NSUNZO 16
Txini Ekosile Yezu Valiye Velaboni ya Vati?
Attu enji yamubuwelaga Yezu, muyubuweloni mwawo ondamo mwana mung’ono, namavuhulela obe mulobwana oli nena nokwa. Mbwenye mudhidhi onasunzege iyo okalawo wa Yezu velaboni ya vati, ninele wona wi dhihikalawo dhilobo dhinji dhikosiliye opitta esi. Mwari mwa nsunzo ntti, ninele wona dhilobo dhina dhamakamaka dhikosile Yezu vina mukalelo onnipattani.
1. Mabasa gani àlitxi amakamaka mwigumini mwa Yezu?
Mabasa a makamaka akosile Yezu ali ‘olaleya muttaka wapama wa Omwene wa Mulugu.’ (Kengesa Luka 4:43.) Miselu dhapama dhalaleya Yezu, dhaloga sabwa ya Omwene wa Mulugu onagomihe makattamiho otene a attu.a Mwari mwa vyaka ttaru na meya, Yezu wahivilibihedha venjene ologa miselu dha Omwene wa Mulugu.—Mateu 9:35.
2. Yezu wakosela eni matikiniho?
Mbibiliani munologiwa mwaha wa ‘Yezu onvuwiha Mulugu modhela wira matikiniho manddimuwa, mabasa owumiha milomo vina vizinddiyelo.’ (Merelo 2:22) Na guru dha Mulugu, Yezu wahiwodha omaaliha pevo enddimuwa, wajiha attu owinjiva, wavulumutxa aredda vina wavenyiha attu mukwani. (Mateu 8:23-27; 14:15-21; Marko 6:56; Luka 7:11-17) Matikiniho akosile Yezu ahoniha kakamwe wi ddi Mulugu wamurumile. Matikiniho aba ahitonyihedha wi Yehova ohikana ewodhelo ya ogomiha makattamiho otene.
3. Txini ensunza iyo na ejile empadduweli Yezu?
Yezu wandhowavi bagamwiwelela Yehova. (Kengesa Joau 8:29.) Iyene ohikosa ejuwene mwigumini mwaye motene Masiki afwara-fwariwaga. Yezu ohoniha wi enowodheya attu omulabela Mulugu, masiki agumanagana makattamiho. N’eje, Yezu ohinittiyedha ‘dila, wi nifware muviriliye.’—1 Pedro 2:21.
KASUNZAVI
Koona mukalelo olaleyile Yezu miselu dhapama vina okosa matikiniho.
4. Yezu wanlaleya miselu dhapama
Yezu wahedda makilometru owinjiva wi àlaleyele miselu dhapama attu àfwanyiye. Kengesa Luka 8:1, mugamala mutanaalele mavuzo aba:
Koddi Yezu walaleyela attu abale amususela wi anvuruwane bahi?
Guru gani yakosa Yezu wi afwanye attu?
Mulugu wahibaza ologa wi Mesiya agahilaleya miselu dhapama. Kengesa Izaiya 61:1, 2, mugamala mutanaalele mavuzo aba:
Yezu wakwanihedhi dhavi nivuhulo ntti?
Weyo ononamo dhavi, attu a masaka abano anofuna wiwa miselu dhapama?
5. Yezu ohisunziha ebaribari yamakamaka vaddiddi
Ottiya olaleyavi miselu dhapama dha Omwene wa Mulugu, Yezu wanvaha magano a deretu. Koona dhotagiha dhing’onovi dhilogiliye va diskursuni ya vamwangoni. Kengesa Mateu 6:14, 34 vina 7:12, mugamala mutanaalele mavuzo aba:
Magano gani apama avahile Yezu mwari mwa maversu aba?
Weyo onona ninga magano aba anowakamihedha attu a masaka abano?
6. Yezu ohikosa matikiniho
Yehova wahinvaha Yezu ewodhelo ya okosana matikiniho. Koona yotagiha, kengesa Marko 5:25-34 obe karumiha VIDIYU. Mugamala mutanaalele mavuzo aba.
Mvidiyunimwa, txini yamuttukuleli muyana oddule wa muredda ottidda yabalo ya Yezu?
Txini yuzivelitxi mu ntikinihoni ntti?
Kengesa Joau 5:36, mugamala mutanaalele nivuzo ntti:
Matikiniho akosile Yezu atonyihedhile eni mwaha wa iyene?
Wanziwa?
Dhotene dhinziwihu mwaha wa Yezu dhinda mmanivuruni manai a mBibiliani ankuweliwa mittaka—Mateu, Marko, Luka na Joau. Jowagalaliha wona wi namaleba mmodha-mmodha ohiloga dhilobo dha mwigumini mwa Yezu dhihilogile mwina. Nigagumaniha dhotedhene esi, ninowodha wona mowakwana-mwene ejile yali egumi ya Yezu velaboni ya vati.
MATEU
Bu muttaka oromile olebiwa. Mwenemo ninofwanyamo masunziho menjene a Yezu, ttabwa-ttabwa a Omwene wa Mulugu.
MARKO
Nivuru na muttaka ning’onona. Nihinrutxa ononelamowa muli mapadduwo menji.
LUKA
Ninloga sabwa ya ttima yana malobelo mwigumini mwa Yezu vina mukalelo waweddihiye ayana.
JOAU
Onologa mwaha wa makani menji aana Yezu na akwaye vina na attu ena, ejo enonikamihedha omuziwa iyene.
ATTU ENA ANLOGA WI: “Yezu kaali mwana Mulugu, wali muttu waderetu bahi.”
Weyo ononamo dhavi?
OGWADDELA
Yezu ohilaleya sabwa ya Omwene wa Mulugu, ohikosa matikiniho vina ohimwiwelela Yehova.
Kobuwela Dhisunziliwe
Mabasa gani a makamaka akosile Yezu velaboni ya vati?
Matikiniho akosile Yezu atonyihedhile eni?
Magano gani a pama avahile Yezu?
TAMELÁ ONONELAMO DERETU
Elobo gani yaziveliwetxa ologa Yezu?
“Porque o Reino de Deus —é Importante Para Jesus” (A Sentinela, 1.º de Outubro de 2014)
Koona sabwaya enfwanyela iyo orumela wi matikiniho akosile Yezu ahipadduwa-wene.
“Os Milagres de Jesus —O que Pode Aprender Deles?” (A Sentinela, 15 de Julho de 2004)
Kengesa sabwa ya mulobwana otxinjile egumi yaye modhela osunza mukalelo waweddiha Yezu attu.
“Eu Pensava Apenas Em Mim Mesmo” (A Sentinela, 1.º de Outubro de 2014)
Koona dhilobo dhikosile Yezu vina mpadduweloya.
a Mmasunzoni 31-33 munosekeserhiwa deretu mwaha wa Omwene wa Mulugu.