Mulugu, masiki dhahene oli Mulugu mmodha bahi.

Attu enjene anroromela nsunziho ntti na Oraru anorumeela yawila awene kanwodha otapulela nsunziho ntti. Masiki dhahenevi, anokuluvela yawila nsunziho ntti ninosunzihiwa mBibiliani. Jotikiniha vaddiddi yawila nzu ntti “Oraru” txipo kaninakalege mBibiliani. Ki mubuwelo wa Oraru onofanyeyamo? Wila nakule nivuzo ntti, ndoweni noone nlebo nttene ninromoletxa aroromeliya wila avunele nsunziho na Oraru.

‘NZU NALI MULUGU’

Joau 1:1 onloga dhahi: “Omaromelo nali Nzu, Nzuna nali vamodha na Mulugu, Nzuna nali Mulugu.” (Nipagano Niswa) Vasogorhova mu kapituluni yakakene, murumiwi Joau onolagiha deretu wila ‘Nzu’ ddi Yezu. (Joau 1:14) Vowila Nzu nintxemerhiwa Mulugu, mwa dhahene, attu eena anorumeela wila Mwana vamodha na Baba anofanyeela okala epaddi ya Mulugu mmodhene.

Kobuwela wila omaromowa epaddi eji ya Bibilia yalebiwe na elogelo ya Egrego. Musogorhomwa, anamatapulela batapulela Egrego mpaka dhilogelo dhiina. Mwa dhahene, anamatapulela enjene a Bibilia kalabihedhi mazu aba ‘Nzu nali Mulugu.’ Akooddeli eni olabihedha? Modheela eziwelo yawa mwaha wa Egrego yalabihedhiwe omulebana Bibilia, anamatapulela abale oonile wila mazu aba ‘Nzu nali Mulugu’ anofanyeela otapuleliwa na mukalelo mwina. Atapuleliwe dhavi? Koona dhotagiha dhing’onovi: ‘Logos [Nzu] nali na omulugu.’ (A New Translation of the Bible) Nzu nali mulugu.’ (The New Testament in an Improved Version) ‘Nzu nali vamodha na Mulugu nanda noligana na Muluguya.’ (Novo Testamento do Tradutor) Mowiwanana na Mabibilia aba, Nzu kayo Mulugu Wa Guru Dhotene.a Mbwenye, sabwa ya mpaddo waye wottukuwa mwari mwa dhottanddiwa dha Yehova, Nzu ninoddiwana okala ‘mulugu.’ Apa nzu ntti ‘mulugu’ nintapulela ‘wa guru.’

KAKAANA MISELU DHIINA DHA EBARIBARI

Attu enjiya kanziwa Egrego ya Bibilia. Dhahene weyo onaziwe dhavi ejile yafuna ologa murumiwi Joau? Katanaalela yotagiha eji: Namasunziha onowatapulelamo anyaskola mwaha. Agamala kadda munyaskola ononelimo mukalelo wayene mwaha obule otapuleli namasunziha. Anyaskola aba anasasanyedhe dhavi mwaha obu? Awene agahifanyeela onvuza namasunzihaya wila aavahe miselu dhowenjedhedha. Mohaganyedha, oziwa miselu dhowenjedhedha ogahakamiha ononelamo mwahaya deretu. Na mukalelo wakakene, wila weyo ononelemo ejile entapulela Joau 1:1, onofanyeela opepesa Muttaka wa Joau wila okaane miselu dhiina mwaha wa mpaddo wa Yezu. Oziwa miselu dhiina dha ebaribari dha mwahaya onela wukamiha ononelamo deretu.

Motagiha, koona ejile elebile Joau musogorhomwa mu kapitulu 1, versikulu 18: ‘Txipo muttu mmodha kamoonile Mulugu’ [Wa Guru Dhotene]. Mwa dhahene attu aahimoona Yezu, Mwana, sabwani Joau onloga dhahi: ‘Nzu [Yezu] nihivikosa muttu, ttikala vari vehu; iyo nihoona nttittimiho naye.’ (Joau 1:14, Nipagano Nipya) Ki Mwana agakalile dhavi epaddi ya Mulugu Wa Guru Dhotene? Joau vina onologa wila Nzu nali ‘vamodha na Mulugu.’ Muttu agawodhile dhavi okala na muttu mwina nanda mudhidhi wakakene bakala iyenene? Mowenjedhedha, ninga mulebeliwani va Joau 17:3, Yezu ohilagiha mowooneya, ottiyana waye na Babi waye wa odhulu. Iyene onimutxemerha Babi waye okala ‘Mulugu mmodha bahi wa ebaribari.’ Nanda omagomelo wa Muttaka waye, Joau onogumanyedha na ologa dhahi: ‘Esi dhalebeliwe wila muroromele yawila Yezu ddi Kristu, Mwana Mulugu.’ (Joau 20:31) Koona yawila Yezu kantxemerhiwa Mulugu, mbwenye ontxemerhiwa Mwana Mulugu. Muselu obu wowenjedhedha oli Mmuttakani mwa Joau onolagiha mukalelo onfanyeela ononeliwamo Joau 1:1. Yezu, oddwene oli Nzu, ddi ‘mulugu’ na mukalelo wawila iyene ohikaana mpaddo wottukuwa, mbwenye iyeneya kanligana na Mulugu Wa Guru Dhotene.

KANONELAMO EBARIBARIYA

Kobuwela wili yotagiha ya namasunziha na anyaskola. Katanaalela kowiliwa anyaskolaya kanonelimovi, masiki agamala ovuruwana ejile etapuleli namasunziha mowenjedhedha. Txini egafanyeelani okosa? Awene agahinvuza namasunziha mwina wila atapulelemo deretu mwaha wakakene. Akala namasunziha wa nawili onotapulela na mukalelo wakakene ejile etapuleli namasunziha woroma, waganyedha wa anyaskola enjiya ogahigoma. Na mukalelo wakakene, akala weyo kuna ebaribari mwaha wa ejile yaloga txibarene Joau namaleba Bibilia sabwa ya wiwanana oli vari va Yezu vamodha na Mulugu Wa Guru Dhotene, egahikala weyo konvuza namaleba mwina wa Bibilia wila okaane miselu dhowenjedhedha. Motagiha, koona ejile elebile Mateu. Mwaha wa omagomo wa elabo eji, iyene wahileba mazu a Yezu: ‘Mwaha wa siku ntto vina mudhidhiya kavo onziwa, nne angelo a odhulu, nne Mwana, mbwenye onziwa ddi Baba bahi.’ (Mateu 24:36) Mazu aba anvaha dhavi onamoona wawila Yezu kayo Mulugu Wa Guru Dhotene?

Yezu walogile wila Baba onoziwa vaddiddi opitta Mwana. Kowiliwa Yezu onokosa epaddi ya Mulugu Wa Guru Dhotene, txibarene iyene agahiziwa dhilobo dhakakene dhiziwile Babi waye. Noona, Baba na Mwana kanligana. Masiki dhahenevi, attu eena anela ologa wila: ‘Yezu wahikalawo ninga muya vina ninga muttu wa omaningoni. Apa iyene onloga ninga muttu wa omaningoni.’ Masiki kokala dhahene, ki muya wokoddela? Kowiliwa obu onokosa epaddi ya Mulugu wakakene ninga Baba, sabwa yani Yezu kalogile wila muya onoziwa ejile enziwa Baba?

Venevo vanimusunziwevi Bibilia, onela oziwa deretu dhipaddi dhinji dha Bibilia esene dhiniwanana na mwaha obu. Dhipaddi esi dhinokamihedha ebaribari mwaha wa Baba, Mwana vina muya wokoddela.​—Masalmo 90:2; Merelo 7:55; Kolosi 1:15.